[انابيل]

كاتب النص الأصلي : VivaSyria

أول شي بدي إعتذر لأني ما كنت فعال بالنقاش بهاليومين لظروف الخاصه.... بدي حاول لخص جوابي على كل المشاركات هون:

أول شي يا جماعه ذكر أسماء كـ زنوبيا و أنديرا غاندي يضعف موقف المرأه القياديه... لأنو ببساطه نحن عم نحكي على ألاف السنين من تاريخ البشرية وانتو عم تحاكوني بأربع خمس أسماء... معناها منرجع للنقطه الأساس انو هالحالات كانو حالات شاذة..
ألاف السنين... ونحنا منحكي بكم حالة شاذة.. أنا عم احكي عن آدم وقابيل وهابيل وتوت عنخ أمون وطارق بن زياد ويسوع ومحمد وموسولوني ونابليون وهتلر وجورج بوش وروزقلت وصدام حسين وغاندي وغيفارا وكاسترو و و و و و و و و و... وملايين الأسماء... ملايين القاده والأنبياء منهم من كان بنقاوة المطر ومنهم كان بحقارة المجرمين... وانتو بتحاكوني بأربع خمس أسماء...
أنا بسنة وحدة بجبلكون اسم 200 قائد رجل... وانتو عم تلاقولي كم اسم على مر التاريخ... هالقاده هدول مافي شك انو كان في دور للمرأة في دور بحياتون.. دور تكميلي دور جيد... ودور تدميري ببعض الأحيان...

تاني شي ياشباب نحنا هون ماحدا منا بيقدر يسلم المرأه قيادة أي بلد.. فمشان هيك بتمنى مانزاود على بعض... المرأه غير مؤهلة لقيادة الدول... لأنو القيادة قرار وجهد وحرب وسلام وإجرام وعطاء وسفالة في بعض الأيحان... هل تستطيع المرأه أن تقود جيش من الرجال في الحروب؟؟ طيب كيف وليش؟؟ إذا الجيش أساساً كلو رجال "بتمنى ماحدا يقلي هلأ انو في كم مجندة بالجيش الأمريكي لأني عم احكي بالمطلق هون"...

هالشي مو إنتقاص أبداً من قيمة المرأة بس فيكون تعتبروه تقييم ونوصيف لحالة معينة.... أنا لما قول إنو المرأه غير قادره على ثيادة الدول مو من وجهة نظر ذكورية... لأنو لا أنا عم فكر صير رئيس جمهورية ولا حبيبتي بدها تعمل إنقلاب... ويلي بيقول مبلا بتقدر هالشي مابيعمل منو انسان منفتح على قضايا المرأه وإنما بيوضح انو هو عم يعالج قضايا المرأه بدون عقلانية وتفكير منطقي من إيمانو بضرورة أخد المرأه لحقوقها... والمرأه يلي بتقول انو هيه بتقدر تكون قائد لدولة بقدر وضعها بحكم مطالباتنا المستمره بالمساواة.... بس خلونا نفكر بواقعية ومنطقية قبل ما نطلق شعارات فضفاضة وواسعه كتير...

كلنا مع المساواة وكلنا مع العدالة الإجتماعية... كلنا مع رفع الحيف عن المرأه وكلنا مع الإحترام المتبادل القائم على الأسس الصحية الصحيحة... ومشان كل هالقيم لازم نكون عقلانيين وندرس المعطيات صح...

مابتصور مرأة رئيس جمهورية متل مابتصور مرأه عامل تنظيفات.... مابتصور مرأه رئيس جمهورية متل مابتصورها عامل على مرجل الفحم في القطارات القديمة...

الشغلة مو تمييز وإنما عوامل.. مجموعة عوامل بتتعلق بالتركيبة النفسية والفيزيولوجية للمرأه ... عوامل بمعظمها تتعلق بطبيعة المرأه... بغض النظر عن وضع المجتمع الذكوري يلي نحنا فيه...

بالنتيجة المساواة بين الرجل والمرأه هي المساوات في الحقوق والواجبات... وليست مساواة تطبيقية قد تنتقص من قيمة المرأه في بعض الأحيان... صدقوني الفكرة فيها إعلاء من شأن المرأه لا نيلاً من حقوقها...

وشكراً للجميع على ماقدموه لإثراء الموضوع.

بالنسبة لبداية كلامك بظن انه فسحت امل جاوب كتير منيح ما رح يكون احسن من ردي انت عم تقول هلأ عن حكام اما عن قادة قاموا بحركات غيرت وجه التاريخ اذا بدنا نحكي عن حكام فانا ما شفت منهون حكام قاموا على تغيير وجه التاريخ للاحسن طبعاً لان لب النقاش هو النجاح بالحكم ومعنى النجاح بالحكم هو ان يرضى العالم عن انجازات هذا القائد بعتقد هنن قاموا بتغيير واحد هو وجه العملة اما كقادة حركة متل غيفارا وطارق بن زياد وغيرهن فهدلول ما كانوا حكام على الاقل لو حكينا عن الحكام والقادة بزمانا هاد لان قبل هيك يعني قبل ألف سنة كان دور الحاكم غير هيك وعموماً متل ما في 200 قائد وليس حاكم بتقدر اطالعهون بسنة نفس الشي بتقدر تحكي عن النساء وانا بنظري القائد له دور بارز وراسخ في العقول اكثر من الحاكم سواء اكان قائد فكري او عالخيل او عالطيارة او بالمعتقل المهم انه بوجه فكرة بحارب مشان فكرة اما كحكم بجوز يكون نصيب النساء كان قليل ومتل ما ذكر فسحة امل وعلل الجواب اما هلا لحنا عم نحكي بزمانا الحالي ممكن المرأة تحكم وانت عللت السبب انها مارح تقدر تنزل عالحرب وتقاتل اكيد هي ما رح تنزل تقاتل لا هي ولا باقي الحكام لان هي مو شغلتهون في مين يفكر بالخطط الحربية وياخد عليها راتب ورتب وللمعلوم لما يكون الحاكم عسكري يفشل في نظام حكمه لان الحكم يجب ان يكون سياسة ودراسة وليس خطط وحروب والاتنين ما بيجتمعوا مع بعض بتعرف ليش لان الفكر العسكري بكون دائماً مندفع ام الفكر السياسي بكون متروي يحتاج لتحليل وفلسفة ودراسة هلا لحنا ما رح نقول شو كان زمان كيف كان الحاكم ينزل على ساحة المعركة ويضع الخطط وكيف كان ماسك زمام كل الامور والسبب بسيط انه كان الوضع زمان غير هلا كان عبارة عن توسعة الدولة الفلانية بدها تمد نفوذها للتوسع على المناطق الفلانية يعني لو ما كان الحاكم تفكيره عسكري كان رح يفشل لان الاساس كان هو الحرب

طبعاً عندما قلت ان الحاكم يفشل ان كان عسكري في بداية كلامي وليس بالضرورة معنى الفشل ان يسقط عن الحكم او ان دولته تأول للزوال مع انه هاد احتمال وارد ولحنا شفنا هيك ظاهرة بزمانا هاد بس المقصد انه رح يفشل بتحقيق دوره لان التاريخ سوف يذكره اما مجرم حرب واما حاكم مخلوع او مخدوع او مستنزف لاموال ودماء شعبه اذاً هو لم يحقق الهدف الذي جاء لاجله وهو رفع شأن امته وحفظ الامان والاستقرار والرخاء ومشان هيك لحنا شايفين هالحروبات الكتيرة على كرتنا الارضية
اذاً ممكن يكون دور المرأة اكثر ايجابية ممكن المرأة تحكم لاني لا اجد انها تفتقر للحكمة التي تتطلبها السياسة ما دام هي ما رح تحمل البارودة وتنزل للمعركة

لحنا هلأ من الصبح عم نقول ممكن تنجح الحاكمة ولا مو ممكن تنجح وما سألنا حالنا سؤال هل الحكام الذكور نجحوا ام لم ينجحوا بعدما وصلوا الى كرسي الحكم؟
ولا ارى للنفيسة والفسيولوجية علاقة هنا كما ذكرت من قبل
بالنسبة الي انا مو شايفة انه وصولها للحكم في انتقاص او اعلاء ممكن يكون في تغيير نحو الافضل ما دام يخدم مصلحة الشعب
وانا شخصياً ما بهمني مين يحكم رجل ام امرأة الذي يهمني هو ان احيى بدولة فيها امان واستقرار وهاد الوضع انا عايشة فيه والحمدلله