اقتباس:
كاتب النص الأصلي : توم و جيري
ياشباب بتعرفو في شي ما عم افهمو .....
انو نازلين برب هالنظام مسبة طيب انا جيت معكم في فساد والحكومة فيا عالم عم تسرق .........
انا بأيد الرئيس وما خافية الشغلة عحدا بس شيلوني من الموضوع ....وخلينا بالاساس ....
رامي مخلوف مابعرف عنو كتير بس في شغلة بدي قولا ......
انا حطيت موضوع عن الفساد بالمنبر 70 واحد فات عليه ومحدا حط رد بتعرفو هاد شو معناه انو نحنا شاطرين بالحكي وبس ....
شاطرين نقول في فساد وفي وفي وفي وهاد حكي بتسمعوه ليش ما بتحكو .....
انا عم احكي من قهري كل يومين تلاتة بعمل مشكلة بشي دائرة حكومية انا مابوزع لحدا والمعاملة بدا تمشي اجباري عن اللي خلقن وبتمشي حتى لو ضليت اربع ساعات ....
بدكن تحاربو الفساد بايدكم مو بالحكي .....
|
لاء حبيب , الخلاف مو على الحرامية الصغار, انت حطيت موضوع عم يحكي عن حرامية صغار و كتير صغار مقارنة بالرووس الكبيرة
في موضوع بقسم الفساد , مثبت, مابعرف اذا شفتو , في نسبة 76 بالمية مصوتين انو الفساد سياسة دولة مو ظاهرة فردية, يعني الاغلبية عرفانة انو مصدر الفساد هو الرأس الكبير, اللي بايدو كل السلطات و اللي ورث عن ابو سلطة قائمة على الفساد , ولو فرضنا انو عندو نية يصلحها فرح تنهار على راسو
محاربة الفساد يا معلم ما بتجي انو كل يوم والله شو قال اكتشفوا مدير سرقلوا شي مليون ليرة(بكون اكيد ما ورا ضهر يدعموا مشان قرروا يعملوا كبش فداء) او شو اكشتفنا شرطي عم يرتشي ب 25 ليرة
محاربة الفساد , تعني قضاء حر وتطبيق شعار الكل بما فيهم الرئيس تحت القانون , وهالشي ما بيقدر يعملوا الا بشار الاسد لانو بايدو السلطة التشريعية والتنفيذية و كل شي
محاربة الفساد تعني صحافة حرة, همها ملاحقة الفاسدين مهما كانت مناصبن, مو صحافة المنجزات و ال 99 بالمية
محاربة الفساد ما بيصير بوجود هالكم الهائل من اجهزة الامن , اللي همها احصاء انفاس المواطن وتاركين الحرامية تحت عيونن عم يسرقوا.
منجي لشغلة ليش ما عم نعمل شي, بتقدر تقلي انتي كمواطن عادي, ما نك مدعوم , شو قيمتك بوطنك؟ وشو بتقدر تعمل؟؟ بتسترجي تطلع مظاهرة سلمية للمطالبة بمحاربة الفساد ؟؟ بيخلوك تعمل مثلا جريدة همها البحث عن الفاسدين و فضحن امام الناس؟؟؟ بيخلوك تعمل نشاط اجتماعي مع رفقاتك يهدف لتوعية الناس من مخاطر الفساد ولزوم محاربتو؟؟؟؟
فاذا انت وانا مواطنين ما بيحقلنا اي نوع من انواع النشاط السياسي السلمي ( ما عدا الرقص والدبكة في مهازل الاستفتاء ) فليش عم تحاول توحي انو الحق على الشعب لانو ما عم يكافح الفساد؟؟؟
يعني الجولان ما تحرر لهلق لانو ما في مقاومة شعبية , والحق على الشعب المتمسح
الفساد شغال لانو الحق على الشعب اللي ما بيحاربوا
عبد الحليم خدام ضل 30 سنة يسرق تركوه والحق على الشعب اللي ما كشف فسادو
كل هدا الحق على الشعب, بينما الرجل المتربع مع اسرتو على العرش و اللي بايدو كل شي, و اللي اذا بدون يعملو اتفاقية تصدير 2 كيلو فجل ل جزر القمر لازم يطالع مرسوم في هذا الصدد , ما الو دخل بنوب و عم يحاول يا حرام من 9 سنين و ما عم يطلع معو شي , مشان هيك الفساد عم يزيد والفقر عم يزيد بس كرامتنا هي اللي عم تنقص , هذا اذا ضل منها شي.