[قرصان الأدرياتيك]

قرصان تعا لنشوف لهون وجيب معك شوية زيت باعتبار القلي على السمنة ببطالع ريحة ما طيبة كتير :

أهلين بأبو طوني... هلا بالنشامة ومبروك الاسم الجديد .

1- برايك الشخصي وبمقياس من الواحد للعشرة ... فين بتشوف الأخوية

هالشي نسبي... يتعلق بالأعمار والمستوى الثقافي... إلخ. بس بكل ما هو موجود فيها أنا بعطيها حالياً 7 وبظن في نموّ ملاحَظ.

2- اي قسم اكتر شي شدّك بالأخوية واي قسم تعتبر وجوده خاطئ بالأخوية

البريد ... الأقسام كلا حلوة بس في كتير أقسام أنا ما بفهم فيا فما بقرب عليها... أفضل قسم هو المنبر الحرّ! في أقسام لازم تتعدّل لغير تسميات وتفتح بشكل محدود ومحظور، يعني القسم الرّوحي وأقسامو شوي خاطئة بنظري ويلزمها إعادة صياغة وخاصّة تحويل الأسماء الدينيّة لأسماء أخرى بحسب المفاهيم العلمانيّة (والعلميّة). مثال: من فترة طويلة واحد نكش قسم اسمو "اللاهوت المعاصر" وأنا شخصياً ماني مع هالتسمية بمنتدى متل الأخويّة وبفضّل أنّو يتعالج الموضوع حتّى لو أخد وقت.

3- خلال فترة وجودك القصيرة بالأخوية ... اكلت شي اسمه " مخالفة "

لا والله وأنا لما بسمع فيها بتساءل كيف بتكون وكيف بتجي... (بس ما بدّي ) هلأ وكرمال فضيلة العدل أنا زلمة شرير أحياناً بنقاشي، وبقدّر كتير موقف الإدارة منّي من هالناحية بس. بيجوز عطوني فرصة لأتعرف عالمنتدى بشكل أفضل.

4- الي بتابع القرصان بالأخوية بلاحظ معاملته الخاصة جدا مع " صديقه " اللامنتمي ... واكبر دليل موضوع الخربشات تبع اشتقت لك واشتقت لي .. السؤال :
هلق في اتصال خارج صفحات الأخوية مع شخصية اللامنتمي .. ام ان القصة محصورة بالأخوية فقط .

الموضوع موضوع صداقة وبنعرف بعض متل ما نحن... بس ما التقينا، في اتّصال هاتفي ضعيف! وميسينجيري جيد نوعاً ما!

خلينا نطلع شوي من الأخوية ونجي للقرصان :
1- سؤالي المعتاد : شو هوي نوع اتصال الانترنت تبعك

أنا جاهل بهيك أمور... واتّصالي يكون بحسب المكان يللي بتواجد فيه. يعني لما بكون بإيطاليا بعرف أنّو كومبيوتري بياخد الشبكة عن طريق الوايرليس المركّب بالبناية. بسوريّة بفوت عالمقاهي لأسباب أمنيّة... ما بعرف التسميات الله يرضى عليك أنا زلمة تقليدي وما بفهم كتير بالحداثة تبعيتكون... مانك شايفني عم أدرس لغات قديمة .

2- شو هية نوع الشهادة اللي حاصل عليها

ما بعرف ليش هالسؤال فيه تكبير راس... بس رح قلك لأنّو وعدت أنو جاوب. يا سيدي أنا زلمة مبهدل بالشهادات بدرس بس ما بحضر وآخر شي فالصو، حظي معتر بالامتحانات! المهم وبلا طولة سيرة حالياً معي إجازة (تقابل الليسانس بلبنان، والبكالوريا بالمفهوم الأوروبي) بأحد العلوم. وعندي ديبلوما بعلم تاني. ووثيقة لتدريس لغة شرقيّة قديمة.

3- هل الأحاديث اللي بتداولها بمنامك " بأحلامك يعني وانت نايم " باللغة العربية الفصحى ام بالعامية

مرّة وحدة بحياتي حلمت بالفصحى واللي كان عم يحكي معي واحد من المقاتلين العرب ما تبينت شخصيتو منيح بالحلم. هالشي كان بسبب صداقة انبنت بيني وبين صديق عزيز على قلبي (تركي مسلم سنّي) وهو ما بيفهم اللهجات العربيّة فكنت أضطرّ حاكيه بالفصحى وهاي لهلا وسيلة التواصل بيناتنا.

4- شو لونك المفضّل

الأزرق.

5- برمضان الحالي ... بتعاني من تغير نمط الحياة " حتى لو ما كنت صايم " ولا بتحس انه شهر كتير طبيعي متله متل بقية السنة " غير فكرة المسلسلات يعني هل يطرق اي تغيير على حياة القرصان خلال الشهر الفضيل "

غالباً ما أكون خارج الأقطار العربيّة فما بحسّ بهالشي بس بظنّ هالسنة رح يكون مميّز بحياتي وخاصّة أنّو ألي أصدقاء كتير ما رح يقصروا بدعوات الإفطار الرمضانيّة... ويلي الله على هالشهر! يا سيدي رح أسمن سطاعش كيلو . بصراحة رح يذكرني بأيام عشتا ببلدي من أكتر من 11 سنة...ورح شوف شو في تغيير. طبعاً بالنسبة للمسلسلات فمحضر حالي لباب الحارة لأنّي زلمة يعشق التراث بكل أشكاله. وكتير بستفاد من متابعتي لهيك أشيا.

حاليا خلص الزيت اللي معي .. بعته لطوني يجيب لي الزيت ... حتى اكمّل قلي

إي بس قول لطوني يقعد عاقل مو ناقصنا وجع راس بيكفي الزيت والنار!