[قرصان الأدرياتيك]

سلام...
مقدار أمّي ما فيّ حدّدو... محبّة لا توصف.
بس سجليلي هالاعتراضات:

لما كان عمري سنة كنت مفطوم من زمان كتير أصلاً بعد ولادتي مباشرةً أمّي مرضت وما قدرت تغذّيني، شفتي بالله على وج النحس هاد؟! المهم لما كان عمري سنة أمي ما كانت تغديني دوبها كان تلحق عأختي اللي لحقتني وعينها بالغذاء. كنت أبكي إي بس لأنّي ما تغدّيت منيح مو لغير سبب.

ولما كان عمري سنتين كنت ماشي ومخلّص... يعني أمّي كان بطّلت تدريب من 13 شهر. وبعدين أنا ما هربت ولا من يحزنون، بالعكس كنت ألحقها بلكي يطلعلي شي حملة عالأكتاف أو لقمة بالأجواف.

ولما كان عمري تلت سنين الله وستين وكيلك ما كبيت شي عالأرض، أصلاً ما كان أسترجي... إيد أبي كانت لي بالمرصاد.

ولما كان عمري ست سنين ما سجلتني بالمدرسة لأني كنت مسجل فيها قبل تلت سنين وكنت صاير بهالوقت صف تاني... وبعدين أبي هو اللي سجلني وبالعلامة بتذكر أول يوم لما وصلني عالبسكليت وأنا بكيت كتير كتير بس المعلمة كانت حنونة وقدرت تسكتني وتحببني بالرجعة لعندها.

ولما كان عمري عشر سنين كانت تفتحلي الباب مزبوط وتعانقني مزبوط وتسلخني كام بوسة كمان مزبوط، بس اللي مو مزبوط إني كنت أهرب للغرفة، لأني والله يشهد لي اليوم ويوم الدين أني دوبي كنت لحق غير تياب الطلائع لروح عالسوق جيبلها شي شغلة نسيانتها أو ساعدها بتحضير الصفرة... ملاك سبحان الله!

هلا لما كان عمري عشرين سنة ما كانت تطلب مني روح معها لعند حدا، وما كانت تطلب مني شي بنوب لأني أصلاً كنت عم أدرس بعيد عنها شي ألف كيلومتر... وبعدين يعني تصوري أني روح وقضيها معها زيارة نساوين وطق حنك؟!

ولما صرت بالخمسة وعشرين ما ساعدتني بتكاليف الزواج ويا للأسف الشديد... لأني ما تزوجت بهالعمر، ولهلا ماني متزوج وما بظن أنّو رح تقدر تساعدني بأي تكاليف! ربنا يعينها ويعيني!!!

ولما انضربت على حظي وبلغت العقد التالت من عمري يعني تلاتين ما حكتلي شي عن الأطفال لأنها لساتها بالمرحلة "Pre" زواج! وإذا حكتلي من عيني هي قبل هي... أصلاً أنا إذا تزوجت رح خلف شي 12 ولد وإذا مو عاجبها لمرتي فمن هلق طالق وبالتلاتة.

عالأربعين لسا ما وصلت الله يخليلنا ياكي ويخلي أمهات الجميع.

.