[nour333]

كاتب النص الأصلي : Nirvana

كان عبالي نحكي بشي غير هالموضوع .. بس هوي هوي ما في غيرو ..
كيف بدو يكون في غيرو وهو على حالو ما تغير فيو شي ..
شو في ببالكم شي نعملو ..
بنحط ايدنا بايد بعض .. ولا نكمل خناق ..
صار الكل على الباب واقف رجل ورا ورجل قدام .. نصو بقول شو دخلني خليها تخرب ونصو التاني بقول خلينا ..أخوية منيحة .. منشوف شو رح يصير ..

انا عملت لفة لا بأس بها بالأخوية وعرفت كيف كان مستواها .. وجد شي بيرفع الراس، وجد حلو انو في ناس هالقد فهمانة، وما تفهموني غلط بس جد رائع انو في ناس حتى اعتقلوها كانو اعضاء هون .. راح تستغربو .. بس انا بقلكم ليش .. اذا اعضاء متل هيك صادقين مع انفسهم واصحاب مبدا ورأي كانو يشاركو بأخوية .. اذن اخوية كانت شي حقيقي ... مو بس صف كلام ..

يا ريت كلنا نقدر نكون صادقين وأصحاب مبادئ وبشر مرتبطين مع اللي حولينا ومو منعزلين ومنفصلين.. نقدر ندافع عن اللي النا بفكرنا بعملنا بانتاجنا .. وأكيد مو بالمشاكل والسب ..

ما تقللو من قيمة النت .. هالموقع فيو يعمل كتير وخصوصا انو موقع كبير وشامل كما ومضمونا ومو سهل أبداً .. وعلى الأقل نحنا نوحد جهودنا ليبقى هالموقع نضيف ومرتب وعلى مستوى.
وما رح احكي عن أبعاد تانية يمكن بهمني احكي فيها بس مو وقتها..

عفكرا مو لازم يكون كل شي سياسة وادب وثقافة بس .. حلو يكون في كمان أخبار الفنانين والرياضة والسقيفة والصالون وكل شي ... بس كمان نحترم كل قسم منهم ..

وفينا نحترم بعضنا شوي أكتر يعني بلا ما كل واحد ماشي على جبينو مكتوب .. مسيحي مسلم ... سوري سعودي .. سني شيعي .. الخ ..
ويا أخي الرد اللي مو عاجبك اعمل حالك مو شايفو .. انا بعرف الواحد بعصب وبيستفز وانا كمان هيك .. بس نحاول على الأقل .. ونحاول ما نتلفظ بالقليلة ألفاظ ما بتناسب المكان ..

بعدين في المواضيع هاي اللي فيها اشتباكات، بكون في واحد ما بعرف من وين جاي .. وبكون في اعضاء محترمين من اخوية .. يا جماعة الأخوية المحترمين ما تنزلو مستواكم لتردو على هالأشخاص .. لانو بالنهاية اللي رح يحس مو هني .. اللي راح يحس هني اعضاء الأخوية .. اخوتكم التانيين ..

حبيت أشاركم هالفكرة .. يمكن تلاقي قبول وايجاب عندكم .. لنقدر نركز باخوية مو بالخناق مع ناس أساسا ما بتهمهم الأخوية ..

يعني الفكرة من نكوشتي لهالموضوع انو كل يوم بنقول وين ايام اخوية وشو صار بحال اخوية ويا ترى من هون لل 2015 شو رح يصير بحال اخوية وهل اخوية بتمشي للأسوأ ام الاعضاء ببالغو لأنن بحنو للماضي