ربــــــــــــــــــعي
ربعي إشماگلت مني يزعلون
أو حاير يا كلام أيريح ربعي
أسمعهم علَي بالشين يحچون
وگل للروح حيل إوياج إسمعي
حصادچ هذا من الطيب ياروح
البغض والحسد والأقسى الملامه
اليترجّه الألم إلنه والجروح
إشينفع من نلاگي بإبتسامه
إشيخفي البشر من إحساس مفضوح
أو لا بد ما يزل يوم إبكلامه
أنصح بيج ، وتصدكَين العيون
أو تجبريني أعلگ إلهُم دوم شمعي
راهنتي إبعناد أو گلتي يوفون
اشو راح التعبته أو راح نفعي
* * *
تگليلي الضماير تحكم الناس
على نيتچ يروحي إنتي أو غشيمه
مصالح هالبشر والمال مقياس
أو ياهو إبهالزمن نيته سليمه
للذيل أو صلت وتعدّت الراس
النديم إيخاف من غدرة نديمه
ميشيل الحمل بس حيل المتون
أخذيهه درس وبهاي إقنعي
وإياچ المذله الكان ميكون
ولا تنخين أحد ، إنتي إسعي
أو ربعي شما گلت مني يزعلون
أو حاير يا كلام إيريح ربعي
...........................................