[tiger]

كاتب النص الأصلي : sandra

تايغر أفكارنا جداً متقاربة وحتى الخبرات
باستثناء أنو الأحداث الأخيرة اللي صارت معي خلتني شوي شكك بقضية رعاية الله ومحبتو الي
بس بضل ما بقدر اتخلى عن فكرة الإيمان والرجاء فيو
بس سؤال تايغر بتحس الله عادل ؟

ساندرا كتير مرات بحس انو الله مو عادل ابدا و ما بيعرف العدل , انا ما بآمن بوجود صفات مسبقة لـ الله , بقدر بعطيكي صفات للتجسد ياليل ساواه الرب لانو هذا شي لمسناه كبشر , بس الله ( الآب ) بحد ذاته انا ما بشوف له صفات يعني ممكن يطلعه معه شو ما كان , بحسه ( كبشر ) كتير مرات عشوائي و ما عم يعرف شو عم يعمل , و مرات بحسه انو عرفان شو عم يعمل تماما ( في حال آمننا بوجوده طبعا و ما اعتبرناها صدفة بحتة ) ...
السبب بظن انو نابع من بشريتنا , حتى مقياس العدل عندنا كبشر بيتغير , ياللي كان عادل قبل 2000 سنة ممكن ما يكون عادل هاللا ...
فعليه انا بشوف انو الدنيا ماشية ضمن رتم احيانا بشوفه محدد ( ما بعرف ليش!!! ) و بحس فيه و احيانا اكيد بفقد البوصلة و ما عاد بشعر فيه , لكن بحسب قناعاتي , مو كل شي انا بفكر انو عادل و جيد و خير , ممكن بكون عم يشكل نفس القناعة بالنسبة لغيري او بالنسبة لهالقدرة الالهية ...
انا كتير بأمن بموضوع النسبية , مرات شي بيكون كتير سيء بالنسبة الي بالوقت الحالي ( خلينا نقول انو الله مسؤول عن حدوثه ) و بعد فترة من الوقت بشوف انو بلش يتحول لايجابي , و بتبلش قوتي بتنبع من هالتجربة السيئة ياللي صارت معي ....
سر الدنيا كتير كبير و كل مرة بفكر فيه بعمق بوجع راسي , بس انا بشوف انو عملية اكمال حياتي بهالطريقة هو افضل الموجود
من فترة انصدمت بقسوة بظروف مؤلمة جدا , لكن ياللي بقدر قوله انو انا رح ضل على علاقتي مع الله و متبع تعاليمه ما دام عم شوف انو هالتعاليم عم تحسنلي حياتي و عم تجعلني انسان افضل لائق للحياة في العالم , انسان عم يعمر هالكرة الارضية و ما عم يهدمها , انسان بساهم في تقدم جنسه البشري و عدم ارجاعه للخلف ...
كتير مرات بفكر انو من الممكن تكون هاي حياتنا كلها خيال ( عالم تجربة يعني ) و هي عبارة عن مرحلة قصيرة من حياة تانية اطول ممكن نكون عم نحياها في مكان تاني تماما ....
خلينا نكملها للنهاية لنكتشف الحقيقة في النهاية , في يوم الموت (او ممكن الحياة في مكان تاني) ...