[Jilan_joly]

السلام عليكم..كيفكم؟ اليوم حابه إسألكن سؤال وحابه كتير كتير أعرف ردكم..مابعرف اذا كان الموضوع مكرر أو لا بس إذا كان مكرر بيبقي المختص بالحذف يحذفو..المهم كل واحد منا إلو ذكري صعبه مر فيها بحياتو وبيزعل كل ما بيتذكرها ومعظم الأوقات بنبكي علي ذكراها وأحيانا تنغص علينا أوقات حلوه إذا اتذكرناها فيها..أنا شخصيا إلي ذكري..رح إحكيها وإذا ما حابين تقرأوها عدوها وردو علي الموضوع بذكراكم إنتو..زمان وأنا صغيره ما بين 8 أو 9 سنين كان إلي رفيقه إسمها(ساره)كنت بحبها كتير وأنا وهي مولدين بنفس المشفي وأمها رفيقة إمي وأبوها رفيق أبي..وكنا أسرتين مصرتين بالسعوديه مقيمين بجنب بعض وكنت حس إنو هادول أهلي لإنو ما كنت بعرف أهلي وقرايبيني المصريين فكنت أعتبرهم بدالهم و يمكن أعز منهم..المهم أنا وساره كنا بيناتنا شبه كتير كتير كبير وكنا بنحب بعض و نلبس متل بعض و نعمل شعرنا متل بعض و ندرس سوا و ناكل سوا و أحيانا ننام سوا و نروح المدرسه سوا و نقعد مع بعض دائما وكل أغراضنا متشابهه لدرجة كل الناس بلا مبالغه كانو يعتقدو إنو نحنا توأم متماثل و نحنا بس أصدقاء بيحبو بعض حتي انو أحيانا كانت تتشابه أصواتنا وضحكاتنا..وفي يوم ما طلعت شمسه وكنا رايحين علي مصر بالباخره وكنا مبسوطين كتير لإنو فعلا شي رائع إنو تكون بمكان وكل شي حواليك مي و سما وبس..وكنا عم نلعب أنا وهي بعربية مشتروات صغيره..عم ندفعها و نركض وراها نجيبها وفجأه وقعت السياره بالمي من مكان مفتوح كان فيه عملية صيانه وراحت ساره لتجيبها وأنا رايحه معها وفجأه أخري وقعت ساره بصمت أنا بس شفت إيدها وحاولت امسكها وساعدها بس ما لحقت ثواني معدوده واختفت ساره في مياه المحيط الزرقاء..كان وقت صعب كتير وركضت ناديت للركاب وأهلها وأهلي وإجا الغواص و نزل ليجيبها وبعد دقايق طلع بيها جثه هامده..ما صدقت حالي وضليت أصرخ وإبكي لدرجة إنو حسيت حالي أنا السبب ورحت لإرمي حالي عقابا لإلي لانو ما أنقذتها وحاولت كذا مره بس الركاب كانو يمسكوني و وضعو علي حارس شرطه مخصوص مشان ما أهرب وإرمي حالي..بهالباخره كان بدنا نشم هوا و نحس بجمال الطبيعه بس لما هيك صار ما حدا وقف بكي من أهلها ومعظم الركاب وامها ضلت حاضنتها طول الرحله وعم تبكي بحرقه علي بنتها..وأنا طبعا حالتي كانت أصعب من ما تتخيلو و ضليت بعدها فتره طويله فيق بالليل وإصرخ وإبكي واركض بالبيت إبحث عنها وقول أنا السبب أنا السبب ولحد هلا عم إحلم فيها وإتذكرها و إتذكر هاد اليوم البشع..وخلصت الذكري تبعي..معلش طولت ..يالله بدي شوف إنتو شو أسوأ ذكري حدثت بحياتكن..ناطره ردودكم يا ساده يا محترمين.