[The morning]

هاااااااي كيفكون ؟؟
قال هلق نحنا بالكام يوم الأخيرات تبع التصويت لمسابقة البوبز العالمية لأفضل المدونات ، هاي بقا مسابقة البوبز -ليلي ما بتعرفها- صايرة متل تقولي اهم مسابقة بمجال التدوين على النت والمدونات وهيك شغلات و انّو ما بدي طول عليكي بس في بآخر الموضوع كام رابط تبع تاريخ المسابقة و مراحلها وما اليه بتقدري تطلعي عليه عفضاتك .

من الآخر يعني كان في حركة 8000 مدونة مترشحين او بمعنى آخر انقبل ترشيحهم للجائزة وبعدين هلق صار المرحلة الأخيرة فاضل منهم 11 مدونة عن اللغة العربية والتصويت بيخلص ب 24 الشهر المسويات - أي يوم الاثنين المسا - ، اي هلق ال 11 مدونة الي هني بالمرحلة النهائية هني هون صايرين على الرابط هذا :

http://www.thebobs.com/index.php?l=a...847600ZNWAOZCV

بس بإختصار يعني هيك كنبذة سريعة في مدونتين سوريتين بالمرحلة النهائية و هنن :

# 1 : مدونة متابعات عقبة:
للمدون عقبة مشوح و هي مدونة شخصية إعلامية نقدية ثقافية سورية




# 2 : مدونة أمواج اسبانية في فرات الشام:
للمدون ياسين الحسين و الي هو Yass بأخوية مشرف المنبر الحر و امانة المجتمع ، وهي مدونة شخصية ومقالات عامة في اطار حراك المجتمع المدني والحريات العامة




هدول المدونتين السوريتين الوحيدتين بالمسابقة ، (مدونة أمواج اسبانية في فرات الشام حاليا هيي بالمرتبة التانية بنتائج التصويت بتاريخ المقال 21 \ 11\ 2008 ..)

هلق بدنا نصوّت! مافي كلام ..
ما يكون مفكرينا من ضيعة صغيري !!

طبعا تجدر الإشارة انو هاي فرصة مهمـّة لتصوتي وتوصلي صوتك و بمعنى آخر خلي صوتك عالي ومسموع !
شغلة سريعة التصويت يعني شغله تكه و نص مش اكتر ، للتصويت بقا هاي المراحل :

للتصويت للمدونة التي تشاء :

1. بتكبسي الرابط التالي :
   
   رابط التصويت الشعبي في مسابقة ال Bob's العالمية للمدونين و المدونات و من لمّ لمهم ونحا نحوهم
   
   
   http://www.thebobs.com/index.php?l=a...7OMDFOOVR-NONE
   
   
2. بتشاوري ع المدوّنة الي خرطت مشطك دونا عن سواها او بمعنى آخر بتعبر عنك .. (بتشاور على الدويرة الي جنب اسم المدونة - متل ما رح تلاحظي بالصوره أدناه - مش تفقشي على اسم المدونة نفسو و تنزعيلنا الطبخه ! )
   • بمثالنا هنا هي "أمواج اسبانية في فرات الشام" للمدون ياسين الحسين (سوري - مقيم في اسبانيا) والي هوي يا عزيزتي المشرف Yass مشرف المنبر الحر وأمانة المجتمع في أخوية نت
     
     
   • 
     
3. بعدين بتروحي لآآآآحر الصفحة بتعبي الخانات شيت الإسم و الإميل وهيك مسائل و هني :
   

• خانة الإسم (اسمك - عربي انكليزي ما بتفرق) و اللي موضّح مـوقعه بالخانه رقم ( 3 ) بالصوره أدناه
  
• اميلك - الخانه رقم ( 4 ) بالصوره الموضحه
• بتحطي اشارة صح (انو يعني بتشاوري على المربع تبع "لقد قمت بقراءة المكتوب بخط صغير" - الخانه رقم ( 5 ) في الصوره المـوضحه
  
• بعدين في صورة فيها هيك ارقام (هاي كرمال انو انتي بشر من لحم ودم مش انك برنامج او روبوت يعني قصص روتينيّه ) اي بتقري الأرقام الي فيها وبتكتبيهم متل ما هني بالخانة الي جنبها - الخانه رقم ( 6 ) بالـصوره الموضحه
  
• ومن ثم بتتكى على إرســـــــــال _بعزممم_ - الخانه رقم ( 7 )بالصوره الموضحه
  
  
  
  
  

كيف تحطتي لمستك الخاصة على المدوّنة الي عجبتك و خرطت مشطك و رايدي تعطيها صوتك (الحنون)..
* كيفية اضافة تعليق في صفحة المدونة الخاصة على ال bob's :

لكل مدونة مشاركة (من المدونات ال 11 التي وصلت للمرحلة النهائية ) صفحة خاصة بها على TheBob's يعني شغل صفحة فيها صورة للموقع المدونة (لو فقشت عليها بتاخد على المدونة مباشرة) وتحتها شرح مقتضب للمدونة مع التعليقات تبع المصوتين والزوار على المدونة ورأيهم فيها بعبارة او بأخرى

يعني على سبيل المثال (لا الحصر) مدونة ياسو (Yass) صفحتها الخاصة هيي :

http://www.thebobs.com/index.php?l=a...952014IJRMYYKG

(تحت بتلاقي التعليقات تبع الشباب والصبايا على مدونة ياسين) و لتضيفي تعليق _وتقييم خاص_ بتلاقي تحت الصورة هيك في كذا رابط المهم الك انتي بالرابط الي اسمو "تقديم التقييم الخاص" اومباشرة فيكي تضيفي تعليق وتقييم من خلال الرابط التالي :

رابط اضافة تعليق و تقييم خاص تبع مدونة أمواج اسبانية في فرات الشام

http://www.thebobs.com/index.php?w=1...RMYYKG-NEW&p=1

اي و هلئ نفس الموال الإسم (عربي او انكليزي) اميلك ، تقييمك، اذا عندك موقع او مدونة او الذي منو فيكي اتضيفي رابطو (حتى مش ضروري كتير انو موقعك موقعك ممكن مثلا اتضيفي موقع سّتك ، جارتكون ، الإكس بوي فريند .. او بستك اذا بدّك .. و ما اليه .. )
وبعدين بأناملك الـسحريه بتدغدغي الكي بورد بكام كلمة ظريفة بتتغزلي بالشب ، بشبوبيتو بطلتو البهيي بغمازتو- مثلا - (الحكي بسرك..ياسو ترى دونا عن "أقرانه" من المتبارين بالمرحلة النهائية عندو غمازة على خدو شي ووااااو ) ..

بس ملاحظة ما تحطي رقم تلفونك هاي التعليقات بتطلع تاريها على العام ، ببقا ببعتلك ماسنجرو براني بتناغشيه بغير وقت ..

منرجع وين كنا ، بتضيفي تعليقك الظريف على المدونة و بتحرصي انّو يعبّر عن رأيك و من ثمّ بتعبي الارقام بالخانة الي جنبها و بتفقشي على SAVE ..

** الـشرح بالاعلى كان يـُعنى بالمصوتين الصبايا و الجنس اللطيف هلئ في حال كنت شب و حابب تمارس حقّك بالتصويت فبتتبع نفس الخطوات المذكوره أعلاه مع مراعاه تذكير الافعال الموجوده بالنـص كرمال ما يعتبروه تزوير و انتحال شخصيه **

وهيك ..

__________

هامش 1: روابط الها علاقة بالموضوع
http://www.almudawen.net/ar/thebobs.html
http://blog.almudawen.net/?p=11

هامش 2: اذا حابي(وحتى انت اذا حابب) فحركة شيك لو بتنشر الخبرية بأوساطك انو بالمنتديات الي بتتداولها بالمواقع الي بتشاغب فيها وهيك .. المهم هاي الموضوع حقوق النشر فيه حرّة ، يعني فيك تنسخو اذا بدك وتتصرف فيه على راحتك ، (اصلا عيب عليك ما تنسخو و تنشرو بسائر الأصقاع يا زلمي.. اي يعني ما حاجي مستهترين فيك و بصوتك ، هاي بقا فرصتك _لا بجد يعني فرصة_ انك تعبر عن الي بيعبر عنك ، بإنك تصوت ليه و تحث جيرانك و رفقاتك و معارفك و الي بتلعب معون طابي بالشارع و غلال بالحارة و الكوافير اللي بيظبطلك الغرّه و المكيير اللي بيشتغل عالميك اب .. ليختارو من المتسابقين مين بيعبر عنهم و يصوتولو .. فمنيح انك تنشر الموضوع بأوساطك ابو شريك ..منيح لصحتك عرفت كيف..)