[yass]

الله يرحمو...

ما حدا يستاهل الموت و لا بيصير موت انسان يكون مفرح مهما كان هالانسان ليكون... و الزلمة أنا شخصيا ما بعرفو و لا بعرف خيرو من شرو.. و مهما كان فدائما خبر موت بني آدم هو خبر محزن... هيك رأيي.. يعني لو أحقر انسان على وجه الأرض يموت فخبر موتو مانو مفرح...

لهون اتفقت مع حالي انو خبر موت انسان هو خبر محزن.. طيب.. هلأ متل ما حكيت أنا ما بعرفو لذلك مافيني قول منيح أو عاطل, و ما بعتقد وجودو بمنصب بالجيش ممكن يحكي عن خيرو أو شرو...

و الخبر كخبر مانو منيح... هيك أحداث سيئة دائما مهما كان القتيل و مهما كان القاتل (بغض النظر عن المنطق الانساني اللي لازم يكون أول شي بنفكر فيه) لأنو خبر مخيف و يعني وجود اتجاه عنيف و اجرامي ضار جدا بأي فرصة حراك أو عمل سياسي.. لأنو بحجتو أو بسببو راح تتشدد القبضة الأمنية كمان و كمان.. و ماننا ناقصين...



و كالعادة... بدنا نرجع كسوريين نخجل من اعلامنا لأنو نضطر نروح ع مواقع اردنية و مواقع لبنانية لنعرف شو بيصير ببلدنا... صار سمعان 5 نظريات أو صيغ.. شي بيقولو جنبلاط.. شي بيقولو حزب الله نفسو صفاه لأنو اكتشف مدري شو.. شي بيقولو اسرائيل, شي بيقولو الجيش نفسو صفّاه ليخلص من مدري شو.. و شي بيقولو الشبيحة صفّوه كانتقام من حدا مقرب الو ضربلهون صفقة... و تعا انت افهم شو صار!!! يعني لو بيقطعو الشك باليقين و يحكو شو صار ما كان صارت هالبلبلة و هالتأويلات و التفسيرات اللي ممكن تكون ضارة و خطيرة أكتر بكتير من نشر السبب الحقيقي ... بس هاي سياسة الكتم و التستر الاعلامي...