اقتباس:
كاتب النص الأصلي : hashtnasht
جميل الموضوع ..مع اني ما بحب المدونات يعني بس انو بتضل المدونات أمر واقع يعني  ...عندي بس هيك شغلة بخصوص التشبيك ...انو الاساليب اللي حكا عنها ياس بخصوص انو كيف تخلي الناس تسبك لمدونتك مزبوطة 100% بس هي صعبة و بتاخد وقت ..و بتضل ضمن حلقة معينة ما عم تقدر تطلع براتها ...ببلاد الغرب الكافر عندن حلول قوية لموضوع الانتشار ..و هي عن طريق مواقع شغلتها هالشغلة..يعني الموقع بحد ذاتو ما عندو محتوى ..و انما المحتوى هو الشي اللي بيربطو الزائر من موقع تاني ..و بعدين بصير في خيارات للقراء مشان يقيموا هالموضوع و يناقشوه ...بهيك نوع من المواقع بصير الزائر مانو مضطر يروح يفتل ع المجونات ليعرف شو في اخبار جديدة أو كوول أو حركات ..بكفي انو يفتح موقع واحد و بيعرف شو عم يصير حواليه ..و انو الناس بشو مشلوشة اليوم ..اهم هالمواقع هو digg.com و هو تقريبا اول موقع بلش بهالقصص ..و بعدين صار كتير مواقع بتقدم خدمات مشابهة...منها الفيس بوك FACEBOOK.COM و del.icio.us و reddit.com و غيرها كتير...كتير يعني ..عن طريق هي المواقع صار سهل انك تتابع كل المدونات و المواقع الديناميكية بدون استثناء ..و مع الايام بتصير تعرف اي مدونة عم تجيب اخبار او مواضيع بتهمك...انو مثلا مبارح شفت خبر عن نانسي عجرم بهي المدونة..و اليوم رجعت فتحت ع ال digg و لقيت خبر عن جيجي لامارا ..بنفس الدونة..معناتا هي المدونة ظريفة ...هيك يعني !
ع الصعيد العربي مافي نضوج لهالموضوع ...ما بعرف شو الاسباب يعني ..بس بدها دراسة نفسية عميقة..انا هيك قناعتي الشغلة نفسية الله وكيلكن ..لانو على الارض بعرف عدة محاولات لتغطية دور هالمواقع و غير ناجحة..و سبب عدم نجاحا خارج عنها...المثال على هالشي هو موقع ضربت اللي بلش من سنة تقريبا بدون اي تفاعل يذكر مع الموقع www.darabet.com مع انو هو تماماً اخد وظيفة digg.com و حتى انو جماعة ال digg.com ما عجبهن كتير هالشي شوفو هون :
http://digg.com/odd_stuff/Darabet_Ar...Digg_Like_Site
هلأ انا برجح يعني..بس ماني متأكد...برجح نظرية أنو المدونين العرب بطريقة ما يعني ..عندن رغبة لعرض أرائهن ع الاخر ...باتجاه واحد...يعني هني ما عم يشاركوا افكارهن..اكتر ما أنو عم يحاولوا يعرضوا و يروجوا أفكارهن...و الله اعلم يعني |
حيو أب نهلة!!
خيو ردي من شقين.. الشق الأول بخصوص المواقع هدول اللي عم تحكي عنها...
بعتقد انهون ظراف و هيك و كل شي بدك ياه.. بس بيزكروني بالراديوهات تبع الأف أم... انو أغلب الأحيان, الموسيقى التقيلة ما تسمعا فيها.. و لذلك ما بحبون و لا بستخدمهو, بحب استخدم الطريقة الكلاسيكية (تاخد وقت, ما اختلفنا, و بدها مراق.. بس بعتقد انو متعة التدوين جاية فيها) ..
السلبي التاني بهالمواقع انو متل ما تفضلت, بيجيبلك تاغز الشغلات اللي بدك ياها بشكل نقطي.. انو ما بتبحبش و "تتسكع" تدوينيا.. و هاي يعني بشكل شخصي بشوفا متعة..عدا عن انو الفائدة الحقيقة تكمن بانو تشوف اللي بدك ياه و اللي ما بدك ياه (كنظرة موضوعية أكبر)
ما بعرف اذا قدرت وضّح شي لأنو حاسس فسرت الماء بعد الجهد بالماء
الشق التاني و هو التدوين العربي...
المدوّن العربي, بشكل عام, يكتب و لا يقرأ...متل ما قلت, حابب يعرض فكرو باتجاه واحد.. لكن بعتقد انو اجتماعيا و سياسيا هاد أمر طبيعي.. المدوّن العربي هو انسان مكبوت.. فانو لقى طريقة يكتب فيها ع مراقو.. فطبيعي تمضي فترة منيحة بتلاقيه بيحكي و بيحكي و بيحكي.. بدون التفات انو غيرو كمان عم يحكي و يحكي و يحكي.. و بالنهاية يكون الأمر حوار طرشان..
لكن هاي مرحلة و تمر, ان كان على صعيد المدوّن الفرد, أو على صعيد التدوين كظاهرة.. التدوين العربي في بداياته, و فيو أخطاء مبتدئ (ماعم قول هالحكي لأني متمرس.. بس لأنو أنا بشوف عالم تدويني ناضج و هو التدوين الاسباني -تخيلو قديه كبير.. كل أميركا الجنوبية و اسبانيا- و بعمل مقارنات, أو بالأحرى مو مقارنات, انما هيك نظرة شمولية) و تلاقي انو المدون الجديد يعمل نفس الشي و يكرر نفس الأخطاء بأي دولة.. انو يفتح المدونة و ينزّل كل شي محفوظ عندو مكتوب و يقعد ينطر انو تعو اقرولي.. طيب انت بتقرا للناس لحتى الناس يقرولك؟
مع ذلك... التدوين العربي بعتقد انو واعد... في أقلام كتيرة بدها تشجيع, و متابعة... و التشبيك الكلاسيكي هيي برأيي أفضل طريقة للتشجيع و المتابعة (انو وصلتلك من مدونة فلان لأنو فلان كتب عنك انو و الله منزّل مقالة حلوة عن قهوة الروضة, و جيت شوف حكيو و طلع صح.. يالله خلص من هون و رايح بدي اجيك كل نهار. و انت كمان زورنا ها) .. و هيك
عندي طريقة لتفادي هالأمر ما بعرف ازا بتنفع للناس.. و هي انو ما بحط تدوينة بمدونتي قبل ما اقرا 5-10 تدوينات جديدة.. لناس من خارج دائرة اصدقائي (و حتى شي ملهم يعني.. لأنك تشوف شغلات يجوز تخلي يخطر ببالك أمور ما كنت مفكر فيها.. و هيك)
مع الاعتذار للاطالة
