المغتربين
صباح الخير يا جماعه
حبيت من الصبح بكير افتح معكون هل الموضع يلي فعلا يا اخون دابحني ودابح كثير من الشباب يلي مثلي
وهو الاغتراب
يا اخوان خلصنا دراسه وتخرجنا من الجامعه وقدمنا على وظيفه بهل الدوله بس احزرو شو صار
يلي صار يا اخوان انو طلبي انرفض كوني مالي خادم عسكريه فهون انا انحطيت بين امرين يا اني اخدم عسكريه سنتين ونص وضل خلال هل فتره عم اخد مصروفي من اهلي واخلص عسكريه عمري خمس وعشرين سنه ماحيلتي قرش يعني ايد من ادام وايد من ورا وها لبلش امن مستقبلي بدي خمس عشر سنين مشان بتعرفو بيت ومستلزماتو مشان بعدين اتزوج
او اني اغترب بدول الخليج خمس سنين مشان اخاص من العسكريه وقملي كم قرش .
والله يا اخوان قررنا السفر على الامارات وسافرت وهون بلشت القصه
بتعرفوا شب مالو شايف شي من حياتو يا دوب بيعرف كم كلمه بالانكليزي وبيعرف حارتو وبيوت حارتو الاديمه ويلي من العصر العثماني والفرنسي ( يسعد ربها ما احلاها ) وبيعرف بنات بلدو يلي اذا حب الواحد منا بنت من بنات جيرانو بيتخبى من اخوها ومن ابن عمها وبيستناها عند مدرستها ( اه ه ه ايام الانتظار عند مدرسه جول جمال بالصالحيه ) وبيعرف انو اطيب صندويشه هي الشاورما لما كانت ب 25 ليره ولما يديق خلقو بيطلع ما صحابو على الاقهوه بشربلو كاسه كمون مع نفس اركيله ودق تريكس بحطلو 125 ليره بيرجع على بيتو بنص الليلل مرتاح
بس هون بالامارات اول ما فوت الواحد على المطار وبيشوف الديكورات وبعدين بيطلع على المدينه وبشوف هل ابراج والشوارع المنظمه والسائقين يلي خايفين من شرطي المرور ولا من سياره الشرطه وبشوف ما هب ودب من جنسيات من هنود وباكسان وفلبينين وغيرو وغيرو وهاد يلي ماشي مع هي وهي يلي عابطى هاد وباليل بهل حديقه كل واحد مع وحده اخدين زاويه وعلى عينك يا تاجر غير الطنطات يلي بصيرو يلحقوك مشان يطبقوك هون بسموهن بكلات ويلي بدو ياكل سندويشه شاورما يلي طبعا مالها طعم ولا نكها وبتخلص بعظتين بحط حقها 5 دراهم وبدو يسهر بصير يروح على الديسكويات
كل هل اشيا يا اخون غير انو كثير من الشباب العرب والسوريين خصوصا تزوجو من فلبينيات لسببين اول شي
ممكن يكون غلط معها وبدو يصلح الغلط وشي بقلك بنت بلدي غاليه ومتطلبه كثير بدها بيت وبدها سياره وبدها وبدها
بس الفلبينيات بساولك كلشي من غير ما يطلبو شي وبيرضو يسكنو مع الواحد بغرفه مو بشقه وينامو على الارض على فرشه مو بغرقه نوم
كل هل الامور خلت الواحد يقسى قلبو على بلدو ويرفض يرجع على سوريا .
وفي شغله تانيه يا جماعه كمان مو كل الناس بتعرفها , انو مو كل الشباب يلي مسافرين على الخليج مرتاحين ماديا او معنويا في شباب يا اخون الراتب ما عم يكفي لاخر الشهر وعم يكونو مديونين هل شغله اهل الشام ما بعرفوها الناس بسوريا مفكرين انو المغترب قاعد على سطل من دهب عم يغرف منو ويعبي كيس الشوال يلي بدو يرجع فيه على بلدو ولما ينزل اجازه بعد ما يكون الشب حط كلشي مصمدوا حق تكت طياره وكم هديه
بقلولو هاد يلي جبتو معك ما بيعرفو انو هون ملتعن ابو سلسفيلو
ولما تخلص الخمس سنين يالله يا شاطر ادفع 5000 دولار بدل الجيش
والله يا اخون شي بحز بالنفس لما الواحد يطلع من بلدو ويترك اهلو وناسو واحبابو
بس كمان يلي بيجرح الواحد اكثر انو يحس حالو مغرب ومهضوم حقو ببلد
ولا شو رائكون
|