[yass]

الجزء الثالث: شوية نصائح و أخطاء لازم نتفاداها اذا ناويين نكون مدونين ناجحين (1)

بما يخص الديكور و الاكسسوارات:

- في فرق بين غرفتك بالبيت و غرفة أوتيل.. غرفة الأوتيل نظيفة و جديدة و عين ألله عليها خرج تطلع بغلاف مجلة..لكن ما فيها لمحة شخصية.. مافيها لمسة منك يعني..و غرفتك يكون التخت مجعلك و فوقو كوام تياب, و طاولتك مليانة كتب و وراق و ضو الطاولة (الفلكس) ملزوق بشرطيطون و اللمبة تتلولح, و تحت الطاولة في ورقتين من شدة قديمة واقعين و ما سخيان تكبهون عالزبالة لا يكون يلزمو بعدين.. تمشي و تلاقي قنادرك- الله يعز- مبعثرة عالأراضي و الباب ما بيسكّر منيح و بدك تحط محرمة بالشق لحتى يطبق منيح.. بس يا أخي غرفتك هاي... فيها شخصيتك يعني... عرفت المدونة شلون لازم تكون؟ قصدي انو لازم يكون في لمسة شخصية حتى لو ما كانت هاللمسة غرافيك ديزاين و شغلات حرّيفة ... لأ يوب.. عالخفيف و على قد حالنا, بس عطيها لمسة شخصية...

- لا تكتّر اكسسوارات غير ضرورية, لا تحوّل المدونة إلى سيارة تكسي مليانة شغلات أبتنفع.. حط قصص مفيدة (بلوغ رول, عدّاد أنيق, شوية روابط -منحكي بالروابط بعدين-.. هيك أمور) يعني ما ضروري تحط الأبكليكيشن اللي تعطيك درجة حرارة نيودلهي متل هالوقت السنة الماضية و بالفهرنهايت و السلزيوس.. ما ضروري يعني

- الروابط اللي تحطها.. يا حبيب كلو بيعرف شو رابط البي بي سي, و شو رابط الجزيرة... ما محتاجين يفوتو ع مدونتك ليعرفو كيف بيدخلو.. لا تكتّر روابط.. و يفضّل ترتبهون بين مدونات أصدقائك و المدونات اللي تزورها و تزورك (منحكي بهالأمر بنقطة التشبيك) و بقسم تاني تحط منتدياتك و هالمواقع الظريفة اللي ما معروفة كتير مثلا و انت تعتقد انو حلو تحط روابطها و تكون تتناسب مع الجو العام لمدونتك..


بما يخص النشر و المواد المنشورة:

- حبيب قلبي ... سمعت صار شي و بدك تعرف شو هوي.. بتفتح مدونة رفيقك لتعرفو؟ لأ .. بتفتح الجزيرة نت.. لذلك حبيب المدونة مانها موقع اخباري.. لا تنقل أخبار يعني...

- لا تكتّر نقل مواد أو مقالات.... و للا قلك؟ لا تنقل طاول بنوب .. بيكون أحسن.. المدون المحترم ما بينشر الا شغل ايدو.. و اذا مش ولا بد عجبك شي جدا جدا فافتح مقال جديد و اكتب رابطو و شرح عنو (باسلوبك) و شو عجبك و ليش عجبك.. يعني مو تكبس المقالة و تتم ماشي (في كمان خيار حلو بيستعملوه الشباب أحيانا.. انو بالقائمة تبعيت مدونتك تفتح قسم اسمو مختارات و تحط فيه لينكات لمقالات أو مواضيع من مواقع أخرى)

- المدونة هي شي شخصي.. لذلك كل ما كان الشغل تبعك شخصي كل ما كانت ناجحة أكتر..

- لا تكتب لمجرد الكتابة و التحديث... و لا تلتزم بشي مانو من اهتمامك لمجرد انو (ماشي سوقو).. يعني انت احكي بشو ما بدك.. بشو جاي ع خاطرك تحكي.. و النت شاسع واسع و راح توصل لحدا مشترك معك بهالشي (هالحكي خصوصا للمدونين العرب... اللي محتكرين شغلتين: سياسة و دين) .. بتكتب خواطر معناتو حط خواطر, تكتب شعر حط شعر.. تكتب قصص تقنية حط قصص تقنية.. بتحب تكتب يوميات و رؤية هيك للحياة حط... بتحب الموسيقى اكتب عن الموسيقى, بتحب الرياضة اكتب عن الرياضة ..و لا تحط لحالك معيار للابتذال.. كل شي مهما كان تافه.. اذا طالع من ابداعك و عاجبك فانشرو و لا تستحي.. هاي مدونتك و انت أمين التحرير و المحرر و انت الكل بالكل, و اللي ما عاجبو لا يفوت يقرا

و ما حدا قال انو المدونة لازم تكون تخصصية.. لذلك لا تجبر حالك على قالب من المواضيع أو المواد.. اكتب عن اللي جاي بمراقك.. و كيف ما جاي بمراقك (شب مدون كاتب من يومين انو لبس البنطلون و طلع بقلبو صرصور.. انو تسالي.. لأنو حاكي القصة تقول سسبنس عالآخر و حبكت معو تسالي... و هو شب بالعادة يكتب خواطر جادة و مقالات جدية يعني..)

- حاول تكون دوري نوعا ما بالكتابة و متوازن فيها .. يعني لا تحط أربع اضافات جديدة بيوم و تروح تطس اسبوعين.. انما حاول تكون منظم و التراتب يكون واحد (تقريبا) و ازا عندك كتير مواد ففيك تبرمج نشرها (تحطها بالمدونة و تبرمج النشر و هي تنشرلك ياهون باليوم و الساعة اللي بدك ياهون كل وحدة) .. يعني فيك تحط مواد احتياط تخليهون عندك لوقت تنشغل (يعني ازا عدت فترة عم تكتب كتير فـ خبّي قرشك الأبيض ليومك الأسود) .. و كنصيحة شخصية ما بنصح حدا ينشر أكتر من مادة باليوم..

- استخدم التاغز أو السمات لترتيب موادك حسب نوعها (يوميات, سياسة, رياضة, خواطر.. الخ)..

-اللغة دائما ضروري تكون مزبوطة و صحيحة.. لكن مافي داعي تكون متكلّفة و تقيلة دم.. كتوب ع راحتك, و اذا مافيك الا ما تكتب كم جملة بالعامية حطهون و لا تخجل.. تعطي مدونتك لمسة قرب و شبابلك كتير.. المهم تكون مرتاح يا بوبو العين

- مو ضروري تلزم حالك بانو اذا مو طالع معك مقال عليه العين ما تكتب.. يعني في ناس ما بتحط الا مقاطع صغيرة.. تعليق صغير يجوز على شيء ما .. سطرين و تم ماشي.. بس انو يكونو طالعين من صماصيم قلبو .. بيسوو كتب.. مو بس مقالات


منكمّل لاحقا