[sbihat]

كاتب النص الأصلي : achelious

موعود..موعود فيها صار إلي مدة..
ولما تلاقت يدها بيدي
قلت بدي شكلك بالورد قالت انا بالعكس ما بدي ..

فرشتلها ريش النعام تخوت.. وبوردتها بهبة نسيم الليل
وجبتلها حبة من الياقوت.. تلمع بصدرا متل نجم سهيل
وقلتلها ياحاضري وغدي..عفوك هدايا الحب لا تردي
غطت زنود العاج بالديباج.. وقالت اذا بتريد ما بدي..

سحبت من عمر الزمن خيطان.. تلبق بلون شفافها الحمرا
وطرزت فيهن قبة الفستان اللي رح تحترق من تلجة الجمرا
وقلت لبسيهن والشمس حدة.. فزعان تكوي الورد المندي
قالت ما فيها شمس تكوي شمس وعن اذنك فساتين مابدي ..

وليلة شربت السحر وتغيرت.. ودخلت غرفتها ورا الاحلام
وقربت من صوب الفراش.. وصرت رش الغفا بعيونها تتنام
نامت وحلمت حالها حدي.. وصارت تطبع جمر عخدي
وشو خفت يفلت من عيونا الحلم وتوعى الصبح وتقول.. مابدي

ولما عرفت ما في أمل يحلا عنقودها.. فتشت ع أحلى..
ولما عرفت العصفور منها طار..
ومن غير وعي من عيونها الكحلا ..
من القهر نزلت دمعة الياريت.. تكوي زرار بعروة المريول
وصارت بعد ما تركتها وفليت.. تركض ورايي حافية وتقول..
دخلك شدني وغمرني بدي.. اغفى واعمل زندك مخدي
قلتلها سبحان الله كيف وقت اللي صار بدك.. ما بقى بدي