[باشق مجروح]

بقول انو كتير عم ينحكى عليك بكل مكان . بحاول ما صدق كل هالحكي لأنك بتضل بقلبي رمز الحرية والعدالة المطلقة . بس الناس معها حق يعني كل الي عم بيصير حوالينا وانت ما عم تتدخل . يا اما ناس عم بتموت باسمك وناس عم تموت من الجوع ببلاد كتيرة من العالم وانت بتقول انك أحن من الام بولدها . حبيت اسألك :
في ام بالدنيا بترضى تشوف ابنها عم بيموت قدامها وما تعمللو شي ( وهي قادرة ) ؟
يعني هالشغلات عم بتخلي الناس تعيد نظرها فيك . بس انا بضل حس انو انت الك وجهة نظر تانية . بضل بشوفك بالضحكات و بصوت فيروز و بحب بلدي بريحة بيتي واهلي بلون الربيع وبضو الشمس . وبعرف انو ما الك علاقة بظلم البشر وطمع البشر وجشع البشر . وبعرف انو انت ما بتحب هدول الي بيتفهمنو علينا على اساس هني من جماعتك . جماعتك هني الي بيلعبو اللعبة صح . الي ما بيساهمو بتدمير النظام الكوني . بيعيشو بسلام وبيدافعو عن حقوق كل شي خلقتو .
طولنا عليك بالحكي . انت بتعرف انو الحكي العلني مالو كتير معنى . الحكي الحلو بيكون من جوا .