ملاحظة او ملحوظة شوف اللي بيتفعك خده ، لا يوجد عنوان للحلقة التالي فـ تمعنا فـ استشفينا فـ فضّلنا فـ ارتقينا فـ سمينا الحلقة التالي بعنوان " العريضة "
العريضة
فلان ( متأفئفا): وبعدين ... بدي افهم وبعدين !!!
علتان :بعدين شو ؟!
فلان : وبعدين معنا انا وانت .. لامتى رح نضل ساكتين !!
علتان ( متفاجقا " ليس بالكلمة السابقة خطا مطبعي " ): انا وانت ساكتين !! اي عليم الله منحكي قد بلد
فلان : لك شفت !! هلق قلتها بعضمة لسانك .. منحكي ... اصلا نحن مو شاطرين غير بالحكي
علتان : ليش شو طالع بايدنا غير نحكي
فلان : بيطلع .. وحياتك لو بدنا بيطلع .. ( بحماس واضح ) خطر لك شي مرة تكتب عريضة ..
علتان : عريضة ؟! لا والله صراحة ما خطر لي
فلان : ها شفت .. لك نحن ماننا شاطرين غير بالحكي
علتان ( متعجبا ): يعني هلق اذا كتبنا عريضة منكون عملنا شي
فلان ( منفتقا ): افففف.... طبعا
علتان ( باحثا عن ورقة بجيبه ) : ايــــه هيه
فلان : كتوب كل شي بيخطر على بالك
علتان : لا توصي حريص
فلان : ولا تنسى تكتب عن هديك الشغلة
علتان : انو شغلة ؟!
فلان : ولك الشغلة اللي طنطنت فيها الفضائيات
علتان ( منكبا على الكتابة بحماس): اي اييييييه هي مهمة منيح ذكرتني فيها وها ...
فلان : كمان ولا تنسى تكتب عن الموضوع اللي حكينا فيه بآخر جلسة ( ملاحظة : آخر جلسة عندهم غير آخر جلسة عندنا ها مشان ما يروح فكركم لبيعد )
علتان ( مستفسرا ): تبع الديمقراطية ؟!؟!
فلان ( منطعجا بخفّة ):لك لـــلا .. الديمقراطية حكينا فيه بالجلسة قبل قبل قبل قبل قبل الماضية .. بالجلسة الماضية حكينا عن غير شيييييي
علتان( شاعلا لمبة فوق مخّه ): ايــــــــي تذكرت .. هي بالذات لازم اكتبها
فلان : كتبها كتبها .. حكي الشفهي لوحده ما بفيد ..
علتان ( رافعا رأسه من الورقة ): شو في قضايا كمان نحكي فيها
فلان : شوف لي كام وحدة طلعوا معك ..
علتان ( معدعدا ): 1 .. 2 .. . .. .5 خمسة
فلان : اي بيكفي خمسة
علتان : هلق معقول كل هال شغلات اللي معترضين انا وياك عليها ما يطلع معنا غير خمسة ..!!
فلان : لك مشان نكتب عريضة تانية يا حوبة شو ان شاء الله مفكر هي اوّل وآخر عريضة
علتان ( موقعا على الورقة وموجها حديثه إلى فلان) : تفضل وقّع
فلان ( ممسكا بالقلم وموقعا على الورقة ): وهي توقيعي
علتان ( متحدثا مع نفسه وهو يرنو الورقة ): عريضة حلوة
فلان : حلوة وبس .. بتطير العقل
علتان : خاصة بكرا لما بتندرز درز بتواقيع الناس
فلان ( ناتشا الورقة من يد علتان ): شو بتندرز درز ؟!!؟ شو بدك تخرب بيتنا انت ؟!!
علتان : طيب ؟!؟! مو هي العريضة بتنعمل ليوقعوها الناس ؟!؟!
فلان : ليش انا وانت مو ناس ؟! ولا مو معبين عينك ؟!
علتان : اي بس ..
فلان ( مقاطعا ): بس شو ؟!
علتان ( راميا قلمه ) : هلق هي هية العريضة ؟!
فلان : بالنسبة النا هي هية وبزيادة كمان ( شاققا " يقطع عمر هال كلمة شقد طلعت تقيلة " الورقة )
علتان : ليش شقيتها ؟!
فلان : لك مشان نكتب غيرها بعدين ..
علتان : ونشقها ؟!
فلان : اي طبعا منشقها
علتان : اي طيب لامتى ؟!
فلان : لحتى تتحقق مطالبنا
علتان : طيب شلون بدها تتحقق مطالبنا اذا ما حدا قراها ؟!
فلان ( مشيرا بيده باستخفاف ): على اساس اذا حدا قراها رح تتحقق مطالبنا
علتان : اي طيب شو طعمة كل هال شغلة لكان ؟!
فلان : لك اي قاعدين عمنتسلى شو في ورانا .. طالع طالع ورقة تانية اكتب عليها
علتان : اي اي ..شو عليه...
فلان : وحط فيها شغلات اهم من هديك ...
علتان : اي اصلاً في كام شغلة نسيناها بهديك العريضة ..
ما رح تزبط معك ...
الفديو