[قرصان الأدرياتيك]

sona78

سلامات قرصان
هي قبل ما تنتهي المعركة كان في حدا بدو يدحش حالو
لهيك طولها لسا شوي

المعركة ما انتهت، بس معارك مبارحة خلصتن قبل ما فوت نام... ونمت متل هداك الصرصور يللي تقاتل مع أم أربع وأربعين وما بقى يعرف الكفّ من وين يجيه... مقتول وطب! اليوم متل ما عم شوف هي مجرّد مناوشات لسّا ما صار اشتباك حقيقي!!!
أهلين فيكِ .

ليش اخترت اتكون قرصان؟؟ ما رئيس جمهورية ديكتاتوري مثلا؟؟

هلا إذا عملتيلك شي قراءة سريعة شغل عشر ساعات رح تشوفي الجواب... عم أمزح . اخترت هالشي بحكم مكاني يللي كنت فيه وبحكم حياتي يللي مو مبيّن لسّا راسا من عقبها. ما عندي مكان ثابت بحياتي ضلني فيه! عطول لازم سوح وجول... وما اخترت كون رئيس جمهوريّة ديكتاتوري لأسباب كتيرة أنّو ما بحب عيش طول عمري خايف ومرعوب ومحصّن وما فيّ شارك البشر متل ما عم تعيش... وبعد كل شي بروح اغتيال ناهيك عن المسبّات والشتايم والدعوات يللي رح تنهال عليّ ليل نهار وإلا ما ربنا يستجيب وحدة منن!!!

ليش كنت تكتب التعليقات بالفصحى الكاملة

هيك تعوّدت بحياتي وهيك كنت حسّ إنّي عبّر عن حالي أكتر... وحتّى هيك أكتب رسائل البريد الإلكتروني لمين ما كان... قريب أو غريب! ولسبب أخير حابب أذكرو يللي هوّ أنّو مشاركة الآخر كل شي باللغة المكتوبة مو المحكيّة بيصقل فينا موهبة التعبير والكتابة، ولمّا نحتاج حقيقةً أنّو نكتب شي معيّن بتعبير سليم معنى ومبنى رح نكون مستعدّين وقتها لهالشي مو خايفين من كلمة إذا أجت بمحلا ولا لأ!


ليش هون بطلت هالشغلة؟؟ كنت ناطرة محاضرة تقوية للغتي العربية

هون لأنّا متل ما قالت وشم الجمال رحلة داخل الذّات وما بدّي خلي أي عائق بين السائل والمجيب وإذا لاحظتِ مو بس هون... بلشت أكتب باللهجة بكتير محلات ولو لساتني عم أتضايق، بس الآخر هو الأهمّ هلا مو أنا... وخاصّة لما كون قادر أعمل هالشي بغضّ النّظر عن انزعاجي أو عدمه.



واخيرا وليس اخرا شو قصة الهمزة معك

هلا أنا كتير كنت دقّق عالإملاء وبما أنّو الشعب العربي بكل جملة بيخطيلو ستلاف غلط مع الهمزة فأكيد رح أذكر هالشي مع العلم أنّو الخطأ بالهمزة هو خطأ مزدوج إملائي ونحوي بنفس الوقت كون الهمزة حرف معتبر!!!
بس غالباً ما كون عم أمزح ولمجرّد الدعابة إلا اللهمّ بالمواضيع الأدبيّة يللي بحب نحوّلها شوي لجدية أكتر... يعني الكتابة مو بس للغة، كمان للمعنى، ولهلا محدا عم يشفي غليلي بالجواب عن معنى يللي عم يكتبو غير اللامنتمي لأن الكلمة بتطلع من قلبو وألها مكان عالسطر... مو مجرّد كتابة.
وإذا تابعتِ هالشي كتير كنت أسأل عالمعاني وبطريقة كتير تفسيريّة بس الغالبيّة صدّوني والبعض خافو يعطو تفاسير... إلخ.
عكل حال الهمزة متلا متل غيرا وما في شي خاصّ غير اللي ذكرتو!

وميت همزة... عفواً... ميت وردة ألك .