[Abu ToNi]

ضد الكسر

علتان واضعا الساعة على اذنه ومصغيا إليها باهتمام
فلان (سائلا ):عمّا توشوشك ؟!
علتان ( ناظرا إلى ساعته بألم ) : عقدتني يا رجال ... مالها صوت !! عبحاول اسمع تكتكاتها .. مالها صوت !!
فلان ( ماددا يده ):فرجيني لشوف
علتان ( مناولا ) : امسيك
فلان ( راميا الساعة بعد تفحصها بسرعة):روح كبها روح ..
علتان : ليش كبها ؟!! واحد وعشرين حجر !!
فلان :ان شاء الله تكون مية حجر .. مو مزبوطة
علتان : اي مو مزبوطة منزبطها ..
فلان( مشقشقا بفمه ): شق .. ما بتزبط
علتان : ايــــــــــه روح عنا ياه .. ما بتزبط .. ليش هي الأنتيكة اللي حاطتها بايدك احسن !!
فلان ( مبرزا ساعته ومشيرا إليها ):هي الأنتيكة اللي مو عاجبتك بتعرف قديش عمرها
علتان : قديش ؟!
فلان : ما بعرف .. بس أكتر من ستيـــن سنة .. ( مستطردا ) صاحبها الاساسي بتعرف شلون مات
علتان : ما بعرف .. شو بعرفني
فلان :غرق بالبحر .. أبي لاقاه على وج البحر هيك مشلّخ تشليخ ..مو صفيان منه صاغ سليم غير هال ساعة مو صايبها شي
علتان : اي عادي .. ضد المي .. ما كل الساعات هال ايام ضد المي
فلان ( متحديا ): طيب بتعرف ابي كيف مات ..
علتان : وشو بعرفني شلون مات !؟!؟
فلان :وقع من الطابق العاشر .. ما ضل فيه شي الا وتكسّر تكسير ( مشيرا إلى الساعة ) باستثناء هذه الساعة
علتان : اي عادي .. ضد الكسر .. كل الساعات هال أيام ضد الكسر
فلان : ستين سنة ما قدمت وما اخّرت ولا مرة ... شو رأيك ؟!
علتان : اي روح عنا يا ... انا ما بآمن بهيك شغلات .. يا سيدي لنفرض انه قدّمت مو دقيقة تمن ( 8 ) ثواني شو رح يعرفك !!؟!
فلان :بحس عليها
علتان : شلون رح تحس !؟ ... ما رح تعرف
فلان :لا بعرف .. بشوف اذا كان العقارب تحركوا من محلهم
علتان : اي قول انها واقفة !!!! لسع عبتشرح لي كل واحد شلون مات ..
فلان :لك مو قلت لك انه ما قدمت ولا اخرت بحياتها !!!
علتان : وليش حاطتها بايدك ؟! خدها لعند المصلّح
فلان :مشان شو !؟!؟ مشان يخرب لي ياها !!
علتان : هلق المصلح رح يخرب لك ياها ؟!
فلان :طبعاً ... رح يخليها تمشي .. بينما هيك ... عبتعطيني الوقت عال مزبوط
ايوا ... لا قدّم ولا اخّر ...

الفيديو