اقتباس:
نحكي على المسموح و الممنوع ... نريد نناقش ما هو المسموح و الممنوع للشاب او الشابة ...
يعني شلون ممكن الاهل يوظفوا خبرة حياتهم ... بانشاء و ادارة .. عائلة ناجحة من جميع النواحي ..
|
اكيد بكل بيت وبكل عيلة المفروض يكون في مجموعة مسموحات وممنوعات يلي هيي عبارة عن الحدود المفروضة على الاولاد ويلي عن طريقها بيقومو الاهل بغرس القيم والمبادئ باولادهن...
بس بهلموضوع بالذات في مشكلتين اساسيات انا بشوف انو معظم الاهل ما بيعرفو يتعاملو معاهن:
المشكلة الاولى
انو في نسبة كتير كبيرة من الاهل بيستعملو مع اولادهن اساليب الفرض والتخويف لحثهم على المسموح ونهيهم عن الممنوع... بدل من انو يوصلوهم لاكتساب هلاشيا عن طريق القناعة الذاتية يلي ممكن يوصلولها بهيك اجيال بس بمساعدة الاهل... يعني بامكان الاهل انو يشرحو الصورة للاولاد بطريقة غير سلطوية او انو يفتحو مع بعض حوار عقلاني خارج عن نطاق الاب والابن والكلمة الاخيرة لمين بتعود... لانو بهطريقة بيبطل الممنوع مرغوب وبيبطل الولد حب استطلاعو الرهيب لكل شي ممنوع ومخبى...
والمشكلة التانية
انو المسموح والممنوع مصطلاحات متفاوتة الحدود...
يعني بتختلف من جيل لجيل ومن مجتمع لمحتمع ومن عيلة لعيلة ومن شخص لشخص
فصعب كتير انو تجي تفرض على جيل يعد جديد نسبيا مجموعة من المسموحات والممنوعات يلي انت بتشوفها مناسبة الك ويلي بتشوف فيها الافضل للاولاد...
يعني كيف ممكن نقرر انو حدود الممنوع عند الاهل هيي الافضل؟ ما نحنا عايشين بواقع بيختلف عن يلي عاشو وبمجتمع كمان بيختلف عن يلي اختلطو معو ومختلفين بكل شي... كيف ممكن انو يكونو بكل بساطة افهم واوعى بس لانو تجربتهن اوسع؟
لهيك بكتير احيان الاولاد مستحيل يتقبلو حدود اهلهن لانو بكل بساطةما بتناسبهن... والمشكلة انو الاهل بحكم حبهن الاستبدادي النا وبحكم خوفهن علينا بيحاولو يحمونا عن طريق فرض هاي لحدود علينا....
اقتباس:
|
هل في حال حصول المشكلة ... الحل المنطقي يكون بتجاهلها .. او بمواجهتها ؟؟ مع ذكر السبب
|
انا بشوف انو عادةً بأي مشكلة الحل الانسب بيكون انو نواجهها مش نهرب منها... لانو المواجهة بتفتح حوار صريح بين الطرفين وبالتالي ايجاد حل مناسب لمعالجة المشكلة من جذورها... واحيانا المواجهة بتكون لمجرد صب غضب معين مش لايجاد حل... بس برضو هون ما بتضر لانو تفريغ الطاقات دائما افضل من الكبت والكبت بيولد سخط وحقد...
بحالات مستعصية معينة... انا شخصيا بفضل انو اتجاهل شي مشكلة مع اهلي.. والسبب بيعود لانو ما في حل!!!
لما الطرفين بيكونو على قناعة تامة باشيا مختلفة وصعب حدا يقتنع برأي التاني بيصير الجدال والمواجهة بس لتوليد مشاكل اخرى ومش لحل المشكلة... وهيك بتصفي معي شجرة كل يوم عم تطلع فرع جديد ودوامة ما بتخلص... لهيك بفضل انو اتجاهل واسكت واحترم انو هجماعة بيكونو اهلي واتركهن يفرضو رايهن علي لبين ما تفرج....