شو يعني تعايش؟
أنا بفهم تعايش يعني وجود شخصين بمكان واحد.. ما حدا حكى انو التعايش يقتضي انو الناس تصير متل بيت فستق تتبادل السلامات و التحيات و المحبات...
الاتفاق الفكري بين اللادين و الدين مستحيل.. هذا يعني انو صيغة الأرضية المشتركة مستحيل.. مما يؤدي الى وجود صيغة ثانية ممكنة و هي التطنيش الفكري..
شو سبب المشاكل؟ فرط حب الاستفزاز من طرف و فرط الحساسية من طرف تاني (و كلا الطرفين يتخذ أحد الموقفين حسب الحالة)..
هلأ أنا بفهم انو اللاديني أو الملحد هو شخص لا يؤمن بوجود ذات الهية.. و القصد من الفكر اللاديني هو ملئ الفراغ الفكري الناتج عن انعدام هذه الفكرة بأفكار من طراز ديالكتيكي آخر.. يعني اللي معتبر انو هالشغلة خلقة ألله انت بدك تدورلها على مغزى ثاني أو معنى ثاني.. ما حدا قال انك ملحد مشان تقعد تسب ألله أو مشان تقعد تتمسخر أو تتفزلك ع ألله (أي هاد معنى الحكي.. و مو دفاعا عن ألله.. لأنو أنا ملحد و لا ديني مقتنع بلادينيتي.. لكن بعتقد انو اذا مافي دببة قطبية بسورية فمافي معنى أو مغزى انو اظل جايبب سيرة الدب القطبي السوري ع لساني ليل نهار.. مالو معنى و لا منطق.. و يدخل ضمن منطق الخبل حتى)..
بالزمانات بمناقرة مع واحد نزّل موضوع الحادي من النمط الاستفزازي .. عم قلو انو في زوايا لادينية بالانترنت فيك تنشر هيك أمور و أماكن مخصصة يعني متل منتدى اللادينيين و هيك.. قام شو رد علي.. قاللي اي هنيك كلو ملحدين.. شو استفدنا اذا ما فات متدين قراها؟؟ يعني انت تلذذك مو بكتابة هالمقالة.. انما باستفزاز المتدين
هون خلصنا من النقد تبع الجانب الأول ... و هو نوع اعتب عليه لأنو يبتذل معتقدي اللاديني و يحوله الى زعبرة..
الجانب الآخر... انو ما بعرف...
شو بيضر ايمانك ازا فلان حكى؟ و ليش ما تفكر انو في نسبة مئوية من حكي فلان قصدها استفزازك و لما عم ترد عليه عم تحقق مرادو؟ هاي بالنسبة للحكي اللي واضح استفزاز.. (مافيني حاكم نيات كجهة ادارية.. يعني لما ينبعتلي تقرير برد شخص يحكيلي انو استفزاز.. طيب أنا مافيني حاكم نياتو و احذفلو الرد.. لكن انت يا متدين اذا معتبرو استفزاز فيك ساعتا تطنشو و ما تفوت بلعبو و لا تخليه يحقق مرادو)..
بعدين في جانب و هو موضوع فرط الحساسية, أو موضوع حمل سيف الاهانة.. يا حبيبي القدسية لألك لا تعني فرض قدسيتك على الجميع.. و خصوصا بالأمور الدنيوية اللي يدخل فيها الدين بشكل ما.. من أمور حياتية و اجتماعية ... هاي هيي الأمور اللي يستحيل ما يصير فيها صدام لأنو هاي أمور تمس جوانبنا الحياتية.. لكن السخيف بالأمر انو الصدام ما عم يصير بهالأمور انما عم تعلق بقصص واهية و سخيفة...
الدين الو مكانو و مكانتو.. و استخدام الدين و كلمة الله في كل شاردة و ورادة ابتذال للدين.. انت اللي عم تدحشو بكل شي عم تسيء الو قبل اللي يجي يعيب عليك هالأمر...
فلذلك... طنّشو بعض يا أخوان... و البطاطا غذاء الروح
