[أم الجود]

صوتك مرق عالمسافة و سلّم عليها
ما صدّقت انو مرق تا شافت الحِنّة عا إيديها

قال الصوت خليكي ما دام جايي هوى
رح ضلّ ناديكي .. يا ريت نبقى سوى

تركض غزالة حافية بضوّ القمر حتى تمسّيكي
بس تحلم منامات كشّفها الهوى .. نومِك يغطيكي
وصل الخبر ع مصر .. وقفو ملوك النيل يتأهّلو فيكي

صوتك مرق يا طير قلّو يسلّم عليي
ما صدّقت إنّو مرق تا نشفت الدمعة بعينيّي

كنت تقلي غنّيلي .. غنّيت ما في حدا
وينك طِلّ مقابيلي .. صوتك صاير صدى