[قرصان الأدرياتيك]

وشم الجمال

اول شي ميرسي الك كلك زوق والله بس يعني الكل بنزعج من القلي بس شكلك قدها

أنتِ الزوق بكلامك اللطيف...

(1)
غادة السمان: بسمع عنها كتير بس ما قريتلها ولا شي.

حنا مينا من الروائيّين المفضلين لدي... أوّل شي لقرب الثقافة كونّا أبناء بلد واحد، وتاني شي محبتو الكبيرة للبحر، وتالت شي مجاهد بكل معنى الكلمة. لغتو كتير قريبة من القلب والفهم... وبس تمسك الرّواية مستحيل تبعّد عنها أكتر من كام ساعة، بتحسّ بشوق ألها. عيبو بالنسبة ألي أنّو عندو تكرار كتير في مواضيع الرّوايات، وإذا ما فيّ سميه تكرار فخلينا نقول تشابه كبير.

واسيني الاعرج أوّل مرّة بسمع باسمو!


ميخائيل نعيمة بيحكوا عنّو كتير بكل مكان... قريتلو شغلة وحدة بس وهيّ المقدّمة اللي عملا لمؤلفات جبران باللغة العربيّة يللي انطبعت لأوّل مرّة. بالفعل مقدّمة كافية ووافية لتختزل صديقو الراحل. غير الأدب يللي فيها الحس النقدي والقراءة الذكيّة. عيبو فيها أنّو التركيب عندو منحوت من صخر، يعني في جهد ليطالع اللي عندو على عكس التالي.

جبران خليل جبران هون لازم أركع... جبران بكتاباتو الرمزيّة طبع مرحلة مراهقتي كلا بحكم أنّو قريت أعمالو بكير كتير. قريت كل مؤلفاتو العربيّة والمعرّبة والرسائل والنصوص من هون وهون. وفي أقسام قريتها أكتر من مرّة. كنت أشعر معو وحب معو وأكره معو. كان داخل بكياني كلّو لدرجة أنّو لما انتهيت من قراءة الأجنحة المتكسرة حلفت يمين أنّو لما روح على لبنان لحط الورد على قبر يللي حبّا متل ما طلب بآخر هالكتاب. حبيبتو كان اسما في الحقيقة حلا الضاهر ورحت ودورت كتير وسألت أنّو حدا يعرف وين... يا خسارة! بس لسّا ما يأست!!! لغتو تنساب بالعقل متل دوبان العسل بالتم. عيبو أنّو السوداويّة مليانة بأفكارو... وعندو بعض الأفكار ما بتّفق فيها معو! حياتو المعذبة ووفاة عيلتو واحد ورا التاني قتلوه لجبران فصار مدخّن بشراهة وشريب قهوة لا يكل ولا يملّ. السنة الماضية رحت على بشرّي بس كرمالو وزرت البيت والمتحف الخاصين فيه... جبران مالأشخاص يللي أثروا بحياتي بشكل كبير.

المنفلوطي قريتلّو ترجمتو لبول وفرجيني. لغتو قويّة وجزلة. حاول يطبّق القديم عالحديث بس ما نجح وطلع معو شي مختلف تماماً عن القديم وعن الجديد وعن اللي كان يريدو... هالشي المختلف كان مميّز لينحكى عن أدب المنفلوطي.

احلام مستغانمي كمان ما قريتلها ولا شي.

باولو كويلهو ما قريتلو شي.

(2)
شو اكتر منظر بتحبو؟ البحر بكلّ الأوقات.

عمرك حسيت بانو الدنيا ضيقة وحابب تغادرها؟متى وليش؟ إي كتير مرّات بسبب ضغط الحياة والدرس والشغل ولازم لحق عكل شي ويلعن دين هالعيشة!!! . بيجيني هالإحساس بلحظات فشلي وخاصّة لما أدوّر على شغل وما بلقى... أو لمّا أرسب بشي امتحان... أو لمّا بكون مطالب بعمل وبيطلع معي شغل هات إيدك والحقني... هيك ساعات بكره حالي والحياة بنفس الدرجة وبحب قوّص التنين ما فين .

الغروب والشروق شو وقعهم على نفسك؟ الغروب أكتر بكتير من الشروق... يمكن لأنّو مرتبط بالموت على عكس الشروق المرتبط بالحياة... أو لأنّو غالباً لما بحضر الشّروق بيكون خلّصت الدرس والشغل وتعبان وبفوت حط راسي ونام، بينما وقت الغروب بكون بعزّ النشاط. بيقع على نفسي متل ما تقع الفراشة على الوردة وتشرب منّا الرّحيق.

بتحب تكتب؟عمرك جربت تكتب؟ وشو صار؟ إي بحب أكتب وكتير كمان وبكل مكان. إي جرّبت أكتب لحالي وللمجلات لما كنت صغير... هاي يا ستّي وشومة أنا صغير كنت أكره إسرائيل كره العمى، يعني هلا ما بحبّا بس موقفي منها تغيّر وانتقل من صعيد المشاعر لصعيد العقل. فكتبتلك مقالة من نصف صفحة (كنت بالإعداديّة على ما أتذكّر) ما خلّيت شي عليها وبعتا لمجلة الكفاح العربي يللي تحوّلت لجريدة بعدين بسبب ضغوط كتيرة تعرضتلها المجلّة. الغريب في الأمر أنّو نشروا . كمان كنت أكتب الشعر لحبيبتي وأنشرو بمجلّة سنوب النسائيّة . هلا على كبر صرت أكتب وقليل أنشر يمكن لأنّي ما بشوفو أنّو يستحقّ النشر أو خرج ينقرا.

الحب الو معاني كتير ارقاها حب الام...كلمة بتوجهها لامك...ولابوك...
أمّي: أنت أكتر إنسانة بالوجود بحبّا وما عرفت قيمة الحب والتضحية إلا على إيديك. بحبّك من كل قلبي... يمكن ما عبّرتلك كتير مرّات عن هالشي بس لسّاتني مو متصوّر الدنيا بلاكي... ربنا يحميكِ!
أبي: كتير مرّات زعجتك ويمكن غلطت بالكلام وبرغم هالشي أنت كنت تضل صبور عليّ وما بتجرحني قدّام البشر... بس أنا ببكي كل ما أتذكر هديك المواقف... ولي عليّ شو غبي! سامحني لأني بحبك وبعرف تماماً الكم الهائل اللي شلتو بآخر فترة من حياة عيلتنا والعذاب والهوان كلّو بسبب أخطاء...
أنا مدين ألك بكل شي عندي: أنت اللي علمتني القراءة قبل المدرسة... كنت تعطيني من وقتك أكتر بآلاف المرات من كل الأبوات يللي شفتن... ربنا يحميك ويعطيك الرّحمة على تضحيتك.


تخيل انو هاي اخر لحظة بحياتك...بعيد الشر عنك...شو رح تحس حسب توقعك؟؟ رح قول كلمة "فُرجَتْ" . ما رح حسّ بشي... لأنّو الموت ما بيعنيلي كتير!

شو وصيتك بالحياة؟؟؟ ما فهمت السؤال!!! إذا وصيّة لازم أكتبا فأهمّ شي ترجع الديون لأصحابا .

(3)
اكتر كلمة بتحب تحكيها المحبّة.
اكتر كلمة بتحتاج تسمعها تشجيع.
اكتر كلمة بتكرهها التعصّب.
اكتر كلمة بتنرفزك النفاق.
اكتر كلمة بتحسها سامية السّلام.
شو بتعنيلك كلمة ندل واحد منحطّ وسافل.
بتعرف ترقص لأ للأسف الشديد!
بتحب الفلفل الحار كتير.
شو بتكره تاكل ولا شي. يعني باكل كل شي بدون استثناء.
شو مشروبك المفضل ما في تفضيل... بحب المي والنبيذ والنيسكافيه.

(4)نصيحة بتوجهها للتالية اسماؤهم
بلاك جرح الآخر دون سبب ما ألو أي مبرّر!
بترفلاي الجديّة بتحتاج أحياناً لقليل من الرّاحة. ولمّا الإنسان بيوصّل لمرحلة يشوف فيها حالو محور بيبطّل يكون إنسان حقيقي وخاصّة بما يتعلّق بتعاملاتو مع الآخرين. أنا متأسّف كتير يللي صار بآخر فترة وبتمنّى أنّو آراء الآخرين فينا ما تأثّر على وجودنا بمكان معيّن... لأن ما بالضرورة كل الموجودين يحبوني لأكون بهالمكان. أنا هون لأني اخترت كون هون وبس. وإذا كل ما انزعجت من شي أو من شخص بحرد فشو بيعنولي الموجودين يللي بحبن ويحبوني؟! وشو بتعنيلي الأخويّة إذا ربطتا بقصّة أو تعليق أو نقد... إلخ؟!
هاني إذا عم تحكي عن هاني داغر فأنا التقيت فيه مرّة وحدة بس وكان اللقاء شي بيهوّي! فات على موضوع بطريقة مزعجة جداً واستهزائيّة ولما رديت عليه ما جاوب. فنصيحتي أنّو إذا فتت عشي موضوع فيا فوت واحكي وناقش وكون قد هالشغلة فيا لا تفوت مالأوّل.
بريف هارت ما بعرفو.
سيريان غاي ما بعرفو.
جاد ما بعرفو.
محمد ابراهيم كل شي يقودني للــ "لا إنسانيّة" فلازم يُرفَض.
طارق البشر أهمّ بكتير مالمكاسب.
ذا لايت ما بعرفو.
بارليب برغم أنّو الزلمة طوراني ومن عنّا يعني بس ما بعرفو.
امرأة من ورق ما بعرفا.
حكومة_غوفرمنت_ ما بعرفو أو ما بعرفا.
سويت بيبي ما حصلي الشرف والله.
ريمي محترمة لحد يخلي الآخر يحبّا. بنصحها تضلا عنصر سلام في الإدارة.
ووشوم من المفضّل مشاركة الآخر بما عنده لا بما عندي.

(5)
لمين بتهدي هالاغاني
خدني معك لربنا.
بعدك على بالي لحبيبتي الأولى.
ضمني على صدرك لأمي.
سلامتك من الاه لأصدقائي.
انا بعشقك ما بعرف الأغنية.
الأماكن ولا هي.
مستني مني ايه ما بعرفا.
الحب والوفاء ولا هي.
أناديكم ما بعرفا.
كن صديقي مو لحدا.
أين ستهربون ما بعرفا.
اغضب ما حصلي الشرف.

اذا حابب كمل في مجموعة لا بأس بها بس بتوقع اذا كملت رح تدعي علي فلزالك ....موفق وبتمنى الك رحلة ممتعة بالابحار جوات زاتك

آخر جملة هي أحلى جملة سمعتها بالمقلاية منذ عرفتها... في الحقيقة هو الوصف الحقيقي للمقلاية "الإبحار داخل الذّات". يعني أثّرت فيّ كتير كتير وأنا بشكرك عليها من كل قلبي. وبتمنّى كون حكيت يللي عندي بأسئلتك وللي انزعجوا من كلمتي بقلن: المطلوب كان أنّو عبّر عاللي بقلبي بدون غش أو محاباة.
وبشكرك يا وشم الحلا على هالفرصة .