طيب غيرهم شايف إيه
شايف شرطي قبض على روحه
وحرامي بيسرق من نفسه
دولة رافعة علم على ميضا
بتلاتِّ ألوان كلها بيضا
ثم الميضا مالهاش جامع
واللي بيتكلم بيتهته
واللي بيسمع له مش سامع
وما فيش واحد جاي يتوضا
كله جي يبل شراب
يمسح بالمية اللكعاب
كله عايز يبقى خراب
واللي مش عايز، بالعافية
كلب تاريخ عض الجغرافيا
عملوا بلد في حدود العضة
وبقىلها حكومة ومعارضة
وعملات ورقية ومن فضة
وبلدنا مظاهرة منفضة
وصلاة جمعة ما هياش جامعة
وإمامنا مش حسن السمعة
أهي جمعة يا عم وتتقضى
ونصلي ونقيد الشمعة
مش أملاً والا رومانسية
لكن عادة ومش ها تضر
مستحلينا الزمن المر
ويعدي أدان بعد أدان
ثم يمر شريط متسارع
تتسابق فيه الأزمان
تدبل فيه الشقة تماماً
والناس تتحول أشباح
وتغطي العفش البياضات
ويغطي بياضاتها تراب
وانا مفتاح مزنوق في الباب
نكد البشرية وأزمتها
مطرة نازلة بعزم ما فيها
وانا وحدي واقف تحتيها
عامل شعري قمع عظيم
رافعه فوقي كما الشمسية
طبعاً مش بيحوش المية
بيركزها بس عليا
فأشيل انا هم البشرية
وأترجمه في هموم تفاصيلي
في زعل البنت وضحكتها
في حر الدولة وزحمتها
مصر مجاز عن كرشة نفسي
وعن كرشة نفس الإنسان
تلاوتها وترتيلها الكنسي
ووساختها والدبان
لازم أسيبها عشان أغلبها
واكتب شعري بدون ما اكتبها
أهرب منها وأهربها
مصر مجاز عن كرشة نفسي
لما أوصف حال الدنيا
تشبيهاتي بتبقى طابور
تيجي مصر بكتف جلنف
ترمي كلامي هنا وهناك
وتقف في الأول بالعنف
مش هتخلي لي ولا حرف
كده مصر بستعمر لغتي
لازم أطردها من الصف
أخرج م الجزئي للكلي
مصر مجاز عن كرشة نفسي
هاختم بيها آخر مرة
عشان اخرج م الجرة لبرة
ميت مرة تسلمي يا جرة
وانا ما سلمتش منك يوم
مصر يا قمع يا تحت المطرة
إزاي تحشي القمع غيوم
أنا مزنوق في الباب من فترة
مش مسموع تخبيطي وجرسي
مزنوق في تشبيهي مالمصري
مصر مجاز عن أزمة شعري
مصر مجاز عن كرشة نفسي
مصر مجاز عن خنقة جيلي
محتلة خيالي وتحليلي
وعايصة أفق الأمة هباب
وانا مفتاح مزنوق في الباب