isy123 07/07/2007 15:36 قال بيقولوا.. ظل راجل ولا ظل حيطة ، يا ختى بلا وكسة !   قال بيقولوا.. ظل راجل ولا ظل حيطة ، يا ختى بلا وكسة ! وقفت الست بهية على كوم عالى وبدأت تخطب وسط الحريم المرصوصين على المصاطب : قال بيقولوا ضل راجل ولا ضل حيطة ... ! بذمتك عمرك سمعتى عن حيطة تقعد تشخر طول الليل وماتخلكيش تعرفي تنامي ؟ والا حيطة تدخل من باب البيت تجعر عايزة الغدا ؟! وبعدين تطين عيشتك علشان الملح طلع زيادة في البامية ! والا ممكن ترجعي البيت في يوم تلاقي حيطة بتبوس الخدامة ؟ طيب شفتى حيطة تملا لك سقف البيت دخان ، وأرضيته سكن ! والا حيطة تقعد تنقد عليكي وتقولك انتي رايحة فين وجاية منين ! والا حيطة تصحيكي في نص الليل علشان معرفش إيه طلع في دماغها ! والا حيطة تدوخك وراها علشان تشوفي هيه بتكلم مين في التليفون بعد نص الليل طيب دي الحيطة معروف مكانها دايماً ، إنما المحروس يدوخك وراه علشان تعرفي هو سهران في أنهى داهية ... قال إيه ، عنده شغل ! ياسلام ! بذمتك فيه حيطة تحاول تطلعك غلطانة في كل كلمة تقوليها علشان تثبت للعيال إن الحيطة بتفهم أحسن منك . والا حيطة تلوى بوزها وتقعد بالفانلة وروب النوم لما أمك تيجي تزورك وتحبك معاها تحكي نكت عن الحموات ! والا حيطة تقعد تقولك ما تخرجيش بالفستان ده أحسن محزق عليكي ولما تقولي لها هاتى فلوس علشان تشتري فستان غيره تعمل ودن من طين وودن من عجين ، طيب دى حتى الحيطان لها ودان . يا شيخة بلا قرف ... بلا نيلة ... الحيطة أجدع ، على الأقل مش حتتحبسى لو فاض بيكى ونفذتي حلم كل الستات ... ودقيتي في الحيطة مسمار !!!!!:hart:

Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون