[Abu ToNi]

علتان واضعا ضماضا على عينه
فلان ( يطمئن على علتان ): شبك ..؟!شوفي ..؟! هاي .. ارجيني .. افففف .. وين خابط وجّك ؟!
علتان : مو خابطة .. آكل بوكس على عيني
فلان : ها .. ومع مين متخانق ؟!
علتان : انا ومحمود ..
فلان : مشان شو ؟!
علتان : شغلة .. هيك ..
فلان : شغلة شو ؟!
علتان : مشانك ..
فلان ( متعجبا ): مشاني انا !!
علتان : اي ..
فلان : ليش انا شو دخلني بالموضوع ؟!
علتان : خلص خيو .. مرّقا ..
فلان : لا مارح مرقا .. بدي اعرف
علتان : بصراحة .. حكى عليك ..
فلان ( منصدما ): حكى عليّ !!
علتان : اي ...
فلان : شو حكى !!
علتان : تسؤ .. خلص خيّو .. مضت .. راحت
فلان ( بعصبية ):لأ ما مضت وما راحت .. بدي اعرف هلق شو حكى عليّ
علتان : حكى عليك كلام ما بيسوى .. يعني .. بصراحة خايق قولك تقوم ترتكب جريمة ..
فلان : اخي مارح ارتكب جريمة .. بس قول لي شو حكى عليّ
علتان : لك اخي كنا قاعدين بالقهوة .. مدري مين جاب سيرتك .. هيك بالصدفة .. بس .. خلص بلاها عنجد عنجد بلاها
فلان : لك خلصني بقى احكي .. شو قال عنّي محمود ؟!
علتان : اي ما خلّى عليك ستر مغطا اتهمك انّك .. شريف .. وشجاع .. وآدمي .. بس انا ما سكتت له .. قلت له خسئت .. وفشرت بنص عينك الرجال .. جبان ..وحرامي .. وازعر وقليل ادب ..
فلان : اي انت اللي بدك قواص .. مو محمود ..
علتان : ليش ؟! .. لأني دافعت عنّك !!
فلان : شلون دافعت عنّي ؟! كيف عما تقول اني حرامي ؟! .. شو سرقت لحتى عم تقول اني حرامي !؟!
علتان : اعوذ بالله .. عم قول عنك حرامي لاني بعرف انك ما سرقت ..
فلان : والله ما فهمت عليك !! يعني كيف ما سرقت .. وحرامي !!
علتان : طبعا ماراح تفهم .. لأنك ما عبتابع شو اللي عبصير بالعالم ..
فلان : ليش شو عما يصير !؟
علتان : اي تغيّرت المصطلحات بالعالم ..
فلان : مصطلحات شو !؟
علتان : كل المصطلحات .. الاحتلال صار تحرير .. والمقاومة صارت ارهاب .. كلّه قلب بالعكس .. هلق هلق .. اذا بدك تسب واحد بتقول له .. يا آدمي .. واذا بدك تمدحه بتقول له .. يا حقير
فلان : العمى انا شو متخلّف .. ما عما تابع تطورات الامور بنوب ..
علتان : تسؤ تسؤ .. لازم اتابع .. مشان ما تغلط مع العالم ..
فلان : آخ ..اخي .. بخصوص محمود .. الحقيقة انا بشكرك على سفالتك معي ..
علتان : ولو .. هادا واجبنا يا تافه ..
فلان ( يهمّ بالخروج ) : يا الله بالأذن ...
علتان : وين ؟!
فلان : بدي روح لعند هاد الزلمة ..وفرجيه قيمته .. لكن انا .. يقول عني شريف !! هال آدمي انت الآدمي !! ...هال اخلاقي .. هال فهيم هال مربى هال مؤدب .. انا !!

الفيديو