مبدئياً ميمو .. انا شفتك مرتين .. ويعني شي يلي شفتو أنو ميمو عندها طاقة هائلة بـ نشر السعادة و الفرح و هيكي .. كيف قدرتي تكوني هيك ؟
ما بعرف .. في شيء من الطبع .. في شيء من الموهبة بحس الفرح هو موهبتي ..والشي الصغير اللي بقدر جابه فيه أيقاع الدنيا من حواليي ..
أهلي .. محيطي .. الناس اللي بحبن وبيحبوني .. حياتي فيها خيبات وفيها اشيا بتحزني بس عموما ً ابتسامتي اقوى
ع سيرة شوفتك .. انت من الناس اللي حبيتن أكتر لايف مع انن ما بيحكو 
و كيف لـقيتي الشغل بـ الشركة .. و حكيلنا شوي عن الكادر يلي عندكون ..
اووووووووووه رائع
حابة الشغل بالشركة جدا ً . كان القرار اني ما مارس الطب وافتح عيادة قرار صعب وبالبداية وقت عملت مقابلة الشغل قلتلو لمديري " واللي هو ع فكرة شخص رائع جدا ً " أني ما بعرف لسى إذا الدعاية الطبية وشركات الأدوية هي مجال عمل مناسب لألي
بعد كذا شهر .. عرضوا عليي الترقية وحاليا مبسوطة جدا وحاسة اني مميزة بالشي اللي عم اعملو
عنا بدك تقول مدير مباشر .. مديري فرق " عنا تلت فرق كل فريق من خمس اعضاء ومدير فريق " وعنا لاينات
هني شخص واحد ماسك اختصاص معين
يعني عنا خط العينية ماسكو حسان اللي شفتو
فالمفروض نحنا أنا وحسان منجيب قد التلت فرق البقية مصاري للشركة لأنو دوانا بينباع لفترة اطول وهيك قصص ..
و حكيلنا شوي عن المشروع يلي رح تعمليه بـ المكتبة .. و شو هيي المكتبة بـ النسبة ألكي
ولا المكتبة كحلم .. بحياتي ؟
مكتبة اخوية سبق وقلت انو هي هاجس بيعنيني جدا اني خلي الناس تقرا وحتى انو كتير بنق عالناس اللي حواليي مشان يقرو وبهدي كتب لرفقاتي .. بحب الناس تشاركني شي انا بشوفو ممتع
اليوم وقت بشوفا هيك عم تكبر وتكبر بحس يا زلمي اني بخاف عليها .. وبحبا .. وفخورة بالشغل اللي عملناه بالمكتبة .. فخورة بالناس اللي بيبعتو وبيتشكرو وانو عن جد كانو بحاجة كتاب معين وأمنتلن ياه المكتبة ووقت حدا " متل بيرسونيتا مثلا " بيقول انو هو أجى ع أخوية كان عم يدور ع كتاب ..
بحبا للمكتبة كتير .. هي القسم المفضل لألي بأخوية كمتابعة وك عضوة و كإشراف وككل شي ..
يعني بياخد من حصة كل الاقسام البقية ..
شو في ببالي للمكتبة .. عم نعمل الفهرس أسهل للتصفح وفيه البني ادم يبحث عن الكاتب اللي بدو ياه بسهولة اكتر .. وببالي ننزل اعمال سعد الله ونوس وانسي وممدوح وفيك هيك تقول أني متحيزة للأدب السوري ورح اسعى انو ننزلو تباعا ً
المكتبة كحلم بحياتي .. يعني وقت بفكرببيتي بفكر يكون عندي هيك غرفة كبيرة كلها كتب وفيها سلم خشب مشان الكتب العالية و مكتب واقعد اقرا فيها وهيك ويكون عندي مكتبتي الخاصة الكبيرة والمميزة .
وفي جزء هيك ع جنب .. فيه مكتبة لولادي وفيها قصص وحكايات والمكتبة الخضراء
وبحس اني وقت اصل لعمر التقاعد رح افتح مكتبة إعارة كبيرة كتير كتير .. " هيك بالمصاري اللي كوشت علين " و أقعد فيها .. . انصح الناس شو تقرا وهيك ويكون أجور رمزية وهيك شغلات أحلام وردية