[قرصان الأدرياتيك]

المحارب العتيق:

أبو قريص ( عجبتني هي قريص )
أول شي ليش الأدرياتيك وبعدها ليش قرصان
تاني شي ليش عصبي لما بيكون مافي داعي . ورايق لما المفروض تكون معصب
تالت شي ياريت تشرحلنا شو طبيعة العلوم الأسلامية يلي دارسها
رابع شي كيف برأيك الوطن العربي أو العرب فيهم يتقدمو ويتطورو
خامس شي شو طموحك بالحياة

أبو قريص على وزن أبو بريص...
بتعرف أنّو أنت شغلة وخاصّة بالجدل معي... وشغلة على وزن بغلة.
ما عجبني هالاسم وبفضّل أنّو محدا يناديلي فيه وقد أعذر من أنذر .
أنا ما توقّعتك تفوت! لكنّك فتَّ... وكنت حابب أسألك عن تعليق أوردته بموضوع ياس عن حلقات داروين، بس كرمال اشتداد وطيس المعركة حسيت أنّو سؤالي رح يعيد القصّة للأذهان فاعتزلت.
وما بظن أنّو السؤال ألو موقع هون فراحت عليّ وعليك.

الأدرياتيك لأنّي لمّا سجّلت بالأخويّة كنت موجود بمدينة على بحر الأدرياتيك. وقرصان لأن القراصنة كانوا منتشرين جداً بهالبحر بحكم أساطيل التجارة بالبندقيّة. وكون حياة هالنوع مالبشر ما ألا أساس ولا مستقرّ وتقريباً حياتي لهلا هيك.

عصبي هاي علّة فيّ وعم حاول بطّلها بس قدّام الغباء والنّفاق ما بقدر!
فأمّا ليش أنّو مو بوقتها لأنّو أنت هيك بتشوف... وبظنّ أنّو مو بإيدي هوّ إفراز الأدرينالين ولا بإيدي مو إفرازو!!! بس أنا بشوف أنّو هي بتجي بالوقت والمكان المناسبين وخاصّة كمان مع الشخص المناسب.

العلوم الإسلاميّة هي دراسة تتألّف من مرحلة الديبلوم فالليسانس فالدكتوراه.
أول سنة بيدرس الطالب باللغة الإيطاليّة وتاني سنة بلغة يختارا بين الفرنسية والإنكليزية وتالت سنة حكماً بالعربيّة.
طبيعتا أنّو هي دراسة تتوزّع على مواد وأعمال بحث وامتحانات تتعلّق بمواد إسلاميّة بحت، متل: القرآن ونصوص، الحديث والسنّة، الفقه والشريعة، الكلام، التفسير، تاريخ الإسلام، الشيعة، العلمانيّة في المجتمعات الإسلاميّة، الشيع الأخرى الإسلاميّة، التصوف والمتصوفة، الفلسفة الإسلاميّة، المنظمات الإسلاميّة... إلخ. وفي مواد أخرى كتيرة.

العرب فين يتقدّموا لمّن يتعلّموا شو بتعني كلمة المساواة بين البشر. ولمّا يوصلوا لمرحلة يعزلوا فيها الدين عن الدولة وهالشي حالياً مستحيل لأنّو الدين والدّولة واحد بحسب العقيدة الإسلاميّة الأرثوذكسيّة.

طموحي في الحياة أنّو أقدر أقدّم شي لبلدي ولو على مستوى صغير كتير. وخاصّة في المجال الاجتماعي والثقافي. وما بالضّرورة كون أنا اللي عم قدّم، بقصد أنّو التقديم يكون كمان بالتربية ومساعدة الآخر على النموّ والعطاء.

مع التحيّة الفائقة لأحلى المحاربين .