|
مختارات لجولييت بدر
بقلم: جوليت بدر عَمْ إنْطْرَكْ عِنْدي إِلَكْ شي كْتير خصْر الْوُرُود مْزَنَّرَة بِحَرير عَمْ إنْطْرَكْ تا خَبّرَكْ شو صار بَيْن الْفَراشِة وْبَين الِشْحارير رَحْ إنْطْرَكْ تَ نْغِلّ بالغابات تِمْسُكْ بِإيدي وْبالْفَلا مِنْطيـــر عَمْ إنْطْرَكْ لَنْغُوص بالمَوجات نِقْطُفْ مَحار الشَّوق خَلْف الشِّير وْنِطْلَع عَ جِنْح الْمَوج نِتْمَشَّى نِسْمَع حْكـايا الْجِنّ هَالسِّكِّير مَرْجُوحْة الْهَمْسِة عَمْ تِنْتِظِرْ رَدَّكْ طــال البُعــاد وْما إلُو تفْسير عَمْ إنْطْرَكْ حتى الزّمان يْدُوخ وْحتى الفَضا مايِقْبل عْصافيـر شو قَولْتَكْ يللّي مْلكِتْ قلبي بْحَمْلِة حَنـان عْلَيكْ فيها بْغِيْــر هَدِّم حْصُون الصّدّ وِالْهِجْران وْنِرْجَع سَوا لَشَوْقْنـا نْواطير ــــــــ |
حلوو كتيييييييييييييييييييييير شكرا dot.
|
شهْقِة ورِدْ.
بقلم:جولييت بدر جِيْـتِكْ أنـا ياحِلْوِة الحِلـْوات يَللِّي القَمَر سِكْران بِوْصالِكْ جِيْـتِكْ أنـا تـَ قَطِّف النّهْدات وْشَهْقِةْ وَرِدْهُنْ لَـيْل عَ خْيـالِكْ إنْتِ النَّهِدْ مِنْ جِسِمْ أرْض الرَّبّ الْكَوَّنْ جَمـالِكْ نَوَّر تْـلالِكْ نَهْدِ الطَبيْعَة وْكَرْزْتُو الْحَمْرا قْنـاديل نُور تْشَعْشِع بْخالِكْ ضَيْعْتي .. زيْتُونْة التَّـاريـخ سِفْر الْحَقيْقَة بْيِذْكُر فْعَالِكْ السَّيْكُون وِالشِّفْشاف وِالطَّـيُّـون وْريْحِة الْجَنِّــة بْعِرْزالِكْ الاْسْكَنْدَر الأكْبَر غَزَا العالَم وْعَرَّجْ عَ دِيْرِتْنـا تا يِقْعُد قْبـالِكْ بُولُس إجا لِمِّنْ سِمِع فيكِ روما تَرَكْها وْهـــاااااااام .. كِرْمـالِكْ روما .. شو روما ؟ شو الكُولِيْزْيُوم!! لَو يِلْمَحُو نُورِكْ بيْقُولُو: نِيَّـالِكْ إنْتِ الـ صَّنَعْتِ الْمَجْد بُوْجُودِكْ نِجْمِـة وْنِجْمِة يِنْسِجُوا شَـالِكْ جَنِّ الزّمان بْعِشْقِك وْغَنَّى مِنْجَيْرْتُـو حَنِّت تَ يِحْلالِكْ قـالوا: الْعَجايِبْ سبْعَة هَالأيَّـام إنْتِ العَجيْبِة وْما حَدا طَالِكْ عَم إخْتِصِر حُبّ الْوَطَن فيكِ إنْتِ الْوَطن .. خَيْرُو مْنِ سْلالِكْ. |
يا عُمِر وَقِّفْ هَون.
بقلم: جولييت بدر دَقّ الْعُمُر بابي وْأنا وَحْدي عمْ راجِع الذِّكْرى عَ المْخدّة ضَوَّيتْلُو شَمْعَة أنا وِالْقَلْب وِاسْتَعْرَضِتْ خُطْوات كِلّ الدّرب دَمْعِة حِزِنْ كَرْجِتْ عَلى خدّي قَللّي: شُبَك؟ وَيْن الْفَرحْ .. لَوْن الْقَزحْ كنتِ ما تِتْهَدِّي لَيْكي الشّمس لَيْكي القَمر صَرْلُنْ دَهِر قَضُّوا عُمِر وَرْدي غَفْلِةْ زَمَان ارْتاحْ .. وِسْنينو بِتْعَدِّي وْمِتْلِ اللّي بَدِّي قولْ وْمِتْل اللّي ما بَدِّي دَخْلَكْ بَقَى ياعُمْر وَقَّفْ هَون اتْرِكْني مع النَّسْمِة مع الْبَسْمِة إنْشُرْ عِطِرْ.. كَمْشِةْ شِعِر خلِّي الْحَلا عِنْدي يِمْكِنْ خَجَلْ مِنْ لَهِفْتِي وْوَجْدي مِنْ حَرِكْتي مِنْ دَمِعْتي وْرَدِّي سَرَّبْ .. مِشِي قَللِّي: اقْطِفي نْجُوم الْحَرِفْ لا تْوَقّفِي وِتْمَرْجَحِتْ بين النُّجُومْ إقْطُف سِحِرْ .. زُور الْبَدِرْ إسْرُقْ ضِياه وإكْتِفِي خَلاّني إتْمَرْجَحْ صِبَا إسْهَر مع الكِلْماتْ بُوسِا .. وْلَيْعِبا إحْلَم مع فْراشات حِلْوة عاشِقَة تْطَرِّزْ حِلِمْ تِرْفُضْ عَتِمْ عَ النُّور تِتْرَقْوَص وَلا تْهَدِّي إحْمي خْدُود الْوَرِد مِ التِّجْريحْ وْضَلّ حَدُّو تَ يْزيح الرِّيح وْضُمّ حِفْنِة مْنِ الْحَلا بْيَدِّي. |
اقتباس:
:mimo: |
اقتباس:
|
| الساعة بإيدك هلق يا سيدي 00:32 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون