العراقيين في سوريا
 

أول شي مرحبا بالجميع

انا بدي اطرح موضوع للنقاش وهو موضوع لجوء العراقين للبلاد العربية وخاصة بسوريا

حسب احصائية نشرتها جريدة الدستور الاردنية انه يومياً يدخل على سوريا والاردن حوالي ثلاثة ألاف عراقي

واحصائية تانية من قناة الجزيرة انه عدد العراقين في سوريا في نهائية عام2006 كانت مليون وستمئة ألف

وحوالي 14 ألف طالب عراقي يدرس في المدارس والجامعات السورية وطبعا هذا العدد عم يزداد

طب المشكلة انه كانت في ملاحظة لازدياد الاسعار في كل مكان يوجد فيه عراقين مثل اسعار البيوت والاجارات

وأسعار السلع

وشغلة تانية الطلاب العراقيين في الجامعات ا لسورية يعني الطلاب عم ياخدو فرص الطلاب السورين

وبشكل عام وين مارحت بالشام صاير عم تسمع اللهجة العراقية اكتر من السورية

طبعاً نحنا العرب واحد ولازم نوقف مع بعضنا البعض وانا متأكد انه لو بسوريا صار شي لاسمح الله كان الشعب

العراقي ما بيقصر بس كلشي زاد عن حده نقلب ضدده

طب ممكن هاد الشي يأثر على السورين اذا تفاقم وجود العراقيين بسوريا؟

بتمنى تعطوني رأيكم بالموضوع لان بصراحة الموضوع كتير زاعجني وخايف يجي يوم نكون فيه ضيوف ببلدنا

يا حبيب يعني فكر بالموضوع شوي يعني وين بدهم يروحوا يعني نحن عرب ولازم نستحمل بعض يعني مثلاً صار أنت عندك حرب لاسمح الله وأولادك وعيلتك أهلك معرضين للخطر وين بدك تروح صح أرتفعت الأسعار بس مو الحق على العراقيين هدول التجار الكلاب هي لعبة منهم عرفت كيف علي حبيبي يعني شو مثلاً سبب غلاء البيوت ؟؟؟؟
هو صاحب البيت غلاه يعني هيك تجارنا بيستحكموا الوضع يا حبيبي

تحية ليكم احبتي ويسعد مساؤكم بكل الخير . .

اخوكم عراقي وساكن بالعراق . . رحت عالشام مرتين وحسيت نفسي بين اهلي وناسي . .

قبل هيك رحت لعمان مرتين وسكنت بارقى مكان بعمان (الجاردنز) اللي رايح لعمان اكيد راح يعرف هذه المنطقة

بس صدقا ً ما حسيت بأي ألفة بعمان . .

طيبة الشعب السوري واخلاقه هي اللي خلت العراقيين يلجؤون لبلدهم الثاني وبنفس الوقت ظروف العراق التعيسة اللي ما الها حل . .

صدقني ماحدا يحب يتبهدل ويبعد عن بيته ويعيش مشرد . .

بس حط مكانك بدل العراقيين . . اول شيء امان مافي والقتل بالجملة يوميا ً . . ثاني شيء الاسعار نار وشغل مافي . . وثالث شيء مافي عنا كهرباء ابدا ً تخيل بهالصيف الحار ومافي كهرباء الناس هون كلها عايشة على مولدات الكهربا اللي يادوب تشغلك تلفزيون ومروحة . .

بالسبعينات والثمانينات العراق كان ملجأ لكل العرب وبال73 كمان العراق حمى سوريا بدماء ابناءه . .

موقف سوريا الشريف اليوم مع العراقيين مستحيل اي عراقي ينساه . .

الله يحمي سوريا واهلها . .

والله يحرر العراق وينصر المقاومة . .

والحمدلله على كل حال . . :D

اولاً اهلاً وسهلاً فيك بالمنتدى

اناما قصدت اني بكره العراقيين

بالعكس كل جماعة وفيها المنيح وفيها العاطل وعلى فكرة انا البنت يلي بحبها عراقية من سكان الاردن وبفتخر فيها

انها عراقية

يعني انا ما عندي حقد علىالعراقيين بس شغلة وحدة يلي خايف منها

انو مثلاً انا طالب بكلية الصيدلة وفي عراقيين كتير عم يدرسو صيدلة بسوريا طب لما انا اتخرج. الطلاب العراقيين

اكيد راح ينافسوني بأي وظيفة ونحنا السوريين لحالنا بندابح بعض على الوظايف طيب كيف هلئ وفي عراقيين

الوظيفة

يلي بدو ياخدها العراقي انا واولاد بلدي اولى فيها طبعا هاد الشي بينطبق على كتير مجالات

ما بعرف اذا فكرتي وصلت انا ما بكره العراقيين وبالعكس بزعل عليهون كتير

ومرة تانية اهلاً وسهلاً فيك:D

أي صحيح كلامكم حلووووووووووو

ولله الاجانب عم يستئبلو خيرات الله ناس و دون حروب كمان
بئا خلينا مرة نكون متلهون و الشعب العراقي في حرب عندو يعني شو رح يصير اذا ستحملنا بعض شوي
ما بعرف هاد رايي :D

الاصدقاء تالين وامير والعاشق مننا اشكر مشاعركم الطيبة تجاه بلدكم الثاني . .

صديقي العاشق مننا . .

وصلتني فكرتك . . بس يا سيدي هذا الشي موجود بكل جامعات العالم وحتى سابقا ً عندنا ببغداد قبل الحرب

يعني انا خريج الهندسة و كان معي بنفس المرحلة طلاب من سوريا واليمن والاردن خير من الله . .

التبادل الثقافي او التعليم في دول تانية شيء موجود . .

بعدين صدقني مابعتقد انو العراقي راح يتوظف بمؤسسات الحكومة لينافسك على الشغل . .

الرزق على الله عزيزي . .

الشغلة اللي تحز بنفسي ليش الاجنبي بنشيله فوق روسنا والعربي اللي منا وفينا يحتاج الف فيزا واقامة مشان يدخل بلدنا وبكل تأكيد هون كلامي عن دول الخليج ومش سوريا . .

تحياتي مرة ثانية . . :D

العراقيين كترو وغلو الاسعار صح

بس تجارنا هنن كلاب وهنن اللي بدن ياها من الله
الله ينعلن

طيب ليش الدول المجاورة مااستقبلت الاعداد الكبيرة من النازحين العراقيين !!
ليش كل شيء على سوريا وبالاحرى كل شيء على رقبة المواطن السوري المسكين ... خصوصا اللي عندو عيلة !! على عيني وراسي انا بحب اقوم بفعل الخير بس مو على حساب اهلي وناسي ... بدي اسأل كل واحد بيتصفح هالموضوع سؤال ويجاوبني بصراحة.
اذا صارت حريقة ببيتك وببيت جارك بوقت واحد وجارك مو موجود وانت موجود .. بتطفي الحريقة ببيتك بالاول ولا ببيت جارك ؟؟؟
حاوبوني على هاد السؤال بصراحة

شيء تاني ليش مانساوي مخيمات للنازحيين العراقيين بعيدة عن المدن الرئيسية يلي مابتتحمل ضغط سكاني متل مدينة دمشق وحلب ؟؟ الا يعتبر هاد حل وسطي جيد بالنسبة للعراقيين والسوريين !!

بالله عليكم مابتزعلو لمن تشوفوا عوائل سورية مشردة بالشوارع والحدائق العامة بسبب تضخم اسعار الايجارات بنسبة 400% في بعض المدن الرئيسية واللي تسبب فيه العراقيين باعتبار انهم يدفعون بالدولار كمان مو بالليرة

في اسال شي عالماشي...
كل بلد بالعالم بتطلع روحو بالطول وبالعرض مشان يجيب سواح يتسوقو ويستاجرو ويدفع بالعملة الصعبة
طيب خيي اعتبرو القصة سياحة في تقارير بتقول في مليون عراقي بالبلد طيب لو كل واحد منن صرف بالشهر 5000ليرة يعني 100$ هاد بيوصل ان بالسنة 1200$ ضرب مليون يساوي مليار وميتين مليون
طيب اذا ميزانية البلد 6 مليار يعني هالشباب عم يساهموا بشي 20% من الميزانية
بس المصيبة ان نحنا بدنا اي شماعة تحط سبب مشاكلنا عليها وهون المصيبة
قبل كان كلما دق الكوز بالجرة بنقول الوحدة العربية بعدين صارت قصة ان نحنا دولة مواجهه بعدها ماالعالم نست اسرائيل وصارت موديل قديم بلشنا بالعراقين....صحيح ماعرفتوا شو سبب موجة الحر؟اكيد هي كمان بسبب العراقين :o

تحياتي لألك يا غالي ...ولتفهمك للموضوع...و بيت الديق بيسع ألف صديق ....بس المشكلة إني في ناس دايماً من فشلها بتحب تحط الحق على أتفه الأسباب...مع إحترامي لصاحب الموضوع...يلي بالتأكيد أنا ما عم بقصدوا فيه
تحياتي لإلك ولكل العراقيين الشرفاء و إن ما شالتكن الأرض بتشيلكن عيونا و الله يكون معكن


يا أخي مو من عادات الشعب الكريم يحكي بهيك تفاصيل
و أنا مارح قلك غير الله لا يحطك محلهن
أما بالنسبة للأسر المتشردة بالشوارع فهي مو مشكلتك ولا مشكلة الشعب العراقي
هي صدقني مشكلة الحكومة أولاً و التاجر ثانياً..و إنته و أنا بنعرف إني أكتر من 35% من البيوت في دمشق و حلب فارغة .....و هي عبارة عن تجارة فقط لا غير
و روح وشوف

خيي انت عراسي ورد كتير حلو ولطيف...بس ليش شاكك اني مو اممي؟؟؟ :?

لك له يارفيق ...شو في الك عند الاممين :jakoush:؟؟والله الجماعة فهيمين وقلبن لالله :lol:

و الله القرار لازم يكون قرار حازم بطردك من المنتدى......شكلك إنتي مالك علاقة بالسوريين أكيد إنتي دخيلة وماعندك غير الفتن.......شو هالبعد النظر
بيقول المتل ...يوم إلك ويوم عليك
يعني متل ما جرى عليهن من الممكن إني يجرى عليكي:x

حبيبي أممي
أنا كتبت إنك فهمان ...مو مسخرة لا سمح الله ..أنا كتبتها عن جد

لا صارو العراقيين بالاردن مليون واحد بس شو بنعمل يعني ما فيها شي لو راحو عالبلاد العربية وبنضل كلنا عرب