[..AHMAD]

مرحبا شباب
هاد يا سيدنا

نظراً لتفشي الديمقراطية هالكم يوم
فقررت استغل هالفرصة واخد حريتي شوي
قبل ما يتسكر باب الاكتتاب

قررت اني اعمل اسقاط نظام ( افتراضي )
لشو اسمي مواطن سوري
اخي انا بدي استغل هالحرية
الي بدو يشوفها صح يشوفها
ولي بدو يشوفها غلط يشوفها

المهم.. اني عبمارس حريتي بشكل او بآخر
(على فكرة ... بيتنا 3 غرف وصالون ... + مطبخ + حمامين ... يعني فيك تقول 7 غرف يعني ... 7×4 = 28 وفي عندك 4 حيطان خارجيين ... صارو 32 ... الفكرة لي بدي وصلها .. اللي مو عاجبو .. اهلا وسهلا فيه عندي .. في قدامو 32 حيط ... دق راسك فيهن ... بس شوي شوي برضايي عليك ... البيت بعدو جديد .. والدهان بيقشر ... والبلوك لساتو طري ... يعني طرقو بروية وبهدوء ودورلك بوريتين عجنب ... مشان الهدوء والتركيز ... ومشان سلامتك والسلامة العامة ... انتبه للعضايض )

اي خيو منرجع لموضوعنا

انا بدي اعمل دولة جديدة وحكومة جديدة وكلو جديد بجديد بس طبعاً نفس الاسم "سوريا" وما منغير ( الله محيي الثابت عمي )
بس انو هيك ... كرمال البروتوكول العام بدنا نحط شغلات جديدة .. واسس جديدة لسوريا الحديثة (كنت ناوي سميها الحرة ... بس خيو ما بتزبط .. شلة مرتزقة اخدة هالاسم من قبل

رئيس - وزراء - دستور ... يعني من مجاميعو
بدنا نغير كل مكونات هالدولة
مو الكل الكل ... يعني الشغلات الغلط ..

وخيو من هلق عمقلكن ما رح كون سلبطجي ما رح كون المرشح الوحيد

رح كون ديمقراطي معكن لانو بيلبقلكن الله يشهد عكلامي

ورح اعطيكن حرية الخيار

مشان ما تقولو بلشنا أنزعة من أولها

وبدنا نتسلبط عالكرسي من هلق

خيو ومن مبدأ انو هالدولة رح تكون جديدة
فـــ :
انو الرئيس جديد
وزارات جديدة
وزراء جداد
دستور جديد
كلو جديد بجديد
هلئ موقتاً موقتاً
رح ينطرح الاسماء اللي رح تترشح للكرسي
اما باقي الشغلات اللي انطرحت .. منناقشها بعدين

يعني حاصلو يا معلمي ... انا بدي ساوي سوريا بهالحلم هاد ... سوريا اللي كنت احلم فيها ... سوريا اللي كنت اسمع فيها ... كنت راسملها صورة .. وطلعت غير شي ...
اخي انا واحد تنح مخي الله ما بيقدر يفهمو .... ابن ضيعة حدودية .. شو بدو يطلع مني .... فلزالك ما حدا يعاندني بروح قواص ... بدي احلم ... ما حدا دخلو

هلئ اللي رح يقللي
حلام يا قلبي حلام

خيو انا بدي احلم
هلئ الحلم ببلاش
خليني احلم ببلاش
لانو راتب ما قبضت لسا
وخايف يصير الحلم بمصاري
فبدي لحق حالي
عالـ تنزيلات والتخفيضات ... الي وفرلي ياها الحشيش
بعدين معلمي ... الحلم مانو حرام ولا عيب ولا غلط


هلئ هون في كم نقطة
يعني فيكن تقولو ... منحط النقط عالحروف من هلئ
مشان ما يصير في كاني وماني بالموضوع

اول نقطة
المرشحين هني :

- بشار الاسد ( ما شبعت من الكرسي ولك ازعر )
- رامي مخلوع ... أو اي مخلوع غيرو ( خلع الله اسره )
- عبد الحليم خدام ( لا تقولولي هاد خاين ... مو قلتلكن من الاول في ديمقراطية عندي هون )
- رياض الترك ( قائد حزب الشعب سابقاً ونيلسون مانديلا ... نسخة معرّبة بس )
- ميشيل كيلو ( ولك يلعن ربك ... شايف الطائفية ببلدك يا معلمي )
- رفعت الاسد ( اي هع )
- عارف دليلة ( الله يفك اسرو ... ويحط محلك العشرة المبشرين بالجنة الي زكرتن بآخر محاضرة الك .. دكتورنا العظيم .. ناطرينك )
- انا ... انا ( اعدام بالخازوق لي ما بيصوت لهالخيار )
- كريم عربجي ( خيو هاد الشب ... بعد ما الله يفك اسرو... حقيقةً ... بغض النظر عن معارض او هق مو معارض ... بحسو الرجل المناسب في المكان المناسب .. )
- طارق غوراني (الله يفك اسرك ... برغم طيشك يا ابو طريق ... بس يا عمي الكرسي بيلبقلك )
- حسام ملحم ... ولو انو ما بعرفك كتير ... بس من جماعتنا العظيمة ... رح نزلك عمسؤوليتي
- شخـــص تاني ... خيار مفتوح
هلئ خيو لا تقلولي احتمالاتك مو منطقية
هاد موضوعي .. وهاد حلمي .. وانا حر فيهن ... نشالله رشح الله ... ما حدا دخلو
هلئ خلصنا من اول نقطة

نقطة نمبر تو:
في كم مشاركة ... مشان ما حدا يشرفني ويحكيلي ياهن ... بركي ما كنت فاضي .. بقا رح افترض جدلاً كم نمط لكم مشاركة .. ورد عليهن من هلئ ... بجوز انشغل بعدين او اتعبى بشي ستيشن ...


هالانماط رح تكون عالشكل التالي :

الي رح يقلي .. خيو ولا واحد من هدول .. لانو ما عرضو عليي خطة تضمن كرامتي

بقلو :
عرفانك رح تجي يا ازعر ... فلزالك لا تتحربق ... لانو طس منيح اخر خيار .. بيبين معك .. انو تاركلك احتمال مفتوح بالاخير حط لي بتشوفو مناسب
بعدين بدي عقبـ لك عشغلة ... انو تقاطع التصويت بصير هيك شي بحالة انو في زعرنة بالنتائج .. وهون ما في حدا بيقدر يلعب بالنتائج .. الا ازا الحكيم ... حب يمزح شوي ... هاد معلش .. في موانة

كمان لي رح يجي يقلي ...
انت من جماعة المعارضة لاجل المعارضة بس .. مالك غاية غير هالشي .. وما عندك علسانك غير اسقاط النظام ... ومو شاطرين غير باللعي والبعبعة

هيك نمرة بحب بشرها انو في رد مختصر كتير الي هوي :

خراس .. وحاجتك علاك
بعبع وانا مقتنع ... افضل ما كون مقضي عمري عمطبل وزمر وصفق ونفخ ومسّح جوخ ... كرمال عيش يومي لي انا فيه
يعني بطلي مبدأ " الكرامة بتروح وبتجي بس اهم شي الصحة


اللي رح يقلي ...

الحرية والكرامة مو انو اقدر احكي لي بدي ياه بدون ما حدا يحاسبني انما الحرية والكرامة هية اني امشي بهالطرقات ... وعين الحكومة حارستني

بقلو
اي العين تطرئك ... مو تحرسك
قلتلي تمشي بالطريق وعين الحكومة حارستك
قصدك اجهزة الامن
انو يعني هل تعلم شو هوي عكس الامن

آه؟
ما سمعت؟
ما عرفت ؟؟؟
اي رح قلك انا
عكس الامن هوي اجهزة الامن
زكرتني باللي كتب مسرحية "مضمونها بيحكي عن واحد كتب مسرحية بيقدمها للرقابة بتقوم الرقابة بترفضها"
فـ الرقابة رفضتها لانو الرقابة مو هيك
اي فالامن عكسو اجهزة الامن
فالله يخليلك امنك يا تقبرني
يعني بالمشرمحي
خليك نايم بين رجلين كلاب البعثيين والوصوليين
( هي الفقرة برعاية ( اب سمرة ) بتصرف )

هلئ هون رح ننتخب الرئيس ... بعدين منقرر الوزارات والوزراء ... ومنشوف بين بعض باجتماع مفتوح ... هالدستور الجديد ...

وبالنهاية .... سيو إن زا هيل ... يعني منطسكن بجهنم شباب

ودمتم


ملاحظة : نصيحة ... نصيحة ها ... النصيحة هية انو مو نصيحة بالمرة اي حدا من الاعضاء ... يستخدملي اسلوب التخوين .... بالموضوع
انا عندي المنبر متل الله
ومواضيع المنبر هني الملايكة
فلزالك ... خلونا رواق ... مواضيع المنبر ... من لما نزل اول موضوع ولحد هلق ... كان رب الرقي ... فانو ما بدنا ننزعها
البيضة المنزوعة ... بتنزع صفد بيض صاغ
فلزالك
وجب التنويه