[jano.]

أنا بقول انو جهل.. شو رأيك انت؟
معقول الكره لليهود يوصلنا لهالمواصيل اللامنطقية؟ طيب قتل يهود... ما بيعرفو العربان انو اليهود اللي انقتلو على ايد هتلر ما أذونا بشي؟ و لا قرّبو صوبنا؟ أساسا لو مهاجرين ع اسرائيل كان ما انقتلو.. لكن كانو بأرضهون بأوربا؟

شلون ممكن تعجب بشخص يعتبرك كانسان مانك آري أدنى منو... أي أي أدنى منو.. انت و الكلب عندو سوا لأنك لا تنتمي للعرق الآري.. و تعجب فيه و تقتبس هلوساتو (لأنو هلوسات حكيو.. مافيني قول عنو انو كتابات.. ) يا شيخ عندو اليهود و العربان سوا.. فرقت انو كان يمسح جوخ شوي للعربان بمساعدة بعض المشايخ المأجورين بمصر عن حبو للاسلام و عن اعجابو بالعرب عسى و لعل يساعدوه على ربح معركة أفريقيا ضد الحلفاء..
ما منعرف نوقف بشكل موضوعي تجاه ظاهرة؟؟ لأنو قتل يهود صار حبيبنا؟ ليش هالعنصرية؟

ما بعرف... هاي وحدة من الشغلات اللي تفزز عصبي بصراحة..

بيعرفو انو اليهود الي انقتلو ما اذونا بشي وبيعرفو انو لوكانو هني مكان اليهود كان هتلر رح يدبحن بنفس الطريقة...بيعرفو هالشي الله وكيلك!.. بس خيو المهم انو قتل اليهود! ركز على هاي (المهم انو قتل اليهود)... وبيعرفو انو افتخارن وحبن لهتلر بهالعلانية الرهيبة هو إهانة + جرح شعور كل الشعوب والدول الي عانت من ظلم هتلر بس المهم انو قتل اليهود!... لهيك الشغلة مانا جهل، الشغلة عنصرية وبكل وضوح.

غير انو عنصرية... هيي تعبر عن أنانية كمان، العرب معروف عنن انو ما بيهتمو بقضايا الشعوب التانية الا اذا كانت الشغلة تمسن بشكل او بآخر او اذا كان الها علاقة مع اهوائهن، ومع هيك بدن كل العالم توقف معن!

بيستوردو ويقتبسو الظواهر الشاذة من الشعوب الاخرى وبيتجاهلو انتاجاتها المنيحة، واذا صار وحبّو شي منيح من الشعوب التانية فرح يكون متعلق بالكره... كمثال عن هالشي : الناس الي بيحبو غيفارا فقط لانو وقف بوش امريكا! وما بيعرفو شو هيي المبادئ الي ناضل مشانا.. لا والاحلى الناس الي بتعبد كاسترو وتنسى الي عملو بشعبو وببلدو فقط لانو بيوقف بوش امريكا ولانو كان صديقو لتشي!

اخخخخ بلا ما اخبص كتير وروح لبعيد، المهم: كتاب كفاحي متلو متل اي بيوغرافيا او قصة عن أحد الطغاة، انا بعتبروا اهم من البيوغرافيات عن الشخصيات الخيّرة، لانو بيخلينا نعرف كمية الشر الي بداخل هالانسان ومدى خطورة أفكاروا على البشرية، بس مو لنقتدي فيه!!