[c.a]

يعني ما بعرف شو بدي قول لأني مصدومة وما كنت متخيلة الحقيقة إنو في زلمة بهالأيام بيضرب مرتو بس يمكن أول شغلي خطرت على بالي إنو الله لا يقيما لأنا قال مبسوطة وبتحب حياتا وما بدا تترك هالوحش اللي عم يضربا ورضياني كمان إنو تنضرب
بس بعدين رجعت قلت إنو ماحدا بيعرف ظروفا ويمكن من وجهة نظرا هيي بدا تحافظ على بيتا وابنا ويمكن عند أهلا كانت معذبة أكتر من هيك يعني بهالحالة الحق ما بعرف على مين ممكن يكون :
على الزوجات اللي عم يتعرضو للضرب وساكتين ولا على الأزواج ولا على المجتمع اللي ما بيرحم المرأة حتى لو كان الحق معاها وأصلا ما بيعترف إنو الحق معاها ودايما بيقولو الحق عليا هيي وهيي لازم تتحمل وتصبر يعني لإيمت ممكن تصبر بلا ما تفقع
وانصدمت أكتر الحقيقة برأي الدكتور حسام وما كنت أبدا متوقعة منو هيك رد لأني بعرف إنو إنسان متحرر ومن ذوي الوعي وبتمنى عن جد إنو يكون حكيو مجرد مزحة وما يكون بيعبر عن رأيو بس بدي قللو إنو لو كان فرضنا جدلاً إنو حكيك عن الضرب كأداة للتربية

بعتقد الضرب استخدامو الاول للتربية والتاديب
هلق لو اشائت الاقدار وكانت مرتو للواحد غير متربية وغير مودبة
وما نفعت كل الحلول السلمية
لا مانع من استخدام الضرب كادات تربية وتعليم

هون بيكون برأيي الحق على الزلمي نفسو لأنو أكيد ما حدا جبرو من الأول إنو يتجوز وحدة بدون تربية وهاي للأسف ظاهرة كتير عم تنتشر بين الشباب إنو لما الشب بيشوف بنت حلوة وعم تتدلع بيكون طار عقلو وصار بدو يتجوز فورا بدون ما يعرف كل شي عن هالبنت وبدون ما يتأكد من أخلاقا وتربايتا لحتى على الأقل يقدر يوثق بالأيام إنو رح تربيلو ولادو تربية صحيحة
طبعا مو كل الشباب هيك لأنو الحمدلله في عنا عدد منيح من الشباب الواعي واللي بيفكر منيح قبل ما يقدم على هيك خطوة
أما موضوع المهابة فهالحكي عن جد بيضحك لأنو بعمرا الزوجة ما رح تحترم الزوج إذا كان بيضربا حتى لو كانت شخصيتو كتير قوية وإلو كلمتو بين العالم

وبدي أشكر كتير الكينغ وأنمار على هالحكي اللي بيرفع الراس وبيرجع الأمل والتفاؤل بالجيل الطالع
طبعا الحكي بهالموضوع ما بينتهي بس يمكن طولت عليكون لا تواخزوني
وشكرا