[Abu ToNi]

فلان ( يتصفح الجريدة )
علتان ( مستفسرا ):دخلك بدي اسئلك ..
فلان ( يتابع تصفحه بدون اهتمام بعلتان ): سآل ..
علتان : ممكن تقول لي شو يعني حقوق المواطن وواجباته !!؟!
فلان : بدك ياني اشرحلك ياها يعني ؟!؟!
علتان : اذا تكرّمت ..
فلان ( يرمي الجريدة على الطاولة ) : يا سيدي اولا ... من واجبات المواطن احترام القانون
علتان ( محدثا نفسه ):ايه .. اي ضروري ... ضروري المواطن يحترم القانون ..
( محدثا فلان ) بس هيك !!
فلان : لك لا .. استنى عليّ شوي .. ومن واجبات المواطن .. انه يحترم قرارات الحكومة وينفذها كمان ..
علتان : اي .. اي ضروري .. ضروري .. لأن الحكومة بتعرض شو لازم يصير وشو لازم ما يصير ..
فلان : وكمان من واجبات المواطن .. الحفاظ على نظافة مدينته
علتان : اي .. اي ضروري .. لأنو النظافة حضارة .. ولا تنسى .. مشان السياحة
فلان ( يتلفّت حوله ويشير إلى علتان للاقتراب للهمس في اذنه ) : ومن واجباته ايضا .. يخبّر الاجهزة المختصّة .. عن كل المسيئين والمشاغبين والفوضويين والارهابيين والنقاقين والعلاكين ..
علتان : طبيعي .. لكن شلون بدها تكشفون ؟! ..يعني تعيّن لكل مواطن مُخبر ؟!
فلان ( يعود إلى وضعيته الطبيعية في الجلوس ): ومن واجبات المواطن ان ينجب اولاد نجباء .. لكي تكبر هذه الأمّة باولادها ..
علتان : اي طبعا ضروري .. ضروري نسبق اعدائنا بعدد السكان لحتى نتغلب عليهم ..
فلان : ومن واجب المواطن .. مشاركة الدولة .. بكل افراحها .. واتراحها ..
علتان : لك اي طبيعي .. يعني اذا نحن ما وقفنا بجانب حكوماتنا بمحبة في افراحها واتراحها مين بده يوقف ؟!
فلان : وكمان في شغلة مهمة كتير ..
علتان ( باهتمام ): شو هية ؟!
فلان : وانه يشتغل اكتر من استطاعته .. من دون شكوى او تذمّر ..
علتان : يا اخي الشكوى لغير الله مذلّة .. بعدين في احلى من الشغل ؟! ..
فلان : ومن اهم واجبات المواطن .. انه ما يعمل هيكي .. اضرابات وشوشرة ويعارض الحكومة على الطالعة والنازلة ويشاغب عليها
علتان : اي معلوم .. الحكومة بدها هدوء لحتى تعرف تشتغل بدون وجع راس ..
فلان : هي على كل حال .. هيك موجز سريع .. على عُجالة لبعض واجبات المواطن .. لأن القائمة تطول جدا .. فهمتا !؟!؟
علتان : اي فهمتا .. الله يعطيك العافية .. كمّل ..
فلان ( متعجبا ) : شو بدّي كمّل ؟!!؟
علتان :يعني انت شرحتلي شو واجبات المواطن .. بس ما بدك تشرح لي شو معناتا حقوق المواطن ؟!
فلان : شو ؟! غقوق المواطن ؟!
علتان : اي حقوق المواطن .. شبنا ؟!
فلان : بفكر فيا .. والله انا ماني سمعان بهي شو .. غقوق ؟!
علتان : ح ..ح.. حقوق ..
فلان : حقوق !!
علتان : المواطن ..
فلان : بسألك .. بشوف شي مرجع .. اهل العلم .. اهل الحكمة .. اهل المعرفة .. حقوق !!



الفيديو