[keko]

والله يا شباب يمكن أنا بذكر أنو انفتح الموضوع نفسو من فترة 4 أشهر يمكن
عكلن كان رأيي و مازال هوي أنو المشكلي بالدين الذي يرفض الآخر وإذا ما في هيك دين معناتو المشكلي بصاحب العقل الزنخ الذي يرفض قبول الآخر أيا كان هادا الآخر
يعني مثال هادا الموقع سوري وله توجه اجتماعي مسيحي نوعا ما نظرا لادارتو وتأسيسو ومع هيك هادا الموقع بيتقبل من الأخ حشت نشت أنو يقول أنو أنا ما بآمن بالله دون أن يتم رفضه وكأنه ناقص العقل مثلا لانزال نتعامل مع بعضنا أشخاصا لا انتماءات ومحسوبيات
والمشكلة أنو هالمجتمع المليء بالتناقضات مانو عم يتجه نحو المدنية مجتمعنا يوم بعد يوم عم يتجه نحو التمييز الطائفي وهادا الشي واضح بالنسبة للكل وما حدا بينكروا وهوي على جميع المستويات يمكن انو يكون مجتمعنا مانو قابل لسا ليصير ديمقراطي أو ليصير علماني بس اللي بعرفوا أنو ماحدا عم يدفع بالإتجاه المعاكس لا الشعب ولا رجال الدين ولا السياسيين ولا الحكومة ...
كلو تعود على المحاصصة والمحسوبية
والحل هوي جذري أو لا شيء ... والحل هوي عن طريق قانون مدني لا يميز فلان عن آخر تبعا لطائفتو
تطبيق حقيقي للدستور وإن كان فيه أخطاء لكن على الجميع الإلتزام بها والعمل على تصحيحها تحت القانون
تفعيل فعاليات المجتمع المدني بشكل حقيقي
يعني كل شي من هالقبيل وكلكن فهمانين علي
بقى أنا كمسيحي ابن الشرق وبحاول أنو ابقى فيه لانو وطني يمكن اتغرب أو انزعج من الواقع بس بالنهاية كلنا منحبوا وما بتخيل منفرط فيه مهما كنا معصبيين ومزعوجين
بالنسبة إلي هادا الوطن اللي فيه اتعلمت فكر واتصرف مع الناس فيه عشت مع أهلي وصحابي فيه حاولت حقق أحلام الطفولة والمراهقة وفيه عشت مع رفقاتي ... تقاتلنا وزعلنا وتراضينا
هادا الوطن فيه اتعرفت على كل الشباب اللي بالموقع أنمار حسام و باسل و حسن و رغيد وكل أخويتي اللي حققت هادا الموقع وحققت كتير شغلات على الصعيد الشخصي لكل واحد أو على صعيد المجتمع والوطن كمان يمكن ...
هادا وطني جزء من تاريخي وحياتي وجزء من تاريخ كل واحد فيكن وحياتو