[ناعورة الحرية]

ما بنكر اني مريت بمنتديات بعدد شعر صلعتي الملساء، بس بصراحة مافي منتدى خلى نفسي تكبس للمشاركة فيه ، يمكن الحق على نفسي مو الحق على المنتديات، على العموم نفسي كبست للمشاركه بهالمنتدى العادي، ربما كبست نفسي للمشاركة لانه عادي لو كان رائع لما اشتركت فيه .. ربما.

اذا كان من حقي اني اعرفكم فمن باب اولى انه من حقكم تعرفوني - مثل ما انا بعرف حالي - قبل ما تعرفوني عليكم ، لذلك رح اقدم نفسي على حقيقتها:

يللي بيشوفني من بره باخد عقله بيقول ما احلى شبوبيه هلشب الحليوة، بس ما يقرب ويشوف يللي جوه بيلاقي مافي شي سليم على حاله، يعني بيلاقيني من جوه منبوش.. ما واضحة؟ بعطيكم صوره اقرب.. قلبي مركب عليه قفل ومسكره وما بعرف وين مفتاحه ضايع ، لذلك عم اضطر حول مجرى الدم للكبد ، والكبد عندي اتضخم مو لانه عم يقوم بدور القلب - لا والله شغال وما مقصر - بس لانه مر بظروف وشاف شوفات بتطق الكبد فازرق لونه واتضخم حتى ضغط على الرئتين والامعاء رابط فيهم المعدة والبنكرياس حاطيته اسفين للقرحة .. وقيس على ذلك..

وضعي العام انه خلقتني امي وانا محكوم بالاعدام .. بعمركم سمعتوا هيك سمعه ؟؟ والله العظيم اني من ولادتي لقيت حكم من القانون السوري ومصدق من مجلس الشعب السوري ونافذ باعدامي !! بتتعجبوا؟؟ وصدقوني انه نص الحكم بيحكم باعدام اولادي يللي من صلبي قبل ما يجوا للحياة ويطبق الحكم عليهم حال بلوغهم سن البلوغ والتكليف القانوني.. صدقوني عم احكي جد ما العب بالألفاظ.

بناء على ما سبق هربتني امي من سوريه لما كان عمري سبع سنين بهويه مزوره وسكنت ببيروت على امل يتم استثنائي من الحكم بواسطة .. وانا عم انتظر الفرج اجاني.. اجاني مو الفرج اجاني قوات الردع احتلوا لبنان وحاوطوا البيت يللي كنت فيه بـ 300 عنصر للقبض علي!!! وللطف الله ما كنت بالبيت لاني كنت مخلص الصف الثالث الابتدائي وناجح للرابع وطالع مشوار للجبل فزورولي جواز وهربت لابو ظبي.. القصه طويله اذا كان لي عمر بكلمها الكم

هلئ اضطريت اقطع كلامي لاني انشغلت - رفيقي بده وصله مشوار.. سامحوني اذا فيه اخطاء املائيه كتير .. وبتمنى اشوف ردود منكم مشان اتشجع اكمل معكم