اقتباس:
|
مين قال أنو محرمات . المقال هو عن سياسات الأخوان . وأنا لقيت أكتر من نص الردود عمتناقش الختان
|
و الله يا معلمي متل مانك شايف... في آراء بتقلك أي مزبوط ختان الاناث مانو اسلامي انما موروث أفريقي أو فرعوني... بس مع ذلك ما عجبهون نقد تمسّك الاخوان بهالأمر و اصرارهون على انو ما يعتبر غير قانوني و تركولو هيك نافذة قانونية...
اقتباس:
لأنك مارضيت تتبنى علمانية الحكم بمصر . فبمنتهى البساطة بدي أفهم وجهة نظرك مشان أعرف ناقشك وما أظلمك بتحميلك مالاتتبناه
|
نظام الحكم بمصر مباركاوي... لاعلماني و لا هم يحزنون... أساسا ازا بدك رأيي أنا ما شايف نظام علماني واحد بكل الدول العربية, يجوز أكثر شي يقترب - و من بعيد- الى العلمانية هي سوريا... بس بمصر النظام يلعب على توازنات بهلوانية... اليوم نسكّت الاقباط و نعطيهم حق المطالبة بمرتديهم و البابا تبهون يلاقيها لعبة كل ما يزعل يروح يعتكف لحد ما نرد عليه ... بكرا نمنع كم كتاب و كم فيلم و نحاكم كم واحد مشان الأزهر و الاخوان يرضو... بعد بكرا نعطي للمرأة حق الخلع مشان ما يزعلو العلمانيين... هيك أنا بشوف النظام المصري
اقتباس:
|
غريب . وين أنت شفت مسبة العلمانية بالموضوع . أنا شايف العكس تيار فكري داخل برلمان . عم ينسبلوا تفجيرات العراق . وأنا قصدت بكلامي أنو لما حكينا عن علمانية النظام السوري مرة أنت تبريت منو . وبنقاش تاني تبريت من العلمانية التركية . وهون متبري من العلمانية المصرية . وبدنا نجي نحمل جزء من برلمانيي مصر . كل تخلف مصر
|
يا أخي قالولك أنا علاّمة زماني لأقعد أتبرى؟؟ كل واحد فينا عندو آراء فقط... لكن بهالمنتدى (ارجع شوف و قلت بهالمنتدى مو بهالموضوع) اذا وحدة تركية مدري شو صار بحجابها ينزلو الشباب رقع بالعلمانية و العلمانية كيت و كيت و أبو العلمانية و ام العلمانية...
العلمانية هي طريقة تفكير متبنيها كشخص و ممكن أتوافق مع فكرة محددة أو لأ... لكن اللي عندي ياه واضح هو انو مافي نظام عربي علماني... و سبق و وضّحت انو اللي عم يصير بتركيا هو شوفينية قومية تركية و ليست علمانية.. لأنو التيار القومي التركي بدو يتبرى من كل شي اسلامي و عربي لأنو باعتقادهون انو اختلاطهون بالعرب و بالاسلام هو اللي أخّر نهضتهون (حتى الحروف العربية غيّروها!!) و لذلك ما فارقة معو تكون متزمت اسلامي بس انو ما يبان عليك من لبسك.. هيك بدهون. و هالأمور واضحة و موضحة لكن في حملة ترهيب ضد العلمانية شي فظيع... و أفضّل اني اعتبر انو بسبب سوء فهم معنى الكلمة
اقتباس:
|
أنا فكرتي وببساطة . أنو منهاجم الحركات الأسلامية على أنها حركات تكفيرية أرهابية . بس حتى لما أجت للبرلمان وبطريقة ديمقراطية مصرين نلغيهم
|
ياااااااااااااااااااااااا ااااااااااااااااااا ويلي!!!
وين قلت بدي الغيهم؟ عم ننتقد.. حكي عم نحكي يا زلمة حملنا سلاح عليهون؟ بكل صحافة الدول الديمقراطية تلاقي كتّاب بينتقدو موقف الحزب الفلاني من الموقف الفلاني... و هون عم نحكي انو في بمصر ألف شغلة و شغلة أهم -برأيي- من انو الاخوان هلأ يمسكو هالقصة بالبرلمان.. اذا انتقدت شغلة يعني بدي الغيها صرت؟؟ الله يسامحك
اقتباس:
شريك حسيتك عم تعيط عليي أكتر ماعم تناقشني 
|
لا والله يا أخوي مو عياط لكن الشغلة و ما فيها انو بيزعجني انو -بشكل عام- في تقبّل لأنو كل شي ما يوافق وجهة النظر الدينية هاد معليه نسكتو و نخرسو... و بالتالي بتصير سبيل الشغلة.. كل ما فكرة ما بتعجب بنطالع من تحت الأرض صلة دينية و نقمع اللي حكاها لأنو هاد ضد الدين... تتذكر بمدري أي موضوع انزعجت انت من انو كل كلمة تنقال عن حزب الله رأسا بيقولو عليك طائفي؟ أي هاد شي مشابه جدا
سلامات
