[jano.]

العنف الجسدي:
من سمح للرجل أن يضرب المرأه "زوجة أخت قريبة..."؟؟؟ ألا يعتبر هذا نوع من أنواع الإعتداء؟؟ ألا يستوجب هذا الإعتداء الشكوى القانونية؟؟ متى كانت طريقة التواصل هي العنف؟؟ ما المبررات لهكذا تصرف؟؟

في كتير رجال بيضربو نسوانون عالطالعة والنازلة بدون سبب وحجة ... هدول مابحكي عنون، يعني حالة موجودة بكتير مجتمعات طبعاً مع اختلاف واضح بالنسبة واختلاف طريقة تعامل القانون والقيم الاجتماعية معها..

بس المشكلة الكبيرة الي بمجتمعنا والي هيي المصيبة، انو الرجل العربي لما بتغلط مرتو معو (مخالفة بالرأي أو اهمال الواجبات الاسرية) بيلجأ فوراً للضرب وبعدين بيفكر انو مرتو رح تنسى الضرب والذل بمجرد بوسة او ضحكة وما بيعرف شي اسمو تفاهم بالحوار والنقاش = الشي بيميز "الانسان" عن غير كائنات..
وهالشي صار قاعدة أسرية، انو كون منيح مع مرتك بس فيك تضربها لما بتخالفك,,, والمراة كمان قبل ما تفوت لبيت الزوجية لازم تعرف انو في آمر ومأمور واذا ما عرفت هالشي فرح تتعلمو قريباً جداً!!! لأ وبتصير بعدين مقتنعة بهالشي وأنو صار من البديهيات، يعني طالما الزوج "بيستر عليها" وبيطعميها ويلبسها --> فَـ فيه يضربها اذا غلطت وخالفت أوامرو!.
يعني الجريمة بجتمعنا هي انو الرجل بيتعدى على حقوق المراة وهي مقتنعة، وانا بصراحة بسميها عبودية، لولاها كانت المرأة رح بتبني بالمجتمع مو بس متل الرجل، ويمكن اكتر منو.. والعبودية هيي لما يقول "الذكر" انو طالما المرأة راضية ومستورة وما بتشتكي....الخ معناها مافي تعدي على حقوقا.

قوامة الرجال على النساء:
كيف يحق للذكر"لمجرد كونه ذكر" أن يتحكم بحياة الأنثى كيفما شاء؟؟ مع العلم أن هذه الأنثى بكثير من الأحيان قد تكون أصلح منه!!! كيف يجبر الأخ أخته التي قد تكون "ثقافياً وعلمياً ومهنياً" أقوى منه على فعل أشياء ومنعها من أشياء أخرى؟؟

يعني فيني قول نفس الحكي الي حكيتو فوق تقريباً ..
المشكلة انو الحلول لهيك مسائل مانا سهلة بمجتمعنا:
يعني نحنا بنعرف الصح وممكن نتفلسف على غيرنا، بس ما فينا نطبقو
ما عنا قدرة على كسر القيود الخاطئة -يلي صارت عادة اجتماعية-لأننا بنخاف من حكي الناس
ما عنا القدرة على الاجتهاد والاستقلال بالتفكير لانو في ناس اخدت هالمهمة عنّا

أكيد لازم يكون الواحد واقعي وخصوصا انو بمجتمعاتنا الشرقية في قيم وتقاليد حلوة بنفتخر فيها، بس الي بحكي عنو هني الشوائب الي لا العقل ولا المنطق ولا الشرائع بتقبلها...

شكراً فادي