نتيجة لفشلنا في مهمة تحديد عنوان الحلقة التي بين ايدينا ونتيجة ان مراقنا غير رايق ولواقط الاستشعار عن بعد آخدة اجازة كون اليوم سبت فـ تمعنا فـ استشفينا فـ فضّلنا فـ ارتقينا فـ عفنا عنوان الحلقة متل ما جاي على السيدي
AVSEQ09
AVSEQ09
فلان ( يصبّ الشاي ويقدم الكاس لعلتان ويسأله ) : خير .. شبك صافن ..
علتان ( سارحا بأفكاره ): آهـــــ عبفكّر طلق المرا
فلان ( مرتشفا الشاي بهدوء ): اوف .. ليش شو صاير معكم
علتان : يا اخي نقاقة
فلان :سيدي ..كل النسوان بنقوا ..
علتان ( مشقشقا بفهمه ): شق شق شق شق ... مرتي غير شكل
فلان :ليش شو بدها ؟!؟
علتان : البيت مو عاجبها ...
فلان :ليش شبه
علتان :قال البيت ضيق عليها ..
فلان :هلق انتوا مو بالبيت سبع ( 7 ) اشخاص متل حكايتنا
علتان :اي .. وبيتنا متل بيتكم ..
فلان ( مؤكداً ): مزبوط ..
علتان (بهدوء وألم ):ايه .. اي قال مو عاجبها
فلان ( مستنكراً ): هلق بيت .. فيه غيرفة اربعة بأربعة ( 4 × 4 ) سيّاحة نيّاحة .. ومطبخ فيه مجلى ومو عاجبها .؟!؟! اي يخرب بيتها ..
علتان : شق .. مو بس هيك .. قال مصروف البيت قليل ..
فلان : العمى بعيونها .. شو قلله ؟!؟
علتان : لا .. وكل كام شهر بتقول لي " الولد الفلاني بده قميص ، التاني بده دفتر ، التالت بده كندرة ، والرابع بده .. " خليها على الله ..
فلان :العمى شو تافهة .. لك شو هي ما بتخاف ربها .؟!!؟
علتان :لا .. وآخر طب الكيل .. قال بدها ياني امّن لها حرام صوف للولاد .. شو؟! قال الشتوية واقفة على البواب ..
فلان : اي شي يوقف لها قلبها شو قليلة ضمير ..
علتان :لا وهلق قبل ما اجي طلعت لي بتفنكة .. قال شو ؟! قال الولاد ناموا بلا عشا ..
فلان : اي تاكل زهرمان بخاري شو طماعة ومانها شبعانة ببيت اهلها
علتان :وقعود يا ابو الشباب تحمّل غلاظتها وطلباتها وبعزقتها !!!
فلان : اي روح يا.. هي مرا مافي بقلبها شقفة رحمة ..
علتان :يعني معي حق طلقها ولا لا ؟!
فلان : فوراً .. وبلا تردد .. الآن الآن وليس غدا .. تروح .. الله لا يردها ..
علتان : هادا اللي عبفكر فيه ..
فلان ( بحماس وعصبية ):بتعرف ... انا كمان عبفكر طلقها لهي اللي عندي .. نفس الغلاظة ونفس الطلبات ..
علتان ( بعصبية ) :يا اخي .. يا اخي .. شو بدنا بهال حكي الشغلة بدها شويــــة رحمة
فلان : اي والله .. بدها شوية رحمة ..
علتان : العمى بعيونون العمى ..
فلان : لك بتقول مو شايفينا كيف عايشين !! شو هاد !!!
ما رح تزبط معك ......