اقتباس:
كاتب النص الأصلي : أم الجود
رح جاوبك ... الحقيقة انو ريف حلب هو أكثر الأرياف السورية تخلفاً .. يعني جهل و رذيلة و جريمة و شو ما بدك ... و من فترة كام سنة صار سرافيس رخيصة و متوفرة على طول تخدم على هالمناطق هي و تجيب الركاب لنص حلب (طبعاً خدمة عظيمة و الله يسلم ديات صاحب الفكرة) بس المشكلة كانت انو الموقف الرئيسي لهالسرافيس كان في أحد أرقى و أروق شوراع حلب : محل ما الناس بتطلع تتمشى و تشم هوا الصبح بكير و بالليل متأخر ، محل ما العشاق بيتمشوا سوا ليهربوا من الزحمة و من عيون العالم ، محل ما في صبايا رايحة جاية بتياب الرياضة على نوادي الجيم اللي مملية المنطقة .. بهادا الشارع تحديداً شكّولك سرافيس من أشرشح ما يكون طبعاً مع معاونينون العجيان اللي الشاطر فيون بيعلّي جاعورو قد ما فيه ليغطي على جاعور معاون السرفيس التاني المنافس ... و يا من تراهن عم يغردوا متل الحساسين يئبشوا قلبي : حيــــــدريــــــــــــــ ـــــــة قرب .. قرب عالحيدريـــــــــــــــــ ــــــــــــة (تقولي الركاب رح يهربوا و يقرروا ياخدوا تكسي بآخر لحظة) .. و طبعاً ما بيخلي صبية بنت مرا ما بيقلبها من بكلة شعرها لرباطة بوطا .. ناهيكي طبعاً عن التلطيش و الحكي اللي طالع نازل... آسفة للإطالة بس حبيت أشرحلك الوضع بأسلوب مفصل و كاريكاتوري شوي لأني حسيتك أخدتي كلامي من باب تعالي أو طبقية على أهل الريف و هالشي مو صحيح فاقتضى التوضيح ...
|
هو فهمت عليكي (يعني لا تفكري العكس) لكن ما بعتقد انو القضية قضية ريف حلب\ حلب... ما بعرف, يجوز أكبر جاعور بتلاقيه ساكن بالميريديان (هاي جكارة بواحد هون
) أو بحلب الجديدة... و يعني من ورا خبطات "أغنياء الحرب" كم واحد من السفيرة بوجهو سكن بالشهباء؟
هلأ كمان يجي حدا بيقول هدول الشوايا (و محسوبك شاوي و يفتخر يجي بدو يقلع عينو)
و بالمبدأ مو نفس الشي اللي يجعر بسرفيس الحيدرية و اللي حرق دواليب الزوم 6 و هو يشفّط و يعاكس و مسجلتو مسموعة بالرقة؟ أنا برأيي نفس الـ*** بس ليش الأول بشكل عام نقرف منو (بشكل عام مش قاصد حضرتك) أكتر بشوي؟
المحصلة انو معك حق: مفهوم "المدنية" بسوريا فايت بالحيط لأسباب يطول شرحها و نقاشها, بس يمكن الحق مو ع أهل الريف, حتى لو ريف حلب, و حتى لو توادفة
