اسف عالتاخير رجعت من الشغل تعبان وما نمت وما كنت مركز بنوب وكنت على اساس ما رد اليوم
بس بكرا رح اضطر انقطع عن الانترنت لفترة اسبوع يمكن او اكتر شوي وما بدي اتاخر عن الرد اكتر من هيك
بالنسبة للشركة WFG قبل ما بلش شغل بالشركة سمعت كتير حكي عن هالشركة لانو طبعا بما انو اسعتني جديد بهالبلد يعني ما بعرف شوفي شركات منيحة وشوفي شركات مو منيحة فعملت حركة بحثية كبيرة قبل ما اخد قرار بالانضمام للشركة والحركة البحثية استمرت حتى فيما بعد انضمامي للشركة بشهر وشهر ونصف
طبعا الاراء حول الشركة اختلفت بس معظمها تركز حول ما منعرف الشركة او انو الشركة تعتمد على البنية الهرمية او انو الشركة ممتازة
معظم العالم اللي كانت خايفة من الشركة كانت خايفة انو تكون الشركة نصابة او الشركة خدعة او متل ما بيسموها هون SCAM وهادا الشي خلاني خاف شوي بالبداية وخصوصا النظام الهرمي (تجاوزا ) المستخدم بالشركة واللي خافت منو كتير عالم
قبل ما احكي عن النظام الهرمي رح احكي عن الناس اللي قالت انو الشركة عبارة عن SCAM :
الشركات ال SCAM بالعادة بتعمل على محاسبتك اذا بدك تنضملها مصاري كتير تعود للشركة ويكون للشخص اللي دعاك على الشركة نسبة من هالمصاري
وحدة من الشركات اللي افتتحت مؤخرا وكانت عبارة عن SCAM بيقولولك بس بدك تدفع عشرين الف دولار ونحنا منعلمك كيف تصير REAL ESTATE AGENT يعني تصير قادر على بيع بيوت وعقارات بس الشي اللي ما بتعرفو انتي انو الشخص اللي دعاك عالشركة بيقبض من العشرين الف دولار نصهن يعني عشرة الاف دولار
هاي الشركة تعتبر SCAM هاي وحدة من الشركات الموجودة حاليا واللي بدأت تنكشف شوي ورا شوي
بالنسبة ل WFG ما في اي شي بتدفعو يعود للشركة كلو يعود لولاية كاليفورنيا
كيف يعني كل اللي رح يكلفك يا انو تنضم للشركة هوي 100 دولار بتندفع لولاية كاليفورنيا مشان يحررو المعلومات المتعلقة بال SOCIAL SECURITY NUMBER تبعك (كل شخص بامريكا عندو رقم مختلف عن التاني وعن طريق هالرقم بيتم ملاحقتو والنظام الاميركي بالمجمل قائم على هالارقام هاي يعني هادا الرقم هوي حياتك بامريكا )
اضافة الى تكاليف الشهادات اللي لازم تاخدها لحتى تقدر تشتغل مع WFG وهون منجي لسبب تاني انو WFG مانها SCAM لانو WFG مسجلة مع CALIFORNIA LIFE INSURANCE DEPARTMENT و مع SECURITY DEPARTMENT واللي بقصدو انو لحتى تقدر تشتغل مع WFG لازم تكون معك شهادة لتبيع انشورانس ولازم تكون معك شهادة لتبيع استثمارات وما بعتقد اي شركة SCAM بتتطلب هالشي من العملاء تبعوتها
تاني شغلة انو ال WFG ما عندها منتجات منها هيي انما WFG هيي صلة الوصل بين المستهلك او الشخص وبين شركات الانشورانس والاستثمارات الكبيرة بامريكا
لاعطي شوية امثلة
WRL = WESTERN RESERVE LIFE INSURANCE
FIDELITY
ING
PACIFIC LIFE
ALLIANCE
TRANS AMERICA
وهاي الشركات شركات معروفة على مستوى اميركا وكندا بانها من اقوى الشركات وبشهادة كل العالم حتى اللي ما بيعرفو WFG
يعني اذا بدي لايف انشورانس اقوى شركة بروح الها هيي WRL اذا بدي خطط تقاعدية اقوى شركة بروح الها هيي TRANS AMERICA واذا بدي استثمارات بروح على FIDELITY او ING
ما بعتقد انو اي شركة من هالشركات لو بتعرف انو WFG هيي عبارة عن SCAM رح ترضى تتعامل معها باي شكل
ايضا وايضا AEGON وحدة من اقوى شركات الانشورانس بالعالم وعلى فكرة انا سالت عنها ببريطانيا وتاكدت انها من اقوى شركات الانشورانس هنيك وAEGON صارت بالصين وفتحو بالهند وبعدو بالمكسيك مانها مجبورة تدعم شركة WFG اذا كانو خايفين من انو تكون SCAM
منجي للبنية الهرمية اللي العالم بتخاف منها
لو اجينا فكرنا فيها شوي النظام الاميركي قائم على بنية هرمية
يعني الرئيس الاميركي في قمة الهرم
بيجي الفرع اللي تحتو مجلس الشيوخ وموظفين البيت الابيض و و عن هدول العالم بيتفرع عالم بتشتغل الهن وبيزيد التفرع ليوصل للموظف العادي بالمؤسسات الحكومية
لناخد مثال STARBUCKS
في صاحب المحل تبع STARBUCKS هادا الشخص ما بيشتغل بايدو شي
في تحتو SUPERVISORS هدول بيشتغلو الوراق وما الى هنالك بس ما بيعملو قهوة وبيكونو مسؤولين عن اكتر من محل او BRANCH
في تحتهن MANAGERS هدول بيكونو مسؤولين عن محل واحد وعن الموظفين اللي في
في تحتهن EMPLOYEES هدول اللي بيعملو القهوة
هلأ بهيك بنية هرمية تقليدية شو احتمالية انو يترقى ال EMPLOYEE ليكون MANAGER في عندو اربع احتمالات مع شرط خدمة سنتين انو واحد يموت ال MANAGER او يتقلع من الشغل او يستقيل او ينتقل على محل تاني
واحتمال انو MANAGER يصير SUPERVISOR كمان نفس الشي
بس شو احتمال انو SUPERVISOR يصير OWNER او صاحب محل 0 بالمية لانو صاحب المحل ما رح يتقلع او ينتقل على محل تاني وفي حال استقال او مات رح يورث المحل ابنو
منجي للنظام الهرمي التاني واللي يعتمد على مبدأ ال RECRUITING واللي عم تتبعو معظم شركات الاستثمارات والانشورانس و ال REAL ESTATE حاليا
واللي هوي يعتمد على وجود BROKER وهالبروكر بدال ما يشتغل لحالو بيدور على مجموعة عملاء يشتغلو تحت ايدو وهوي بيصير يقبض على حسابهن (هادا نظام ال REAL ESTATE هل منقدر نقول انو REAL ESTATE خدعة او نصابين مستحيل لانو اميركا مبنية على نظام ال REAL ESTATE )
بس بهيك نظام ايضا وايضا العملاء ما بيقدرو يتطورو ويصيرو BROKERS لانو ال BROKER الاصلي بيعتبرهن منافسين الو وبهيك حالة هوي رح يخسر شغل
هلأ النظام الهرمي ب WFG مختلف نوعا ما
اول شي يعتمد على ال RECRUITING بس في عندك مجال انك تتطور بدون ما يستفيد منك الشخص اللي اعلى منك
رح احكي شوي عن المراتب ب WFG
1- TRAINING ASSOCIATE
2- ASSOCIATE
3- SENIOR ASSOCIATE
4- MARKETING DIRECTOR
5- QUALIFIED MARKETING DIRECTOR
هلأ رح احكي عني انا وعن طريقها رح تعرفو السيستم
انا لما انضميت انضميت عن طريق رفيقتي اللي منسميها UPLINE واللي هيي تعتبر فوقي بالهرم حاليا
انا كنت TRAINING ASSOCIATE هيي كانت ASSOCIATE بهيك حالة اي شغلة بشتغلها انا هيي رح يطلعلها منها 10 بالمية
طيب انا من اسبوع صرت ASSOCIATE وهيي اسعتها ASSOCIATE هلأ اي شغلة بشتغلها انا هيي معد يطلعلها شي لانو انا وياها صرنا بنفس المستوى او بنفس الرتبة
هلأ انا ممكن قريبا جدا صير SENIOR ASSOCIATE وهيي تضل ASSOCIATE خلص هيي معد تستفيد مني بشي
يعني هون اللي برأس الهرم مانو عم يستفيد من اللي باسفل الهرم لاء في احتمالية كمان انو اللي كان باسفل الهرم يصير براس الهرم بس بيضل ما في استفادة من بعضهن
بالنسبة للترقيات كيف بتصير
في نقاط بدك تجمعها قبل ما تترقى لمرتبة اعلى
لنقول انا صرت SENIOR ASSOCIATE وبدي اطلع لل MARKETING DIRECTOR لازم اول الشي يكون في بفريقي صار في واحد SENIOR ASSOCIATE و تنين ASSOCIATES ولازم اعمل 90 الف نقطة
موزعة بالشكل التالي
انا شخصيا لازم اعمل 30 الف نقطة
واحد من فريقي لازم يعمل 30 الف نقطة
واحد تاني من فريقي لازم يعمل 30 الف نقطة
طيب اذا انا فريقي اقوى من فريق ال UPLINE تبعي في عندي فرصة اكبر اني وصل لمراحل اكتر منها وبالتالي انكسرت البنية الهرمية التقليدية واللي بتقول انو بس القاعدة تطلع شوي الراس بدو يطلع اكتر (كمثال بسيط ال CEO وهيي رتبة من الرتب كمان المهم انو ال CEO تبعنا في عندو بفريقو عدد من ال CEOs كمان كانو باسفل الهرم وطلعو صارو بنفس رتبتو وفي احتمال انو يصيرو اعلى منو )
هلأ ممكن انا دوختكن شوي بالحكي واذا رجعت اقرا ممكن فوت انا بالحيط
بس ملخص الحكي
البنية الهرمية المتبعة بالشركة غير البنية الهرمية التقليدية او ال PYRAMID او ال CHAIN و اللي معروفة ب CORPORATE AMERICA والتي لا يمكن كسرها
بالنسبة لحكي ابو نهلة بهالقسم
اقتباس:
الاسلوب هو :
اولاً : انو نحنا يا جماعة فرع من شركة كتير كتير كتير مهمة .....مليانين مصاري نحنا !!!
تانياً : نحنا كتير فهمانين ...و ما مين ما كان منجيبو لهون ...[س نحنا اخترناكن ..ترى انتو مانكن سهلين ...!!
تالتاً : نحنا ما بدنا مصاري ......اعوووووووووذ بالله ....نحنا بدنا نعطيك مصاري !!
رابعاً : المصاري اللي ممكن تطالعا هون ...ما ممكن تطالعا باي شغل تاني ..و هات ورقة و قلم و حسوب ( و هون بفوتولك بالمضاعفات ....الله يلعن اخت المضاعفات ) !!
خامساً : لحتى تجمع مصاري منيح لازم يكون في فريق ..و كل ما كبر فريقك كل ما تضاعف دخلك باضعاف مضاعفة ضعفاً ضعيفا !!!
سادساً : منتجاتنا ما حدو عندو منها !!!
ثامناً : وقت تفوت معنا لازم تدفع ...باي طريقة يعني ..ممكن نبيعك شي و ممكن ندفعك ياهن بغير اسلوب ...و كل واحد بدو يجي بعدك بدو يدفع ....و انت بتقبض و نحنا منقبض اضعاف ...لانو في عنا .......................الهرم !!!
|
اولا - هاي حقيقة تأكدت منها رح حمل ملف PDF جبتو من AEGON بيوضح نمو WFG معاهن
تانيا- الشركة ما عم تسكر الباب بوجه اي حدا بالعكس عندهن فكرة انو كل العالم بتقدر تعمل الشغل اللي عم نشتغلو ما بيقولو انو هني كتير فهمانين وما مين ما كان منجيبو بس طبعا الشغلة مانها سهلة بدها صبر ومتابعة واذا في بعض العالم استسلمو فهاي مشكلتهن مو مشكلة الشركة
تالتا - الشركة بتوضحلك تماما شو المطلوب منك ماديا ما بيقلولك ما بدنا مصاري بيقلولك بالضبط وين بدها تروح المصاري
رابعا - باي شغل ان كان بس تتعب على حالك ممكن تطالع مصاري ما ممكن تطالعها باي شغل تاني اول كلمة بيقلولك ياها بالشركة ما تشوف اشارة الدولارات بعيونك شغلتك بدها تعب والتعب رح توصل منو لنتيجة مو بس هون بالشركة وين ما كان
خامسا- ما ممكن تعمل مصاري بس بانو يكون عندك قاعدة قوية قاعدتك لازم توصل لمستواك وتصير اعلى منك لحتى تقدر تعمل مصاري الفريق القوي ممكن يساعدك بشغلك بدال ما عم تشتغل لحالك وعم تحارب على الف جبهة يعني لوضحها بمثال انا اذا عم اشتغل لحالي كم موعد ممكن اعمل بالجمعة عشرة مواعيد او 14 موعد خلينا نقول موعدين كل نهار طيب اذا جبت حدا تاني يشتغل معي وقلتلو خيو انتي بتشتغل معي مساعد الي بحيث اذا انا حددت اربع مواعيد انا بقدر روح على تنين وباخد الربح الي وانتي بتغطيلي التنين البقية ومنتقاسمهن بالنص وبنفس الوقت وقت انتي بتحدد اربع مواعيد انتي بتروح على تنين وربحك صافي الك وانا بغطيلك التنين البقية ومنقسمهن بالنص اينو حل افضل اشتغل لحالي او معي شخص مساعد ؟
سادسا: برجع بكرر نحنا ما عنا منتجات ما في شي باسم شركتنا شركتنا عم تتعامل مع اقوى شركات امريكا انا قادر اعطيك ارقام الشركات كلها وتتصل فيها وتسالهن عن WFG
تامنا : برجع بقول كمان انو ما بتدفع شي للشركة كل شي عم تدفعو عم يروح لولاية كاليفورنيا اما لقسم الانشورانس او لقسم الاستثمارات بس ما في شي بيروح على WFG والحلو هون انو في شيكات يعني انتي بتعرف حالك لمين عم تكتب الشيك والحلو اكتر انو ما بيقبضو منك مصاري كاش لازم يكون شيك وانتي تكتبو بايدك وتوقعو
شغلة اخيرة انا اذا ضميت حدا جديد على الشغل انا ما بقبض علي شي انما بتكون مسؤوليتي علمو ودربو لحتى يصير يقدر يعمل بيزنس ووقتها ممكن استفيد ووممكن ما استفيد منو حسب باي مستوى بيكون هوي وباي مستوى بكون انا
بتمنى تكون وضحت الشغلة صرلي ساعة عم اكتب
على كلن اي اسئلة انا رح ارجع بعد اسبوع او قبل بشوي وببقى بجاوب عليها
