[Abu ToNi]

الديمقراطية

علتان يشرب المتة فلان يبدا الحديث بشكل هادئ
فلان :بتعرف .. اكتشفت لك شغلة مهمة كتير كتير كتير ..اكتشفت لك انه الديمقراطية ، وحرية ابداء الرأي ، واحترام الرأي الآخر ، هدول مسائل جوهرية للتقدم والتطور والازدهار
بعدين شوف يا اخي ، شوف هال دول المتطورة والمتحضرة ، يعني كيف هيك عايشين تحت كنف الديمقراطية واحترام الرأي الآخر
علتان ( ينظر بتعجب ويتابع شرب المتة )
فلان :بعدين حبيبي هاد الزمن هوي زمن النقاش وتبادل الآراء ووجهات النظر مو زمن العضلات !!
علتان ( ينظر مرة أخرى إلى فلان ويهز برأسه موافقا ويتابع شرب المتة )
فلان :يا سيدي متل ما عما قول لك ( بحزم ) الديمقراطية واحترام الراي الآخر هنن اساس الحضارة والتطور .. ابدا .. هي القصة ما في تنين ( 2 ) بيحكوا فيها
علتان : بس ..
فلان ( مقاطعا ): لك لا بس ولا شي .. لا تقول لي .. الديمقراطية واحترام الرأي الآخر .. هدول الشغلتين بساوا المجتمع متين ومتماسك وقوي وصالح
علتان : قصدي انا ..
فلان ( مقاطعا بعصبية ):لك شو قصدك وما قصدك !!! .. شو قصدك ؟!.. قول لي دخيل الله قول لي ..لك يا بني آدم انا عبقول لك شغلة ما بيختلفوا عليها تنين ( 2 ) .. مافي حل لمشاكلنا غير بالديمقراطية نقطة انتهى .
علتان : ايـــــي ... بس ..
فلان ( مقاطعا بعصبية اكبر ): لك لسّا ببس بس لي !! لك العمى اللي ضربك شو انك عنيد ومكيد وما بتفهم ..ولك يا بني آدم هاد الموضوع مافي نقاش فيه نهائياً .. الشغلة حطها حلقة بأدانك ولا تناقش فيها نهائيا .. مافي حل لمشاكلنا غير بالديمقراطية واحترام الرأي الآخر .
علتان : لك طيب ..طيب ..بس خليني ..
فلان ( مقاطعا ) : الله لا يخليني اذا بخليك تحكي .. لك يخرب بيتك شو راسك ماكن وما بتستحي .. هادا الموضوع اكبر منّك ومنّي .. لك الديمقراطية واحترام الراي الآخر .. هنن شغلة منيحة كتير .. منيحة كتير غصباً عنك ان قلت اي وان قلت لأ .. عبتفهم ولا ما عبتفهم ؟!؟!
علتان : والله فهمان عليك بس ..
فلان ( جاننا " من كتر ما عصب جن يعني " ) : لسا بقول لك بس ( فلان يلح علتان كف ) لك العمى اللي ضربك شو انك تيس .. ولا تحكي حرف .. سد نيعك ولا تحكي شي .. لك الديمقراطية يعني ديمقراطية مو على كيفك ..
علتان : لك بس ..
فلان : ولا بس ولا حرف
علتان : لك طيب ..
فلان ( ضاربا علتان بالجريدة على راسه ): لسا لسّا بيحكي .. لسّا بيحكي .. ولك هادا الموضوع غير قابل للنقاش .. نهائياً .. لا تجادل ..
علتان ( سعلة بسيطة يحاول كبحها )
فلان : هس ولا حرف .. بلعها .. بلعها ..
( يبدا فلان بقراءة الجريدة ويتمتم ) : شعب ما بيجي غير هيك ..

الفيديو