اقتباس:
|
ياس أنا بدي خالفك هون كتير لعدة أسباب:
|
انت تخالفني؟؟ متوكد؟ ما عندك صلاحية ... هع
اقتباس:
|
مبدئياً وبمجرد اعترافنا بأنو هالأشخاص مجرمين بيعني قناعتنا بإنو يجب حسابهن بأي طريقة متاحه..
|
لأ طبعا مو صحيح هالحكي... تعا نحكي عن مبدء الثواب و العقاب.. مين يحاسب؟ يفترض يحاسب من يقدر ان يقيم العدل بالقضية.. ما هيك؟؟
طيب لما حرامي يسرق بيت.. يجي زلمة يمسك هالحرامي و يضربو مشان ياخد الشغلات اللي سرقهون هالحرامي لحالو .. شو استفادو صحاب البيت؟
اقتباس:
|
وبناءً على انو مافي لا محكمة وطنية بتقدر تحاسبهن ولا قاضي وطني بيقدر يحاكمهن يجب علينا القبول بالموجود اذا كان بيخدم المصلحة الوطنية بالنهاية حتى لو كان على أيدي ناس مو وطنيين... بس بالنهاية هنن رح يحاكمو هالمجرمين مو رح يحتلو البلد عسكرياً.. فإذاً لازم نقبل فيهن بمعزل عن شو هنن لأنو الحكام مانهن بالشرف يلي بيستحقو فيه محاكمة مثالية ولا سيرتهن الذاتية بهالإحترام لحتى ندافع عنهون..
|
يا أخي أنا ما عم دافع عنو... لكن اللي عم قولو انو هالمحكمة مناطحة روس ليس أكثر... العدالة آخر شي مهتمين فيه ( و برجع بقول.. داخل هالمحكمة في ناس قمة بالنزاهة و فعلا يشتغلو من كل قلب.. لكن مغزى المحكمة هي بمن يسيرها لمصالحه) و أول شرط للمحاكمة انو القاضي يكون عادل.. و يكون عندو الاختصاص اللازم و يكون عندو الصلاحية اللازمة .. (قاضي الأحوال الشخصية ما فينو يحاكم مجرم.. و قاضي الجنايات لا يحكم بالطلاق حتى لو مستوفي الشروط)
اقتباس:
|
هون منجي على موضوع النزاهة.. لما بدك تطالب بمحكمة نزيهة لازم يتوافر عندك بعض الشروط يلي أولها يكون متاح محكمة أخرى أنزه من الموجودة.. وإلا بيعني هالشي قبولك باستمرار الوضع على ماهو عليه إلى ماشاء الله... وبرجع بوضحلك لما بدنا نطلب لهالأشخاص ( يلي نحنا مسبقاً منعرف شو عقابهون العادل ) محكمة نزيهة يجب أن يكونو مارسوا النزاهة ولو بالحد الأدنى اتجاه شعوبهن.
|
بهيك أمر ما فينا نقول.. هاد الموجود و لازم ناخدو.. غلط هالحكي.. الشرط الأول لمحاكمة هو قضاء حقيقي.. اذا بمشفى مافي جراح قلبية ما رح تجيب ممرض يفتحلو قلبو للمريض و تقول هاد الموجود...
اقتباس:
قولك لاء لللمحكمة الدولية ( يلي أنا بشاركك بتحفاظاتك عليها ) بيعني رفضك للحل الوحيد المتاح لحساب هالمجرمين ومعاقبتهن.. صدقني هي أحسن الأسوء أو أسوء الأحسن بهالوضع..
|
أنا ما عم ارفض الحل الوحيد لأنو ماني شايفو حل...
حجي.. عم تغلط نفس غلط كتير من منظمات حقوق الانسان.. انو عم يسمحو باستخدام قضيتهم لمصالح سياسية.. و هاد يشكل ابتذال كبير لحقوق الانسان...و غلط غلط غلط... كل هالحكي مناطحة روس, آخر همهون حقوق الانسان الله وكيلك.. و ما فينا نقول هاد الحل الوحيد ضد هالشخص .. أنا شخصيا كنت اكره صدام حسين و نظامو و ما يمثل كره الموت.. يعني أشعر بالقرف لليوم كل ما اشوف منظرو المقرف... لكن ماكنت مع حرب العراق و لا رح اكون معا.. مو هاد الحل.. الأميركان فاتو كرمال العراقيين؟ طبعا لأ.. في ناس قالو أخي المهم نخلص من صدام... خلي يجو الأميركان.. و شو النتيجة؟ صرت ازا تعارض نظام ما بالمنطقة بيقلولك انو بدك تعمل بهالبلد متل ما صار بالعراق... برأيك سقوط صدام عمل خير لقضية الحرية و حقوق الانسان؟ أنا بقلك العكس تماما.. لأنو الناس شافتها مجرد حجة و مبرر
ما بيصير نقول انو سيدي.. المهم يتحاكم و مو مهم ع ايد مين... طيب هاد أول شي سماح باستخدام قضية سامية كحقوق الانسان على ايادي سياسية. و هاد أكبر ضرر فيك تلحقو بهيك قضية, و ثاني شي عم تخلي المظلومين على ايد أنظمة محكومة من قبل حلفاء الامبريالية الحاكمة العالم يقرفو قضيتك... اللي هي بالنهاية قضيتهون...