[Abu ToNi]

مرحبا بو طوني و متأسف على التأخير ...

اهلين زيد .. وعلى قولة المتل ان تصل متأخرا .... بتعرف البقية

يمكن صار كثير نقاش في أخوية عن هذا الموضوع ..

انا بشوف العكس ما صار بالأخوية ابدا نقاش حول هاد الموضوع اللي صار اقرب ما يمكن لصراع الديوك
كان كل شخص فيه عبحاول يعلّم على التاني ويركب نقطة على مبدا ( 1 - 0 ) وعلى الأقل لو كان صار شي اسمه نقاش كنا طلعنا بشي اسمه نتيجة وبعتقد ولا مرة صار وحكينا بالقصة الا وانتهت القضية بموضوع مغلق لهيك انا شخصيا كتير بتشكرك على فتح باب المجال للحديث او بالأحرى لسماع راي شخص نزّل بيوم من الايام موضوع بالاخوية اسمه " الفن العاري "

* ما هي نظرتك للفن و هل تعتقد انت عندك موهبة ؟؟

اول جزء من السؤال اذا بدي ابدا فيه بيلزمني ساعات وساعات بعكس الجزء الثاني منه " هل عندك موهبة (( فنية )) " اللي جوابه بينحصر ب
" لا ما عندي اية مواهب فنية واضحة بمجال الرسم والتصوير وتوابعهما "
فكون ما عندي اي قدرة او ما عندي اي موهبة فنية ... هاد يمكن يعتبر نقطة سودا عليّ نقطة ما بتخولني احكي كتير عن الفن كشخص ذو خبرة او كشخص من اهل ال " كار "
لكن كشخص ابو طوني كتير عندي اهتمامات بمعنى الاهتمام الكامل بشي اسمه فن او بالأخرى بشي اسمه " لوحات وتماثيل "على وجه الخصوص
كابي بحب الفن كابي بقدر الفن كابي بيستمتع بالوقت اللي عبيقضيه عبتأمل الأعمال الفنية
هاد بالنسبة لشو هوي الفن بالنسبة لكابي
اما شو هوي الفن بنظري ، الشخص الفنان هوي كل شخص قادر على انه يمتّع العالم بالشي اللي عبيعمله بحياته ، هوي كل شخص عنده لمسة الابداع بجسدها على ارض الواقع من خلال شيء ملموس او لوحة مرئية

بنظري كلمة فنان غير محصورة بشخصية الرسام او النحات بذكر بهاد الخصوص شعار لفريق الجلاء منقول فيه لميشو معدنلي " ميشو فنان مدوخ اهل الشام "
الشي اللي بدي اقوله انه الفن عبارة عن لمسة ، عبارة عن ابداع عبارة عن رقي
والفن بمجال الرسم والتصوير بنظري من اجمل الفنون اللي ممكن الواحد يتأمل فيها ويقدّر جماليتا وتفاصيلا .

* هل تؤمن بالفن العاري له (رسالة) ... كسائر الفنون ؟؟

كون الفن العاري بحد ذاته " فن " فهو بالتالي شي راقي بيحمل معاني وافكار رائعة وعميقة وبالتالي رسالته هية نفسا راسلة الفن بدون وجود اي اختلاف بيناتن

اما كونه " كسائر الفنون " انا شخصيا بشوفه يفوق بقية الفنون باشواط بنواحي .. وبنفس الوقت بيتخلف عليها باشواط بنواحي تانية ..
اللي بيتطلع على الافكار المعبر عنها عن طريق الجسد واللي بتم تمثيلها باعمال فنية فيه يعرف انا شو بقصد
كانسان بتابع للفن ، كتير من الاوقات بتحس بمعاناة الفنان او بالاحرى بجهود خارقة باذلها الفنان لمحاولة ايصال فكرة او محاولة تجسيد واقع بالوقت اللي ممكن فيه الجسد بكينونته يعبر عن الفكرة بكل بساطة وعفوية
وموضوع الفن العاري اللي انا عاملة كان هدفه توضيح هي الفكرة واظهار فكرة ان الجسد العاري مش بس اعضاء تناسلية الجسد اكتر بكتير من " الجنس " لكن للاسف دائما منأسقط من الاعمال الفنية اللي بتندرج تحت هاد المجال تفاصيلها الواضحة وافكارها المراد التعبير عنها ومنبحث عن الاعضاء التناسلية وبالتالي منفقد جزء كتير كبير او بالاحرى منفقد كل الهدف اللي من اجله تم خلق الفن العاري .

* تعتقد انه حوى بعض الاعمال غير الجيدة نوعا ما و على اساس تقيّم جودة العمل ؟؟

بالتأكيد حوى اعمال غير جيدة
باحد المقالات اللي انا ناقلها من باب التثقيف بموضوع الفن العاري كانت بتحكي عن شو هوية مفهوم الفن العاري ، كان في جملة معناها كالتالي :

كتير من الاحيان بيصعب على اكبر الفنانين التجرد من العري والاهتمام بالفن

فالفن العاري بحد ذاته كفكرة للتعبير مش سهل انك تستخدمه للتعبير عن فكرتك الا اذا كنت واصل لمراحل كتير متقدمة وكتير متطورة من الاحتراف الفني ، لمرحلة بتخليك تقدر تتجرد من العري وتهتم فيه بمعاني الفن الاساسية
لهيك كفن عاري انا بشوف ما كل واحد بيقدر يقدم اعمال جيدة بهاد المجال

لهيك في مجموعة من الاعمال انا كابو طوني ما كتير بقدرها لأن بحس فيها استهلاك للعري على حساب الفن الشي اللي ممكن يندرج بشكل " فن رديء "

كمان ما بدنا ننسى انه باعتباره فن كبقية الفنون فيه الشي الحلو والمعبر بطرق مميزة وفيه الشي السطحي المعبر عنه بطريقة تقليدية سخيفة
وبالتالي بالتاكيد في كتير اعمال سخيفة ودون المستوى مُقدمة تحت اطار الفن العاري تماما متل بقية الفنون التصويرية اللي بتلاقي فيها اعمال دون المستوى المطلوب .

* تعتقد ممكن في العالم العربي ينقبل هذا الفن كفن له رسالة ؟؟

آخ يا ابو سارة .. حطيت ايدك على الجرح
انا شخصيا كتير متشائم من هي النقطة
بعيد عن الفن
الانسان العربي لازمه اعادة تأهيل بكتير من القصص اولها الجسد ومكانة الجسد بيجي بعدا تقديره للفن
برأي الانسان العربي عنده كتير نقص وكتير فراغات بموضوع الجسد بحد ذاته كجسد هي اذا اهملنا فكرة تقدير الفن كفن واعطاء مكانة للفنانين وبكل بساطة بتقدر تلاقي كيف انه اجتماعيا الفنان يعتبر من اسؤا المهن اللي ممكن واحد يزاولها " على قولة اهلي الفن والرياضة شغلتين باوروبا من اعظم المجالات ببلدنا ما بتطعمي خبرة "

فعربيا
لازم بالاول يكون الانسان مؤهل لتقبل الفن ورسالة الفن بشكل عام حتى يقدر يتقبل الفن العاري ورسالته بشكل خلص .

فجوابي : لا عربيا مش قادرين يتقبوا هذا الفن لا كفن ولا كرسالة طالما عبتم ادراج اعماله تحت باب " المواد الجنسية " وادراج رواده تحت باب " قليلين الحيى والفاسقين "
وببعض الدول العربية عبيدرجوا رواده وعظمائه تحت باب الكفرة