[Marooshe]

السطحية وباء فتاك عم يتفشى بصفوف المجتمع بشكل ملحوظ جداً ،

كاتب النص الأصلي : The morning

هل السـطحيه مرتبطه بالـذكاء \ الغبـاء عند الانـسان أم هي مجرد عاده ناتجه عن الاهمال ؟

عطول كنت اعتقد انو العوامل الرئيسية للسطحية هيي البيئة الاجتماعية السياسية لي ربيان فيها الشخص ،
بس السطحية او عدمها بيتفاوتو عند الاشخاص لي ربيانين بنفس البيئة .. فبتلاقي عندك بنفس البلد او بنفس الحارة ناس سطحيين حتى العظام وناس ما بيمتو للسطحية بصلة ..

بعتقد ، انو بالاضافة للبيئة الاجتماعية السياسية لي ربيان فيها الشخص ، العوامل الاكثر تأثير على مقياس السطحية هيي تركيبة الشخصية والتنشأة والتنمية الذاتية لي بيهتمو فيها الاهل او المحيط القريب ..

هل هي مرتبطه بعمر معيـّن و هل هي مغفوره لأعمار دون أعمار ؟؟

ما فينا نتوقع مثلا من طفل او مراهق انو ياخد المنحنى الاعمق للامور وما يفكر بسطحية ،
توقعاتنا بتبلش عند سن البلوغ وقت ما يبدا الشخص بتكوين ذاتو وبصقل شخصيتو .. العمر وباقي التوقعات مرتبطين دايما بدالّة تصاعدية .. فـ كل ما زاد العمر كذلك التوقعات بتزيد ..

هل نـحتاج نـاس سطحين في حـياتنا ؟؟

ازا كانت صيغة السؤال معكوسة ، ساعتها الجواب رح يكون اي .. الى حد ما ..
بحياتي ما احتجت وجود انسان سطحي بحياتي .. عادة نحنا منحتاج وجود الاشخاص لي فيهن يقدمو او يضيفو شي ع حياتنا .. وانا شخصيا ما بنتظر وما بتوقع اي شي من السطحيين،
بس العكس ممكن يكون جدا صحيح ..

على مـاذا نـعتمد في محـاوره انـسان سـطحي و هل هـناك نتـيجه تـُرجى من الحوار ؟؟

من الاساس ما بتحمل اني حاور شخص سطحي ، الا في حال كان هالشخص بيهمني ،
فبيصير الحوار واجب والنتيجة المرجية هدف ..