[oliver68]

بصراحة أنا عجبني اللقاء يللي عملو الأسد على قناة الجزيرة بالنسبة للسلام والسياسة الخارجية، بس كتير تضايقت من موقفو السلبي من سجناء الرأي عنا بسوريا، يعني مافي داعي للدبلوماسية بهيك موضوع ويا ريت يحط إيدو عالجرح ويحط كل ثقلوا بموضوع سجناء الرأي، ومو معقول عنا بالدستور والقانون يتعاقب يللي بيرفض الحكومة أو الرئيس، وبالنهاية سورية "جمهورية" مو مملكة أو إمارة، طبعا ما قصدي انقلابات وثورات وحكي فاضي، لأن سوريا ما نزعها غير هيك شغلات والسوريين ما تخوزقوا غير من ورا هيك أفلات، بس عالأقل يصير عنا ثورة فكرية، تقدر تنقد الرئيس وتوصللوا وتتحاور معاه، وأكيد لازم يعطي وعود وتتنفذ بأسرع وقت.
بس أنا حزنت على محمد كريشان، مذيع البرنامج، فكر إنو الرئيس رح يتعاون معو بهيك موضوع ويعطيه وعد إيجابي مشان سجناء الرأي!!!
ومشان موضوع السلام، يا ريت ما يكون لعبة أو مناورة -كالعادة - من اسرائيل!!!! يعني يا خوفي ما بكرا ننام ومنحلم بالسلام، نفيق على خبر عاجل إنو اسرائيل قصفت إيران وبمساعدة أميركا!!!
المهم، قبل كلشي يا ريت الرئيس يلاقي حل للمشاكل الداخلية عنا بسوريا من فقر وبطالة، والله عيب نحكي بهيك مشاكل ونحنا دولة خيراتها ومواردها بتطمر العالم!!!!!