[VivaSyria]

مع انو كنت مقرر اني ما شارك أبداً بمواضيع لوست مان احساساً مني بانو عندو توجه معين عم يساهم بنشر نوع من الفتنه والشقاق واستثارة المشاكل بس ما قدرت ما علق بهالموضوع:

بدايةً أنا مو ضد بناء جوامع وكنايس ودور عبادة بوذية كمان اذا في ناس حابه تمارس أي نوع من أنواع العباده...بحكم هالشي بيندرج تخت بند حرية ممارسة المعتقدات الدينية...

بس المشكلة الكبيرة متل ما قال فؤاد تكمن بالبهرجة الزايدة لدور العبادة... يعني مو منطقي جامع تنعمل حيطانو فسيفساء وبكلف خيالية... ولا منطقي كنيسة تفوت عليها تحس حالك فايت على معرض لمايكل أنجلو من كتر اللوحات والرسومات والزخارف المكلفة للغاية...

ببساطه الكنايس والجوامع انوجدت لعبادة الله... والله مابيتعامل بالرشاوي فمو كل ما زودنا كلفة دور العباده كل ما الله تقبل صلاوات المصلين أكتر... الفكرة فكرة ممارسة طقوس العبادة بشكل جماعي ومنها اجت كلمة جامع...

وحتى بتصوري الشخصي الله بيرضى أكتر عن تسخير موارد الدول لخدمة الانسان وتثقفه وعلاجه وتحسين مستوى حياته.. بيرضى عن هالشغلات أكتر من رضائه على تبذير الأموال على التريات الكريستال بالجوامع وعلى أجراس الكنائس الدهب...

برجع بقول مو ضد انشاء دور العبادة... بس ضد التبذير المخيف فيها... هالأموال من الأولى تنصرف على شغلات تانيه...