[achelious]

يا ريت عندي وآخ لو فيي
عقد حبي جبلك هدية
كنت بهديكي صبا الوردات وأسرارأحلامي الطفولية
وكنت بتعمشق على النجمات بسحّب شلل خيطان فضية
وبكلّف ملايكة وحوريات تحيّكلك بلوزة ألوهية
وبالبحر وبالبحر كنت بغافل السمكات وبغطس متل فكر الحرامية
وبقطف زبد وبقطف زبد من رغوة الموجات ومن جدايل شمس مرخية
وبكمش وهج وبحولوا بوسات بلون أشواقي ماوردية
والطفل كنت بشلحوا البسمات وبغرف من عيونو صفا النية
وعرس الربيع بشلحوا الغنجات وكل شي معو لهتات عطرية
ومن كل طير بنتف الريشات وبفرش طريقك ريش حرية

وعالمروج بسابق النحلات بجبلك ضمير زهور بكرية
وبطير مع احلام وخيالات ع بلاد مدري وين مبنية
وبجدلك من سوالف الغيمات مرجوحتك على كتاف جنية
بغزلك شراشف من الهمسات وفراش من قلبي نعومية
و جودله من السحر ومخدات من شعرآلهة الفنيقية

وبرش ع جفونك هنا الغفوات المحروم منها حصا عينيي
بخلّي الحلم يحكيلك حكايات عن حالك لحالك غراامية

هيهات لو عندي فعل هيهااات عقد ما عندي انا نية
احولك انتي انا بالذات وبلبسك روحي الطبيعية
لكن اذا فشلو التمنياات.. و عمري و عمري استسلم للعبودية
بترك مني إلك تلات كلمات محبتي و الآه و النهدات
من القلب للقلب ياللي حبك هدية يا ريت عندي وآخ لو فيي