اقتباس:
كاتب النص الأصلي : wewe4de
بالنسبة لـ الشق الأول..أنا برأي لأ ما بتعطيها مصداقية
أما الشق التاني فأكيد بتفقد مصداقيتها(اذا كانت ذات مصداقية)لأنو وقت تتحرف وتتفسر..حتكون حسب كل مين بيفسرها لأنو كل واحد بيفسر بالطريقة يلي بدو ياها وميشان هيك ما رح تكون بالمعنى يلي انوجدت لألو..مثال:
بالانجيل موجود انو السيد المسيح أخرج من رجل الشياطين الموجودة فيه (بالكتب المقدسة في كتير تعبيرات مجازية بس لتوصيل المعنى المطلوب لأنو المعنى بالشياطين هو الخطايا ووقت طلعو من الرجل معناتا أنو انشفا من الخطايا)
أما وقت بيجي نصاب شغلتو ينصب على العالم(عـ انو بيشيل الشياطين من الواحد) وبستشهد بهالشغلي بيكون استشهادو هاد بس ميشان يمشي شغلو لا أكتر ولا أقل.
|
على مبدأ فاقد الشيء لا يعطيه
اذا الحرف ما بيعطي المصداقية للنصوص فكيف بتم سحب مصداقيتا في حال وقوع تغيير بالحرف !
وشو هية الاشياء اللي ممكن نعتبرها مصداقية بهيك حالات ؟
بالنسبة الي برفض فكرة وجود معنى واحد من كل سطر ومعنى واحد لكل كلمة
بحس بالتميز وقت بشاهد لوحة مفتوحة المعاني وكل مين بياخد الصورة اللي قدرت تشكلها اللوحة بمخيلته
فحتى لو كل شخص فهم الآية شكل وين المشكلة ؟ بالنهاية اذا وصلنا لنقطة انه فهم الآية ما عما يضر وعما يحسن من البشرية وعما يرقي بالتفكير وين المشكلة ؟ ما بالأساس لهيك اجا الدين لتحسين البشرية ولا كيف ؟
على مثالك هاد فيني قلك لا المسيح باحدى النصوص تم ذكر انه طرد الأرواح من الانسان واسكنها بالخنازير اللي سارعت بالسقوط من الجرف ، الشي اللي بينفي تفسيرك انها الخطيئة ، وهيك منبقى انا وانت ساعات عما نعلق ونتشاكل بشو هوي الحادثة الحقّ اللي صارت .
بس لو وصلنا لنقطة ان الفكرة من ذكر الحادثة هية بأن ثقتك بالرب بتقدر تحسن من واقعك وتعطيك بداية جديدة منكون قدرنا ناخد الفكرة العامة من النص اللي من اجلا انكتب بغض النظر عن الحروف اللي تم تمثيلا فيه .
ويا هلا
