[بريق الربيعي]

دكتاتور حسنك .....للشاعر رياض الركابي


يمتلك نفساً لها طعم كــ طعم العافية

يرى كل شيء جميل نابع من جمال قلبه الرقيق

وها هـــو يصور لنا ابداع جديد من انامل خطت بالزعفران

كــــــــل الجمال والـــــــــغزل

ريـــــــــــــاض الـــركابي

و ......دكــــــــــتاتور حسنك

توُهب بالمحبّه الكان مَن كان
ومن توصل الي اتشح ابمحبتك
تدري الهامتي .. بهواك غرگان
رحمة الله اترجّه او رحمتك
مشدوه الفِكر .. والوجه ذبلان
هاي احوالي من يوم العرفتك
عين الماي انت ، وآنه عطشان
او لأن صدّيت وجهك .. ماشربتك
رادوا اوْصِفك ..ظليت حيران
اذا گلت الشمس .. چنّي شتمتك
الصبح تلهث اخدودك .. زبد معدان
تاكل كلها من فضلة نعمتك
او تحمر الظهر .. چن فرط رمان
الجمر بگلوبنه او بالخد جمرتك
او خدّك من يجينه الليل سكران
او يعمّر كاسه من تشتعل شفتك
او گلت ، تطرد ابجيتك الف شيطان
او على باب الگلب عوذه كتبتك
اشربنّك هني .. ياطيب نهران
عشرة خير ماتنمل عشرتك
او گلت عنك ، گلت اشكال والوان
وادري بالوصف كلش ظلمتك
يا مدري شوَصفك انس لو جان
بيك الله ابتلاني او ماحملتك
يالمرسوم .. لوحة ابسحر فنان
الموناليزا خجلت من لوحْتك
على زندك ابد لا تلبس اردان
جنح فراشه تتفتت بَشَرتك
يالوجهك ثلج والگلب نيران
من نارك اشب .. واطفه ابضحكتك
إمام الحسن انت ، او گلبي تعبان
يجرني كل فجر گوه الحضرتك
دكتاتور حسنك ، گول طغيان
اشيريد ايصير ... هو آنه العشگتك
نِثر قوس القزح بعيونك الوان
غريبه اللمعه بيهن مثل قصتك
او ياقصتك فلا مرّت على انسان
او عذرتك من صرت قاسي ، عذرتك
اريدك تنسه .. احسن دوه النسيان
وابدي وياي من اول رحلتك
وعن طيب اعترفلك چنت غلطان
عليك اهواي لحيّت او جرحتك