فكرنا شوي ابعد من انفنا وهاد اللي طلع معنا
انه انا حياتي يعني ما خصني فيها ولا خصا فيني
يعني عبارة عن وكيل لهي الحياة اللي اهلي سلموني ياها
هلق آدم مين سماه بهالاسم ؟!
هوي اجا قال انا بدي اسمي آدم ؟!
اكيد لا
انت طيب مين سماك او سماكي بهاد الاسم ؟!
بمعنى او بآخر لا انا مسؤول عن حياتي وانت كمان شرواي الحال مانك مسؤول عن حياتك
يا زلمة اذا اسمك مافينك تقرره فلا تقعد تقسّم على ربي انك مسؤول ومواطن شريف واعطنا خبزنا كفاف يومنا ، هس ولا كلمة
فانه يعني كل اللي بدي اكتبه هوي عن الحياة اللي انا ماني مسؤول عليها
بالعادة بتكون القيادة العليا المنزلية ( الوالد والوالدة ) هنن المسؤولين عن هي البزقة اللي اسما حياة
فهنن بيرسموا خط البني آدم وهنن بقرروا فين بده يدرس وبأي مدرسة وبأي مشفى بده يولد وشو اسمه وشو لون جراباته وإلى ما هنالك من امور حياتية
فجينا سيادتنا على حظنا المشحور اللي سيادة الوالد راسملنا ياه
- انه انا هلق شو ؟!
- طالب
- يعني طول عمري بدي ابقى طالب ؟!
- لا اكيد الا ما تتخرج وتشفلك شي شغلة
- طب شو هية الشغلة اللي بدي اشتغلا
- شبعرفني اشتغل اللي بدك ياه ، بوياجي ، حميماتي ، خدام بشي فندق ، رقاصة بشي مطعم ، عكروت ، اللي بدك ياه روح تبحتر بهالنعمة
هالحديث لسع ما صار بس هيئته بده يصير بعد شي 3 سنين
فانه جينا بدنا نعمل ضربة استبقاقية للواقع ونسبقه قبل ما يسبقنا وقعدنا نفكر
وشفنا انه لو كان سيادة الوالد معه مصاري وعنده 6 بنايات شو كان صار ؟!
واضحة كنت هلق ماني بهالحيرة تبع شو بدي اشتغل وكنت بعد ما تخرجت من تاني يوم بديت شغل ، لك قبل ما اتخرج بقدر ابدا بالشغل
لا تسالني شو هوي الشغل لأن اللي عنده 6 بنايات ما بيعتل هم الشغل اللي بده يشتغله ، خيو بأضضضضضضضعف الايمان وبأبشع الاحتمالات
بيشتغل حويسة درج وبيفتل على البنايات الستة كل يوم بناية وبيصفاله يوم ويك آند عطلة بيتبحتر فيه على كيفه
فبعد ما شفنا الحل الشافي لمشكلتنا رحنا عند سيادة الوالد قلناله
خيو انا آكل هم حالي وما بعرف شو بدي اشتغل مع الايام ، شو رايك تعمرلي 6 بنايات مشان اذا جار علينا الزمان ما نتخوزق متل ما متهيئلي هلق بده يصير فيني ـ يعني بحركة من حضرتك انو عدم المؤاخذة يعني اذا حضرتك ما تحركت بتبعدنا عن الخازوق سفر سنة وبتقرب اللقمة من تمنا مشاور 10 دقايق
فاجا الجواب الشافي من قبل القيادة المركزية انه هوي ما معه يعمر 6 بنايات ، بالاصل اذا نفضته نفض ما بده يطلع معه مصاري بتعمّر6 اراكيل حتى
فيعني من هلق ورايح لا حدا يقلي انت ليش بتحب تاركل وليش بتحب تشرب وتحشش
خيو انا عيني ديقة وماني شبعان آراكيل ببيت اهلي وما صدقت مسكوني اركيلة حتى بدي شفط بسما ربا الك عندي شي ؟!
هاموش :
اللي ما جاي على باله يقرا مخلفاتي اللي فوق بنصحه يقراها ، انا شخصيا قريتا وصحيحة جدا كتير وهيك يعني .
رايحة تزور
كوخ مسحور
|